Josua i lidim ol man blong Jehova blong plante yia, nao taem hem i gat 110 yia, hem i ded. Taem Josua i laef, ol man Isrel oli gohed blong wosipim Jehova. Be taem Josua i ded, oli wosipim ol aedol, olsem ol man Kenan. Ale, Jehova i letem King Jabin blong Kenan i mekem i strong tumas long olgeta. Nao oli krae long Jehova blong i givhan long olgeta. Ale Jehova i givim wan niufala lida long olgeta, hemia Barak. Barak bambae i givhan long olgeta blong oli kambak long Jehova.

Woman profet ya Debora, i singaot Barak i kam, blong talem wan mesej blong Jehova long hem, i se: ‘Yu tekem 10,000 man, mo yu go mitim Jabin mo ol ami blong hem long smol reva blong Kison. Long ples ya, bae yu winim Siseraha we i komanda blong ol ami blong Jabin.’ Barak i talem long Debora se: ‘Sipos yu kam wetem mi, bae mi go.’ Debora i talem se: ‘Bae mi kam wetem yu. Be yu mas save se i no yu we bae yu kilim Siseraha i ded. Jehova bae i putum hem long han blong wan woman.’

Ale, Debora i go wetem Barak mo ol ami blong hem, oli go antap long hil ya Taboro mo mekem rere blong faet. Taem Siseraha i harem nius ya, hem i singaot ol soldia oli kam long levelples long medel blong ol hil, wetem ol kat blong faet blong olgeta. Nao Debora i talem long Barak se: ‘Tede Jehova bae i mekem yu yu win.’ Ale Barak mo ol 10,000 soldia blong hem oli aot long hil ya, oli kamdaon blong faet agensem ol strong ami blong Siseraha.

Nao Jehova i mekem se smol reva blong Kison i ron bigwan, mo ol kat blong faet blong Siseraha oli fas long sofmad. !Barak mo ol soldia blong hem oli winim ol ami blong Siseraha, be Siseraha i ronwe, i go haed long haos tapolen blong woman ya Jael! Jael i givim melek long hem blong i dring, mo i kavremap hem long wan blangket. Siseraha i taed we taedgud, ale hem i slip. Nao Jael i tekem wan sap stik we i blong holemtaet haos tapolen, mo wan hama. Sloslo hem i go klosap long Siseraha, i hamarem sap stik ya i gotru long hed blong hem, nao Siseraha i ded.

Barak i go lukaotem Siseraha. Jael i kam afsaed long haos tapolen, i talem long Barak se: ‘Yu kam, bae mi soem man ya we yu stap lukaotem.’ Barak i go insaed mo i luk Siseraha i stap slip we i ded finis. Barak mo Debora i singsing blong presem Jehova, from we hem i mekem ol man Isrel oli winim ol enemi blong olgeta. Nao i gat pis long Isrel blong 40 yia.

Taem kakae i sot long Isrel, Naomi, man blong hem, mo tufala boe blong tufala, oli go long Moab. Biaen, man blong Naomi i ded. Tufala boe ya i mared long tu woman Moab, Rut mo Opa. Be sore tumas, tufala boe ya tu i ded.

Taem Naomi i harem nius se i gat kakae bakegen long Isrel, hem i wantem gobak. Rut mo Opa i wokbaot wetem hem, be long hafrod, Naomi i talem se: ‘Yutufala i bin soemaot lav long mi mo long tufala hasban blong yutufala. Mi wantem se yutufala i mared bakegen. Yutufala i gobak long Moab.’ Rut mo Opa i talem se: ‘!Mitufala i lavem yu! Mitufala i no save lego yu.’ Naomi i talem bakegen se tufala i mas gobak. Ale, Opa i gobak, be Rut i stap. Nao Naomi i talem long Rut se: ‘!Yu luk! Opa i gobak long famle blong hem mo ol god blong hem. Yu folem hem mo gobak long mama blong yu.’ Be Rut i talem se: ‘Mi no save lego yu. Ol man ples blong yu bae oli man ples blong mi, mo God blong yu bae i God blong mi.’ ?Yu ting se Naomi i harem gud?

Rut mo Naomi i kasem Isrel long stret taem blong tekemaot bale long garen. Wan dei, Rut i go wok long garen blong Boas, pikinini blong Rehab, blong pikimap ol bale we ol man blong wok oli lego i stap. Boas i harem oli talem se Rut i blong Moab, mo i stap lukaot gud long Naomi. Nao hem i talem long ol man blong wok blong oli livim sam moa bale i stap, blong Rut i pikimap.

Taem Rut i gobak long haos long sapa, Naomi i askem se: ‘?Tede yu wok long garen blong hu?’ Rut i talem se: ‘Garen blong Boas.’ Nomi i talem se: ‘Boas i wan famle blong man blong mi. I moagud yu gohed blong wok long garen blong hem. Bae yu sef long ples ya.’

Ale, Rut i mekem olsem. Boas i luk se Rut i wok had mo i wan gudfala woman. Bifo, sipos wan man i ded be i no gat wan boe blong hem, woman blong hem i mas mared bakegen long wan famle blong man ya. Ale, Rut i mared long Boas, mo tufala i gat wan pikinini boe, nem blong hem Obed. Biaen, Obed i gat wan boe we i kam papa blong King Deved. Ol fren blong Naomi oli glad, oli talem se: ‘Fastaem Jehova i givim Rut long yu, we i mekem i gud tumas long yu. Mo naoia yu gat wan smol bubu. Yumi presem Jehova.’