Taem tufala spae blong Isrel i go long Jeriko, tufala i go long haos blong wan woman we nem blong hem Rehab. Be king blong Jeriko i harem nius se tufala i kam, nao hem i sanem ol soldia blong hem oli go long haos blong Rehab. Be Rehab i haedem tufala spae ya long wan rum antap long ruf blong haos blong hem, mo i sanem ol soldia oli gobak long wan narafala rod. Nao hem i talem long tufala spae se: ‘Mi mi givhan long yutufala from we mi save se Jehova i stap faet long saed blong yufala, mo bae yufala i winim kantri ya. Plis, yutufala i mas promes long mi se bae yufala i sevem mi mo famle blong mi.’

Tufala spae ya i talem se: ‘Mitufala i promes se evriwan long haos blong yu bae oli stap sef.’ Mo tufala i talem se: ‘Yu mas hangem red rop ya long windo we yu slakem mitufala i godaon long hem, nao yu mo famle blong yu bae yufala i sef.’

Nao hem i slakem tufala i godaon long rop. Tufala i go haed long ol hil blong tri dei, mo afta, tufala i gobak long Josua. Nao ol man Isrel oli krosem Jodan Reva, mo oli mekem rere blong winim kantri ya. Jeriko nao i faswan taon we oli winim. Jehova i talem se oli mas maj i goraon long taon ya wan taem evri dei, gogo kasem sikis dei. Long namba seven dei, oli mas maj i goraon long taon ya seven taem. Nao ol pris oli blu long pupu blong olgeta, mo ol soldia oli singaot bigwan, nao bigfala stonwol blong taon ya i brobrok, i foldaon. Be haos blong Rehab nomo i stanap i stap. Hem mo famle blong hem oli sef from we hem i trastem Jehova.

Nius i goraon long Kenan se ol man Isrel oli winim Jeriko. Nao ol king blong Kenan oli wokem wan plan blong mekem faet agensem ol man Isrel. Be ol man Gibeon oli no joenem olgeta. Oli mekem wan defren plan. Oli werem ol klos we oli brobrok, oli kam luk Josua, mo oli talem se: ‘Mifala i kam long wan kantri we i longwe. Mifala i harem ol man oli tokbaot samting we Jehova i mekem blong givhan long yufala long Ijip mo Moab. Sipos yufala i promes se bae yufala i no mekem faet long mifala, bae mifala i kam man blong wok blong yufala.’

Josua i bilivim ol tok blong olgeta, mo i mekem promes se bambae oli no faet agensem olgeta. Be tri dei biaen, hem i faenemaot se ol man ya oli blong stap long Kenan nomo, oli no kam long wan narafala kantri. Ale Josua i askem long olgeta se: ‘?From wanem yufala i giaman?’ Oli ansa se: ‘!Mifala i fraet! Mifala i save se God blong yufala Jehova i stap faet long saed blong yufala. Plis, yu no kilim mifala i ded.’ Josua i holem promes blong hem, mo i letem olgeta oli stap laef.

Smoltaem biaen, faef king blong Kenan wetem ol soldia blong olgeta, oli kam blong faet agensem ol man Gibeon. Josua mo ol soldia blong hem oli wokbaot fulnaet blong go givhan long olgeta. Long nekis moning, oli faet agensem ol king blong Kenan, mo ol king ya wetem ol ami blong olgeta oli fraet, nao oli ronronwe. Mo Jehova i mekem ol bigbigfala ston blong aes oli folfoldaon long olgeta. Nao Josua i askem long Jehova blong i mekem se san i no muv, be i stap long sem ples nomo. ?From wanem Josua i askem long Jehova blong i mekem samting ya we i neva hapen bifo? From we Josua i trastem Jehova. Ale, san i no muv blong wan fuldei, go kasem we ol man Isrel oli winim ol king blong Kenan mo ol ami blong olgeta.