Ol man Isrel oli lego hil ya Sinae, oli pastru long draeples ya Paran, mo oli kasem wan ples we nem blong hem Kades. Nao Jehova i talem long Moses se: ‘Yu sanem 12 man, wan long evri laen, oli go spae long kantri ya Kenan, we bae mi givim long ol laen blong Isrel.’ Ale Moses i jusumaot 12 man, mo i talem long olgeta se: ‘Yufala i go lukluk kantri ya Kenan mo faenemaot sipos graon blong hem i gud blong planem kakae long hem. Yufala i traem luk sipos ol man oli strong o nogat, mo sipos ol man oli stap long ol haos tapolen o long ol taon.’ Ale ol 12 spae ya oli wokbaot i go long Kenan. Tu long olgeta, hemia Josua mo Keleb.

Afta we 40 dei i pas, ol spae oli kambak, mo oli karem ol fig, ol grenadin, mo ol grep. Oli talem se: ‘Graon i gud tumas, be ol man oli strong mo ol taon oli gat ol bigbigfala stonwol i goraon long olgeta.’ Be Keleb i talem se: ‘!Yumi naf blong winim olgeta! !Yumi go naoia!’ ?Yu save from wanem Keleb i talem olsem? From we hem mo Josua, tufala i trastem Jehova. Be ol 10 narafala spae oli talem se: ‘!Nogat! !Ol man ya oli bigbigfala man! !Yumi olsem grasopa nomo!’

Ol man Isrel oli harem nogud. Nao oli stat blong komplen, se: ‘!Yumi jusum wan narafala lida blong yumi! !Yumi gobak long Ijip! Sipos yumi go long Kenan, ol man bae oli kilim yumi evriwan i ded.’ Josua mo Keleb i talem se: ‘Yufala i no fraet. Yufala i obei long Jehova nao hem bae i lukaot gud long yumi.’ Be ol man Isrel oli no lesin. !Oli wantem kilim Josua mo Keleb i ded!

?Jehova i mekem wanem? Hem i talem long Moses se: ‘!Man! Mi mekem fulap samting blong givhan long ol man Isrel, be oli no wantem obei long mi yet. Taswe, bae oli stap 40 yia long draeples ya, gogo oli ded. Ol pikinini blong olgeta wetem Josua mo Keleb, olgeta nomo bae oli go long kantri ya we mi mi promes blong givim long olgeta.’

Taem ol man Isrel oli stap long draeples, Kora, Datan, mo Abiram, mo 250 narafala man oli agensem Moses. Oli talem long hem se: ‘!Mifala i taed finis long yutufala! ?From wanem i mas yu we i lida blong mifala mo Eron i hae pris? Jehova i stap wetem yumi evriwan, i no wetem yutufala nomo.’ Jehova i no glad long ol tok blong olgeta. !I olsem we ol man ya oli agensem hem stret!

Moses i talem long Kora mo ol man we oli sapotem hem se: ‘Tumora, yufala i tekem ol faea holda we yufala i bonem insens long olgeta, yufala i karem olgeta i kam long tabenakel. Nao Jehova bae i soemaot hu man we hem i jusumaot.’

Long nekis dei, Kora wetem ol 250 sapota blong hem oli kam mitim Moses long tabenakel. Long ples ya, oli bonem insens olsem se oli ol pris. Nao Jehova i talem long Moses mo Eron se: ‘Yutufala i kamaot long ol man ya.’

Datan mo Abiram mo ol famle blong olgeta oli no wantem go mitim Moses long tabenakel. Ale, Jehova i talem long ol man Isrel blong oli muv i go longwe long ol haos tapolen blong Kora, Datan, mo Abiram. Kwiktaem nomo, ol man Isrel oli gowe. Datan mo Abiram wetem ol famle blong tufala, oli stanap afsaed long haos tapolen blong olgeta. !Wantaem nomo, graon i brok, mo i open bigwan stret aninit long olgeta, nao oli foldaon i go long hol ya! Mo tu, Jehova i sanem faea i kamdaon blong bonem Kora wetem ol 250 man ya we oli stap long tabenakel.

Nao Jehova i talem long Moses se: ‘Yu tekem wan stik long lida blong evri laen, mo yu raetem nem blong hem long stik ya. Long stik blong laen blong Livae, yu raetem nem blong Eron. Nao yu putum ol stik ya insaed long tabenakel. Man we mi mi jusumaot, bae flaoa i gru long stik blong hem.’

Long nekis dei, Moses i karem ol stik ya oli kam afsaed blong soem long ol lida blong Isrel. Ol flaoa oli gru long stik blong Eron, mo i gat frut ya amon tu. Long fasin ya, Jehova i mekem ol man oli luksave se hem i jusumaot Eron olsem hae pris.