Moses i stap 40 yia long Midian. Hem i mared long ples ya mo i gat pikinini. Wan dei, taem hem i stap lukaot long ol sipsip klosap long hil ya Sinae, hem i luk wan narakaen samting. Faea i laet long wan smol tri, be i no bonem ol lif blong hem. Taem Moses i go klosap blong luk, wan voes i kamaot long smol tri ya, i se: ‘!Moses! Yu no kam klosap tumas. Yu tekemaot sandel blong yu, graon ya we yu stap stanap long hem i tabu.’ Jehova i yusum wan enjel blong toktok long Moses.

Moses i fraet mo i kavremap fes blong hem. Voes ya i gohed se: ‘Mi luk olsem wanem ol man Isrel oli stap harem nogud. Bae mi tekemaot olgeta long han blong ol man Ijip, mo bae mi tekem olgeta oli go long wan gudfala kantri. Yu nao bae yu lidim olgeta.’ ?Yu ting se Moses i sapraes?

Moses i askem se: ‘?Be sipos oli askem long mi hu i sanem mi, bae mi talem wanem?’ God i ansa se: ‘Yu talem se Jehova, we i God blong Ebraham, Aesak, mo Jekob, i sanem yu.’ Moses i talem se: ‘?Be olsem wanem sipos oli no bilif long tok blong mi?’ Jehova i mekem wan merikel blong soemaot long Moses se Hem nao bambae i givhan long hem. Hem i talem long Moses blong sakem wokingstik blong hem i go long graon. Taem Moses i mekem olsem, wokingstik ya i kam wan snek. Moses i holem tel blong snek ya, nao i kam wokingstik bakegen. Jehova i talem se: ‘Taem yu mekem merikel ya, ol man bae oli luksave se mi mi sanem yu.’

Moses i talem se: ‘Be mi mi no wan gudfala man blong toktok.’ Jehova i promes long hem se: ‘Mi bae mi talem ol samting long yu we yu mas talemaot, mo bae mi sanem brata blong yu Eron i go wetem yu blong givhan long yu.’ From we Moses i save se Jehova i stap wetem hem, hem i tekem woman blong hem mo ol pikinini blong hem, nao oli wokbaot i gobak long Ijip.

Ol man Isrel oli stap wok slef long Ijip. Nao Jehova i sanem Moses mo Eron tufala i go luk Fero blong talem long hem se: ‘Yu mas letem ol man blong mi oli gofri, blong oli save go mekem wosip long mi long draeples.’ Fero i flas we i flas, i talem se: ‘Mi no save Jehova, mo bae mi no letem ol man Isrel oli go.’ Nao Fero i fosem ol man Isrel blong oli wok strong moa. Jehova i wantem se Fero i lanem wan samting. ?Taswe hem i mekem wanem? Hem i mekem Ten Panis i kasem Ijip. Jehova i talem long Moses se: ‘Fero i no wantem lesin long mi. Tumora, long eli moning, bae hem i godaon long Nael Reva. Yu go talem long hem se, from we hem i no letem ol man blong mi oli go, wota blong Nael Reva bae i kam blad.’ Moses i obei long Jehova mo i go luk Fero. Fero i wajem Eron taem i kilim Nael Reva wetem stik blong hem, nao i sek se wota blong reva ya i kam blad. Ol fis oli ded, reva i sting we i sting, mo ol man oli no moa save dring wota blong Nael Reva. Nating se i olsem, Fero i no wantem letem ol man Isrel i go.

Seven dei biaen, Jehova i sanem Moses i go talem long Fero se: ‘Sipos yu no letem ol man blong mi oli go, Ijip bae i fulap long ol frog.’ Eron i leftemap stik blong hem, nao ol frog oli kamkamaot, oli kavremap evri ples long Ijip. Oli go insaed long haos blong ol man, bed blong olgeta, mo long ol plet blong olgeta tu. !Ol frog ya oli stap long evri ples! Nao Fero i talem long Moses blong plis long Jehova blong i stopem trabol ya. Fero i promes se bambae hem i letem ol man Isrel oli go. Ale Jehova i stopem panis ya, mo ol man Ijip oli hivimap ol frog long ol bigbigfala hip. Olgeta ples i sting nogud. Be bakegen, Fero i no wantem letem ol man Isrel oli go.

Nao Jehova i talem long Moses se: ‘Eron i mas kilim graon wetem stik blong hem, nao das bae i kam moskito.’ Wantaem nomo, ol moskito oli kam kavremap evri ples. Sam man blong Fero oli talem se: ‘Hemia wan panis we i kamaot long God.’ Nating se i olsem, Fero i no wantem letem ol man Isrel oli go.