Moses mo Eron tufala i go talemaot mesej blong God long Fero, se: ‘Sipos yu no letem ol man blong mi oli gofri, bae mi mekem ol bigfala flae oli kam kavremap kantri ya.’ Nao ol flae oli kam fulap long ol haos blong ol man Ijip, nating se oli rij o oli pua. Oli kam fulap long evri ples long Ijip, be long ples ya Gosen, we ol man Isrel oli stap long hem, i no gat flae. Stat long namba fo panis ya, ol man Ijip nomo oli kasem ol trabol. Ale Fero i talem se: ‘Yu askem long Jehova blong i tekemaot ol flae ya. Yufala i save gofri.’ Be taem Jehova i tekemaot ol flae ya, Fero i jenisim tingting blong hem. !Man, hem i no lanem wan samting!

Jehova i talem se: ‘Sipos Fero i no letem ol man blong mi oli go, ol anamol blong ol man Ijip bae oli sik mo oli ded.’ Long nekis dei, ol anamol oli stat blong sik mo ded. Be ol anamol blong ol man Isrel oli no ded. Nating se i olsem, Fero i stronghed yet, hem i no letem olgeta oli go.

Nao Jehova i talem long Moses blong i go luk Fero bakegen, mo i sakem asis faea i go antap. Ol asis ya oli flot long win, oli go kasem evri ples long Ijip. Nao ol man mo ol anamol long Ijip oli kasem ol bigbigfala boela. Be Fero i stronghed yet, hem i no wantem letem ol man Isrel oli gofri.

Nao Jehova i sanem Moses i go toktok long Fero bakegen, i se: ‘?Yu stronghed a? Yu no wantem letem ol man blong mi oli go. Ale tumora, bae mi mekem ol ston blong aes oli folfoldaon long yufala.’ Long nekis dei, Jehova i mekem tanda i faerap, laetning i laet, mo ol ston blong aes oli folfoldaon. I no gat wan samting olsem long Ijip bifo, we i spolem gud ol kakae long garen mo i brebrekem ol tri. Be samting ya i no hapen long ples ya Gosen. Nao Fero i talem se: ‘!Plis, yu askem long Jehova blong i blokem ol ston blong aes ya! Yufala i save go.’ Be taem ol ren mo ston blong aes i finis, Fero i jenisim tingting blong hem bakegen.

Nao Moses i talem se: ‘Ol lokis bae oli kam plante we plante, mo bae oli finisim ol kakae we ol ston blong aes i no spolem.’ Nao fulap lokis oli kam kakae evri samting we i stap yet long garen, mo ol lif blong ol tri. Fero i talem se: ‘Yu plis long Jehova blong i tekemaot ol lokis ya.’ Be afta we Jehova i stopem ol lokis, Fero i mekem stronghed yet.

Nao Jehova i talem long Moses se: ‘Yu leftemap han blong yu i go antap.’ Wantaem nomo, ol ples long Ijip oli kam tudak olgeta. Oli no save lukluk olgeta, oli stap nomo long haos blong olgeta, mo oli stap olsem kasem tri dei. Be long ples we ol man Isrel oli stap long hem, i gat delaet.

Nao Fero i talem long Moses se: ‘Yufala i go, be ol sipsip, mo ol nani, mo ol buluk blong yufala oli mas stap.’ Moses i talem se: ‘!Nogat! Mifala i mas tekem ol anamol tu, blong mifala i save mekem sakrefaes long God.’ Nao Fero i kros we i kros, i singaot strong long Moses se: ‘!Yu kamaot long ples ya! !Mi no wantem luk yu bakegen! Sipos mi luk yu, bae mi kilim yu yu ded.’

Moses i promes long Fero se bambae hem i no kam luk hem bakegen. Be bifo we hem i aot, hem i talem long Fero se: ‘Long medel naet, evri fasbon long Ijip bae oli ded, i stat long fasbon boe blong yu, i go kasem fasbon boe blong ol slef.’

Nao Jehova i talem long ol man Isrel blong oli mekem wan spesel kakae, i se: ‘Yufala i kilim wan man sipsip o man nani, we i gat wan yia nomo, mo yufala i mas putum sam blad blong hem long doa. Yufala i rusum mit blong hem, mo yufala i kakae wetem bred we i no gat is long hem. Yufala i putum klos mo sandel, blong yufala i rere blong wokbaot. Long naet ya, bae mi mekem yufala i kamfri.’ !Yu traem tingbaot olsem wanem ol man Isrel oli glad!

Long medel naet, enjel blong Jehova i pas long evri haos long Ijip. Long ol haos we i no gat blad long doa blong olgeta, fasbon i ded. Be enjel i pas ova long ol haos we i gat blad long doa blong olgeta. Evri famle long Ijip i lusum fasbon blong olgeta, nating se oli rij o oli pua. Be i no gat wan pikinini blong ol man Isrel we i ded.

Boe blong Fero tu i ded. Fero i harem se i naf nao. Wantaem nomo, hem i talem long Moses mo Eron se: ‘!Yutufala i aot long ples ya! Yufala i go mekem wosip long God blong yufala. !Mo yufala i tekem ol anamol blong yufala tu!’

Long naet ya we i gat fulmun, ol famle mo ol laen blong Isrel oli aot long Ijip. I gat 600,000 man wetem plante woman mo pikinini. Mo plante narafala man tu oli aot wetem olgeta, blong oli save go mekem wosip long Jehova. !Ol man Isrel oli fri!

Evri yia, bambae oli mekem wan spesel kakae we nem blong hem Pasova, blong tingbaot taem ya we Jehova i sevem olgeta.