Jehova i talem long Moses se: ‘Yu kam antap long hil ya, yu kam luk mi. Bae mi givim tu flat ston long yu we mi raetem ol loa long tufala.’ Ale Moses i go antap long hil ya bakegen, mo i stap 40 dei mo 40 naet long ples ya. Jehova i raetem Tenkomanmen long tu flat ston mo i givim long Moses.

Afta we plante dei i pas, ol man Isrel oli ting se Moses i ronwe long olgeta. Nao oli talem long Eron se: ‘!Yu wokem wan god blong i lidim mifala!’ Eron i talem se: ‘Yufala i givim ol gol blong yufala long mi.’ Nao hem i bonem gol ya gogo i ronaot, mo hem i wokem aedol blong wan smol buluk long gol ya. Nao ol man oli talem se: ‘!Hemia nao God blong mifala, we i tekemaot mifala long Ijip!’ Nao oli wosipim buluk ya mo oli mekem lafet. ?I stret we oli mekem olsem? Nogat. Oli promes finis blong mekem wosip long Jehova nomo. Be naoia oli brekem promes ya.

Jehova i luk samting we oli stap mekem, mo hem i talem long Moses se: ‘Yu gobak daon, yu luk ol man ya. Oli no obei long mi, oli stap bodaon long wan giaman god.’ Ale, Moses i karem tufala flat ston ya, mo i godaon long hil ya.

Taem Moses i kam klosap long ol man ya, hem i harem we oli stap singsing, mo i luk we oli stap danis, mo oli stap bodaon long buluk ya. Hem i kros we i kros, nao i sakem tufala ston ya i godaon long graon, mo tufala i brobrok long ol smosmol pis. Kwiktaem nomo hem i spolem buluk ya, mo i askem long Eron se: ‘?Ol man ya oli mekem wanem blong pulum yu blong mekem nogud samting ya?’ Eron i talem se: ‘Yu no kros long mi. Yu save olgeta finis. !Oli wantem wan god, ale mi sakem ol gol blong olgeta i go long faea, nao smol buluk ya i kamaot!’ Eron i mekem samting we i no stret. Moses i gobak antap long hil, mo i plis long Jehova blong i fogivim ol man ya.

Jehova i fogivim olgeta we oli wantem obei long hem. ?Yu luksave from wanem i impoten we oli folem Moses olsem lida blong olgeta?

Taem Moses i stap antap long hil ya Sinae, Jehova i talem long hem blong i mekem wan tabenakel, hemia wan spesel haos tapolen we ol man Isrel oli save yusum blong mekem wosip. Bambae oli karem haos tapolen ya i go long olgeta ples we oli go long hem.

Jehova i talem se: ‘Yu talem long ol man, blong oli givim samting we oli naf blong givim, blong wokem tabenakel ya.’ Ale, ol man Isrel oli givim gol, silva, kopa, ol sas ston, mo iaring blong olgeta. Mo tu, oli givim wul, linen, skin blong ol anamol, mo plante narafala samting. Oli givim tumas samting, nao Moses i talem long olgeta se: ‘Yufala i no moa givim samting. Yumi gat i naf nao.’

Plante man mo woman we oli gat gudhan blong wokem ol samting, oli givhan blong wokem haos tapolen. Jehova i givim waes long olgeta blong oli save mekem ol wok ya. Sam oli wokem ol tred, sam oli wivim kaliko, mo sam oli somap ol samting blong flasem. Sam narafala oli katem ol sas ston, mo oli wokem ol samting long gol, mo oli katem ol samting long wud.

Oli wokem tabenakel olsem we Jehova i talem. Oli wokem wan naes kaliko blong seraotem tabenakel long tu rum, hemia Rum we i Tabu mo Rum we i Tabu we i Tabu. Bokis blong kontrak i stap long Rum we i Tabu we i Tabu. Oli wokem bokis ya long wud ya kasis, mo oli kavremap long gol. Long Rum we i Tabu, i gat wan ples blong putum laet i stap, wan tebol, mo wan olta blong bonem insens. Long yad blong haos tapolen, i gat wan besin we oli wokem long bras, mo wan bigfala olta. Bokis blong kontrak i mekem ol man Isrel oli tingbaot promes we oli mekem blong obei long Jehova. ?Yu save se wan kontrak hem i wanem? Hem i wan spesel promes.

Jehova i jusum Eron mo ol boe blong hem blong oli mekem wok blong ol pris. Oli mas lukaot gud long tabenakel, mo mekem ol sakrefaes oli go long Jehova. Hae pris Eron nomo i save go insaed long Rum we i Tabu we i Tabu. Mo hem i mekem olsem wan taem nomo long wan yia, blong mekem sakrefaes from ol sin blong hem, famle blong hem, mo ful neson blong Isrel.

Wan yia afta we ol man Isrel oli lego Ijip, oli finisim tabenakel. Naoia oli gat wan ples we oli save yusum blong mekem wosip long Jehova.

Glori blong Jehova i kam fulap insaed long tabenakel, mo hem i mekem wan klaod i stap antap long hem. Taem klaod ya i stap antap long tabenakel, ol man Isrel oli no muvaot, be taem klaod i muv, oli save se oli mas muvaot. Ale, oli tektekemaot tabenakel, oli karem wetem olgeta, mo oli wokbaot folem klaod ya.