Refrens Blong Kristin Wok Mo Laef Miting Wokbuk
© 2025 Watch Tower Bible and Tract Society of Pennsylvania
3-9 NOVEMBA
OL SAS SAMTING LONG BAEBOL SING BLONG SOLOMON 1-2
Wan Stori We i Tokbaot Tru Lav
?Yu Save Gat Lav We i No Jenis?
9 Man mo woman we tufala i wosipim Jehova, tufala i no tingbaot mared olsem wan kontrak nomo we tufala i saenem. Tufala i lavlavem tufala mo tufala i soemaot samting ya. ?Be tufala i mas gat wanem kaen lav? Tufala i mas gat lav ya we Baebol i tokbaot, we man i tingbaot narafala fastaem long hem wan. (1 Jon 4:8) Mo tufala i mas gat lav ya we i stap insaed long famle, mo lav we ol gudfala fren oli gat. (Jon 11:3) Mo tufala i mas gat lav blong man wetem woman. (Ol Proveb 5:15-20) Yes, tufala i mas gat olgeta kaen lav ya evriwan. Ol samting we man i mekem mo i talem long woman i save mekem hem i sua se man ya i lavem hem mo i hapi. Sem mak long ol samting we woman i mekem mo talem long man. I impoten we tufala i talemaot se tufala i lavlavem tufala, nomata se tufala i bisi tumas. Long sam kantri, famle nomo i jusum boe no gel we pikinini blong olgeta bambae i mared long hem. Maet long dei blong mared nomo, i fastaem we tufala i toktok long tufala. Be taem tufala i save tufala moa, nao tufala i lavlavem tufala, tufala i mas talemaot filing blong tufala. Olsem nao, bambae tufala i fren moa, nao mared blong tufala bambae i stanap strong.
10 Ol tok blong lav i save mekem wan narafala samting tu, blong mared i stap strong. Long sing ya, King Solomon i wantem givim ol presen long gel ya, olsem ‘wan gol jen, we oli flasem long ol bidbid we oli wokem long silva.’ Hem i talem ol gudfala toktok long gel ya se, “hem i naes we i naes, mo fes blong hem i saen we i saen, olsem san mo mun.” (Sing blong Solomon 1:9-11; 6:10) Be gel ya i faenem finis boe we hem i lavem tru. ?Wanem i givhan long hem blong i stap tru long boe we i lukaot long sipsip? Taem boe ya i stap longwe long hem, ?wanem i mekem gel ya i harem gud? (Ridim Sing blong Solomon 1:2, 3.) Hem i tingbaot ol tok blong lav we boe ya i talem long hem finis. Long tingting blong hem, ol tok ya “i swit moa i winim waen.” Taem hem i stap long haos blong king, nao hem i tingbaot ol tok ya, hem i harem gud olsem we man i putum gudfala “senta” long hed blong hem. (Ol Sam 23:5; 104:15) Man mo woman we i mared, tufala i mas talem ol tok blong lav oltaem long tufala, hemia bambae i mekem se tufala i lavlavem tufala moa. Nao taem tufala i tingtingbak long ol tok ya, samting ya bambae i mekem se lav i stap strong.
Ol Gudgudfala Samting
?Yu Save Gat Lav We i No Jenis?
11 Sipos yu yu wantem mared, yu save lanem samting long stori blong gel Sulam ya. Hem i no gat filing nating long King Solomon. Hem i talem stret long ol woman long haos blong king se bambae oli no wekemap filing blong hem “we i no taem blong hem yet.” (Sing blong Solomon 2:7, futnot BLB; 3:5) Taswe, ?i stret blong frenem enikaen man no woman? Nogat. I waes blong wet gogo yu faenem man no woman we yu save lavem hem tru.
10-16 NOVEMBA
OL SAS SAMTING LONG BAEBOL SING BLONG SOLOMON 3-5
Gudfala Fasin i Moa Impoten
?Yu Save Gat Lav We i No Jenis?
8 Tufala i talem ol gudfala toktok from naes fes mo bodi blong tufala, be i no hemia nomo. Boe ya i lavem gel ya from we ol toktok blong hem tu oli kaen. (Ridim Sing blong Solomon 4:7, 11.) Hem i talem se: “Daling, maot blong yu i swit olsem hani, mo tang blong yu i swit olsem melek wetem hani.” Long tingting blong hem, ol tok blong gel ya i swit mo i gud olsem melek wetem hani. Boe ya i talem tu se gel ya i “naes tumas” mo “i no gat wan mak nating” long hem. Be hem i no stap tokbaot bodi blong gel ya nomo, hem i minim ol nambawan fasin blong hem tu.
Tingting Blong God Long Saed Blong Fasin Klin
17 Namba tri eksampol blong fasin blong holemstrong long klin fasin, hem i wan gel Sulam. Gel ya i yang mo i gat naesfala bodi. Wan yangfala man blong lukaot long ol sipsip i laekem hem, mo Solomon, king blong Isrel we i rij tumas, i laekem hem tu. Naesfala stori blong hem, we yumi faenem long Sing blong Solomon, i soem se gel Sulam ya i gat klin fasin oltaem. From samting ya hem i kasem respek long olgeta we oli stap raonabaot long hem. Nating se gel ya i no wantem Solomon, God i pulum Solomon blong raetemdaon stori blong hem. Yangfala man we i lukaot long ol sipsip, we gel ya i laekem tumas, hem tu i gat respek long klin fasin blong gel ya. Wan taem hem i bin talem se gel Sulam ya i olsem wan garen we “stonwol i goraon long hem.” (Sing Blong Solomon 4:12) Long Isrel bifo, ol naesfala garen oli fulap long ol defren kaen ligim, ol flaoa we oli smel gud, mo ol bigfala tri. Raon long ol garen ya i gat wan stonwol no wan fenis blong ol smosmol tri. Blong go insaed, man i mas pastru long wan get we i gat lok long hem. (Aesea 5:5) Long tingting blong yangfala man ya, klin fasin mo naesfala fasin blong gel Sulam i olsem naesfala garen ya we i no gat plante olsem. Fasin blong gel ya i klin olgeta. Ol filing blong lav we hem i gat, bambae hem i soem nomo long man we bambae i hasban blong hem.
g04 12/22 9 ¶2-5
Gudfala Fasin i Mekem Man i Naes Moa
?I tru se gudfala fasin blong wan man i save pulum narafala blong laekem hem? Georgina we i bin mared blong ten yia finis, i talem se: “Long ol ten yia ya, mi kam klosap moa long hasban blong mi from we hem i tok tru mo i no haedem wan samting long mi. Samting we i moa impoten long laef blong hem, hemia blong mekem God i glad. Hemia i mekem se hem i kaen mo i gat lav. Oltaem hem i askem tingting blong mi taem hem i wantem mekem wan desisen, mo hemia i mekem mi haremsave se hem i tinghae long mi. Mi save se hem i rili lavem mi.”
Daniel we i bin mared long 1987, i talem se: “Mi luk se waef blong mi i naes tumas. Be samting we i mekem se mi lavem hem moa, hemia ol gudfala fasin we hem i gat. Oltaem hem i tingbaot ol narafala mo i lukaot rod blong givhan long olgeta blong oli harem gud. Mo hem i gat ol gudfala Kristin fasin. Hemia i mekem se mi harem gud tumas blong stap wetem hem.”
Wol ya i pulum ol man blong tingbaot se oli mas gat naes bodi mo fes. Be blong mekem olsem i no isi o i no posibol, mo i no gat gudfala samting i save kamaot from. Nating se i olsem, i posibol blong yumi kam naes moa sipos yumi wokem ol gudfala fasin. Baebol i talem se: “Naesfala fasin i save trikim man, mo samting we i mekem man i luk naes i no save stap longtaem, be woman we i fraet long Jehova, ol man bambae oli leftemap hem.” Mo hem i givim woning ya tu se: “Woman we fes blong hem i naes, be i sakemaot ol gudfala tingting, hem i olsem gol ring long nus blong wan pig.”—Ol Proveb 11:22; 31:30.
Tok blong God i halpem yumi blong luksave se ‘ol samting we oli stap long hat blong yumi oli flasem yumi, i mekem se yumi gat pis, yumi kwaet man, mo God i tinghae tumas long ol fasin olsem we oli no save kam nogud samtaem.’ (1 Pita 3:4) Yes, ol gudfala fasin we man i gat, oli moa impoten i bitim naesfala bodi mo fes. Mo evri man oli save gat ol gudfala fasin olsem.
Ol Gudgudfala Samting
Ol Bigfala Poen Long Sing Blong Solomon
2:7; 3:5—?From wanem ol woman we oli stap long haos Blong Solomon oli mekem strong promes “long nem blong ol anamol ya dia mo gudfala anamol ya gasel”? Plante man i save ol dia mo gasel from fasin blong olgeta blong ron mo jamjam. I naes tumas blong wajem olgeta. Taswe, yangfala gel blong Sulam i stap askem ol woman ya blong oli mekem strong promes ya long nem blong ol samting we oli naes tumas, blong oli no traem wekemap filing blong lav long hem.
17-23 NOVEMBA
OL SAS SAMTING LONG BAEBOL SING BLONG SOLOMON 6-8
Kam Olsem Wan Wol, Be i No Wan Doa
?Yu Save Gat Lav We i No Jenis?
15 Ridim Sing blong Solomon 4:12. ?From wanem boe blong lukaot long sipsip i talem se gel Sulam i olsem ‘ples blong spel we stonwol i goraon long hem’? Wan ples blong spel we stonwol i blokem i no open long enikaen man nomo. Gel ya i olsem ples blong spel ya, from we hem i lavem boe ya nomo we i lukaot long sipsip. Tufala i gat tingting finis blong mared, taswe hem i no letem king i pulum hem. Mo hem i no jenisim tingting blong hem. Hem i no olsem “doa” we i isi nomo blong openem, be hem i olsem “stonwol.” (Sing blong Solomon 8:8-10) Long sem fasin, tu Kristin we tufala i mekem plan finis blong mared, tufala i mas stap tru long tufala. Tufala i no mas gat filing long wan narafala bakegen.
16 Taem boe blong lukaot long sipsip i wantem tekem gel ya i go wokbaot smol, ol brata blong gel ya oli no letem hem. Oli sanem hem i go gad long plantesen blong grep. ?From wanem? ?Oli no trastem hem? ?Oli ting se tufala i wantem mekem rabis fasin? Nogat. Oli wantem protektem sista blong olgeta. Oli no wantem se tufala i stap long wan ples we filing i save pulum tufala blong mekem samting we i no stret. (Sing blong Solomon 1:6; 2:10-15) Sipos yu yu stap frenem wan boe no gel, ?olsem wanem blong blokem ol samting we oli save pulum yutufala blong mekem rabis fasin? Yutufala i mas mekem desisen fastaem long ol fasin we bambae yutufala i blokem. Yutufala i no mas stap yutufala nomo, long wan ples we narafala i no save luk yutufala. Mo yutufala i mas soemaot filing long fasin we i klin.
?Olsem Wanem Long Fasin Blong Slip Tugeta Bifo Mared?
Klin fasin i no jes blokem trabol long laef blong yangfala, be i karem ol narafala gudfala frut tu. Baebol i tokbaot wan gel we i stap klin, nating se hem i laekem tumas boefren blong hem. From samting ya, hem i save tok flas se: “Mi mi wan stonwol ya, mo tufala titi blong mi i olsem tufala wajhaos blong hem.” Hem i no olsem wan “doa” we i isi blong ‘openem,’ hemia se, man i save pulum hem isi nomo blong mekem rabis fasin. !Long ol fasin blong hem, gel ya i olsem wan stonwol we man i no save klaem i go antap long ol wajhaos blong hem! I stret nomo we boefren blong hem i talem se hem i ‘klin.’ Gel ya i tokbaot boe we bambae i mared long hem, i se: “Man blong mi i save we hem nomo i stap mekem mi mi harem gud, mi stap long pis.” Kwaet tingting blong gel ya i mekem se tufala tugeta i harem gud tumas.—Sing blong Solomon 6:9, 10; 8:9, 10.
yp2 33
Folem Eksampol Blong Gel Sulam
Yangfala gel Sulam i save se hem i mas gohed blong gat klia tingting long ol filing blong hem long saed blong lav. Taswe, hem i talem long ol fren blong hem se: “Plis yufala i mekem wan strong promes long mi se: Bambae yufala i no mas pulum mo wekemap filing blong lav long mi, bifo we mi mi wantem.” Gel Sulam ya i save se ol filing oli save blokem hem blong i no yusum gud tingting. Hem i luksave se ol narafala oli save pulum hem blong i laekem wan man we i no stret long hem. Mo se ol filing blong hem oli save blokem hem blong i no skelem gud samting. Hemia nao from wanem gel Sulam ya i naf blong stanap strong olsem “wan wol.”—Sing Blong Solomon 8:4, 10.
?Yu yu gat klia tingting olsem gel Sulam ya long saed blong lav? ?Yu stap yusum gud tingting blong yu i bitim we yu folem wanem we hat blong yu i wantem? (Ol Proveb 2:10, 11) Samtaem ol narafala oli save pulum yu blong fren, nating se yu no rere yet blong fren. Mo samtaem, ol filing blong yu nomo oli save pulum yu. Eksampol, taem yu luk wan boe mo wan gel oli holem han mo wokbaot tugeta, ?yu harem se yu tu yu wantem tumas blong fren? ?Bambae yu frenem wan man we i no gat sem bilif olsem yu? Tingbaot se gel Sulam ya i soemaot se hem i gat klia tingting long ol filing blong hem long saed blong lav. !Yu tu yu save mekem sem mak!
Ol Gudgudfala Samting
?Yu Save Gat Lav We i No Jenis?
3 Ridim Sing blong Solomon 8:6. Vas ya i talem se lav i olsem ‘faea we i stap bon strong tumas, i red we i red.’ Sam narafala Baebol oli talem se “faea blong Ja.” ?From wanem oli talem olsem? From we nambawan fasin blong Jehova, hemia lav. Mo hem i mekem yumi, we yumi naf blong folem fasin blong hem. (Jenesis 1:26, 27) Afta we Jehova i mekem fas man ya Adam, hem i givim wan naesfala woman long hem. Fastaem we Adam i luk Iv, hem i glad we i glad, nao i harem se hem i mas talemaot filing blong hem. Iv tu i laekem tumas man blong hem. Hemia i stret nomo, from we Jehova i yusum wan haf blong bodi blong Adam blong wokem Iv. (Jenesis 2:21-23) Stat long taem ya nao, Jehova i mekem rod blong man mo woman, tufala i save gat lav we i tru blong olwe.
24-30 NOVEMBA
OL SAS SAMTING LONG BAEBOL AESEA 1-2
Olgeta We ‘Sin Blong Olgeta i Olsem Wan Hevi Samting’ Oli Gat Hop
ip-1 14 ¶8
Wan Papa Mo Ol Boe Blong Hem We Oli Rebel
8 Aesea i gohed blong talemaot mesej blong hem, mo i yusum ol strong tok blong talem long nesen blong Juda se: “!Sore tumas long kantri ya! Ol man blong hem oli man blong mekem sin, ol sin blong olgeta i olsem wan hevi samting long solda blong olgeta, oli ol pikinini blong ol man nogud, oli olsem ol pikinini we fasin blong olgeta i nogud we i nogud. Oli lego Jehova finis, oli mekem ol samting we i soemaot se oli no respektem Tabu God Blong Isrel, yes, oli tanem baksaed finis long hem.” (Aesea 1:4) Ol nogud samting we man i mekem, oli save kam plante go kasem mak ya we oli kam hevi we hevi. Long taem blong Ebraham, Jehova i tokbaot sin blong ol man Sodom mo Gomora se “i bigwan” o i hevi tumas. (Jenesis 18:20) Mo hemia nao samting we i hapen long ol man Juda, from we Aesea i talem se “ol sin blong olgeta i olsem wan hevi samting.” Mo tu, hem i talem se “oli ol pikinini blong ol man nogud, oli olsem ol pikinini we fasin blong olgeta i nogud we i nogud.” Yes, ol man Juda oli olsem ol pikinini we oli stap mekem ol nogud samting. Oli “tanem baksaed finis,” o olsem we Baebol Long Bislama i talem, oli “gowe” finis long Papa blong olgeta.
ip-1 28-29 ¶15-17
“Yumi Toktok Gud Wanples Blong Stretem Ol Samting Ya”
15 Naoia Jehova i toktok long wan fasin we i soem se hem i kaen mo i gat sore. “Jehova i talem se: ‘Yufala i kam, naoia i gud yumi toktok gud wanples blong stretem ol samting ya, nating se ol sin blong yufala oli olsem kala we i laet red, be bambae oli kam waet olsem sno. Mo nating se oli red olsem kaliko we i dak red, be bambae oli kam olsem wul we i waet we i waet.’” (Aesea 1:18) Tok we Jehova i talem long stat blong vas ya, i wan invetesen we hem i mekem i go long ol man blong hem. Be plante taem ol man oli gat rong tingting long saed blong invetesen ya. Eksampol, Baebol Long Bislama i talem se “I gud yumi stretem bisnes ya naoia,” hemia i save givim tingting ya se, tu man i stap agiu blong stretem wan samting. !Be hemia i no stret mining blong hem! Jehova i no save mekem wan samting we i no stret, antap moa taem hem i stretem ol man we oli rebel o we oli gat tu fes. (Dutronome 32:4, 5) Vas ya i no stap tokbaot se tu man i storian long saed blong samting we oli mas mekem blong stretem wan bisnes, be hem i wan miting blong mekem se i gat jastis, i olsem we Jehova i putum ol man Isrel long kot.
16 Maet hemia i save mekem yu yu fraet, be Jehova i wan Jaj we i gat sore mo i kaen. Mo fasin blong hem blong fogif i bigwan we i bigwan. (Ol Sam 86:5) Hem nomo i naf blong tekemaot sin blong ol man Isrel “we i laet red” mo i mekem i kam “waet olsem sno.” Nating se wan man i traehad, i mekem ol sakrefaes, o i prea, be hemia i no naf blong tekemaot sin ya we hem i mekem. Fasin blong Jehova blong fogif, hemia nomo i save tekemaot sin we man i mekem. Be blong God i fogivim wan man, man ya i mas soemaot se hem i rili tanem tingting blong hem.
17 Hemia i wan impoten trutok, taswe Jehova i ripitim bakegen long wan stael blong poem: ol sin we oli “dak red” bambae oli kam olsem wan niufala waet wul we i waet we i waet. Jehova i wantem yumi save se hem nao i beswan Man Blong Fogif, mo hem i save fogivim ol bigfala sin blong yumi, sipos hem i luk se yumi rili tanem tingting. Olgeta we oli harem se i had blong bilivim se Jehova i save fogivim olgeta, i gud oli tingbaot eksampol blong Manase. Blong plante yia, Manase i stap mekem ol nogud samting. Be taem hem i tanem tingting blong hem, Jehova i fogivim hem. (2 Kronikel 33:9-16) Jehova i wantem we yumi evriwan i save se i no let yet blong yumi “stretem ol samting ya” wetem hem, mo hemia i minim tu olgeta ya we oli bin mekem ol bigfala sin.
Ol Gudgudfala Samting
ip-1 39 ¶9
Haos Blong Jehova i Kam Hae Moa
9 Tede ol man blong God oli no moa stap joen wanples antap long wan bigfala hil we i gat wan tempol we oli wokem long ston. Tempol ya blong Jehova we i stap long Jerusalem, ami blong Rom i bin distroem long yia 70 K.T. Mo aposol Pol i makem klia se tempol long Jerusalem mo tabenakel we i bin stap bifo, tufala i representem wan samting we i bigwan moa, “tent ya we i tru, we Jehova nomo i stanemap, i no man.” (Hibru 8:2) Tempol ya long saed blong spirit, hem i wan arenjmen we Jehova i stanemap tru long ransom sakrefaes blong Jisas, blong ol man oli save wosipim hem. (Hibru 9:2-10, 23) Taswe “bigfala hil blong haos blong Jehova” we Aesea 2:2 i tokbaot, i representem tru wosip blong Jehova we i kam hae moa long taem blong yumi. Ol man we oli joen long tru wosip oli joen gud blong wosipim Jehova, be oli no joen wanples antap long wan bigfala hil.
1-7 DISEMBA
OL SAS SAMTING LONG BAEBOL AESEA 3-5
I Stret Nomo We Yumi Obei Long Jehova
ip-1 73-74 ¶3-5
Sore Tumas Long Plantesen Blong Grep We i No Karem Gudfala Frut
3 Yumi no save stret sipos Aesea i singim parabol ya long ol man we oli stap lesin long hem o nogat, be i klia se parabol ya i pulum tingting blong olgeta. Bighaf blong ol man oli save gud wok ya blong planem plantesen blong grep, mo oli kasemsave gud long samting we Aesea i stap tokbaot. Olsem ol man blong planem grep tede, wan man we i gat plantesen blong grep bambae i no planem sid blong grep. Be bambae hem i go katem rop blong wan narafala grep o i tekem sut blong hem, we frut blong hem i red mo i helti. Mo bambae hem i kam planem “long saed blong wan hil, we graon blong hem i nambawan” blong i gru gud mo i karem gudfala frut.
4 I no isi blong lukaot gud long wan plantesen blong grep. Aesea i tokbaot wan ona blong plantesen blong grep, se ‘hem i digim graon mo i tekemaot ol ston long hem.’ !Hemia i tekem taem mo i no wan isi wok! Maet ol bigfala ston we hem i digimaot, hem i yusum blong “bildim wan taoa.” Long taem bifo, oli yusum ol taoa ya olsem ples blong ol wajman oli gad long ol rop blong grep, blong i no gat ol stilman o ol wael animol oli kam long hem. Mo tu, bambae hem i wokem ol stonwol blong mekem ol step long plantesen blong grep. (Aesea 5:5) Hemia i givhan blong protektem ol graon blong grep blong ren i no wasemaot olgeta.
5 Ona ya i wok had blong protektem plantesen blong grep blong hem, mo i stret nomo we hem i gat tingting ya se grep ya bambae i karem gudfala frut. From samting ya, hem i digim hol long ston blong mekem wan ples blong mekem waen. ?Olsem wanem? ?Samting we hem i stap tingbaot i kamtru? Nogat. Taem grep ya i karem frut, hem i karem ol wael grep nomo.
ip-1 76 ¶8-9
Sore Tumas Long Plantesen Blong Grep We i No Karem Gudfala Frut
8 Jehova nao i ona blong plantesen blong grep ya, mo Aesea i singaot Hem se “man we mi lavem hem tumas.” (Aesea 5:1) Toktok blong Aesea i soemaot se hem i fren gud wetem Jehova. (Skelem wetem Job 29:4; Ol Sam 25:14.) Nating se i olsem, lav ya we profet Aesea i gat long God, i no sem mak long lav ya we God i gat long “plantesen blong grep” blong hem, hemia nesen ya we hem i “planem.”—Skelem wetem Eksodas 15:17; Ol Sam 80:8, 9.
9 Jehova i “planem” nesen blong hem long kantri ya Kenan, mo hem i protektem olgeta olsem wan wol taem hem i givim ol loa mo ol rul long olgeta, blong ol nara nesen oli no spolem olgeta. (Eksodas 19:5, 6; Ol Sam 147:19, 20; Efesas 2:14) Antap long hemia, Jehova i givim ol jaj, ol pris, mo ol profet blong tijim olgeta. (2 King 17:13; Malakae 2:7; Ol Wok 13:20) Taem ol nara nesen oli kam blong faet agensem ol man Isrel, Jehova i sevem olgeta. (Hibru 11:32, 33) Hemia nao from wanem Jehova i askem se: “?I gat wan samting i stap yet we mi save mekem long plantesen blong grep blong mi, wan samting we mi no bin mekem yet?”
w06 6/15 18 ¶1
“Yu Lukaot Gud Long Rop Blong Grep Ya”
Aesea i talem se “ol laen blong Isrel” oli olsem wan plantesen blong grep we taem i karem frut, hem i “karem ol wael grep nomo.” (Aesea 5:2, 7) Frut blong wael grep i smol moa bitim frut blong grep we man i planem, mo i no gat tumas kakae from we i gat plante sid. Ol man oli no stap kakae frut blong wael grep o yusum blong mekem waen, hemia i pijarem gud nesen ya we i no moa mekem ol gudfala fasin, be i tanem baksaed long Jehova mo i stap brekem loa. Jehova nao i planem ol rop blong grep ya, mo i no fol blong hem we i mekem se oli no karem gudfala frut, from we hem i mekem evri samting finis blong givhan long nesen ya blong i karem gudfala frut. Taswe hem i askem se: “?I gat wan samting i stap yet we mi save mekem long plantesen blong grep blong mi, wan samting we mi no bin mekem yet?”—Aesea 5:4.
w06 6/15 18 ¶2
“Yu Lukaot Gud Long Rop Blong Grep Ya”
From we rop blong grep, hemia Isrel, i no karem gudfala frut, Jehova i givim woning se bambae hem i brekemdaon ol stonwol we hem i bin bildim i goraon long ol man blong hem. Bambae hem i no moa katem ol gru blong ol grep ya blong klinim o katem graon raon long olgeta. Bambae i no gat ren, mo ol tri we oli gat nil mo ol rabis gras bambae oli kavremap plantesen blong grep ya.—Aesea 5:5, 6.
Ol Gudgudfala Samting
ip-1 80 ¶18-19
Sore Tumas Long Plantesen Blong Grep We i No Karem Gudfala Frut
18 Long Isrel bifo, olgeta graon oli blong Jehova. Wanwan famle i kasem wan graon we God nao i givim long olgeta, mo oli gat raet blong mekem man i rentem o givim olsem lon, be bambae oli neva “salemaot graon i go blong olwe.” (Levitikas 25:23) Loa ya i givhan blong blokem fasin ya we sam man nomo oli gat graon. Mo tu, i protektem ol famle blong oli no kam pua bitim mak. Be i gat sam man Juda we oli griri mo oli no stap obei long loa blong God long saed blong graon. Maeka i raetem se: “Oli wantem ol garen nao oli go tekem i blong olgeta, oli wantem ol haos tu, mo oli tekem olgeta. Oli trikim man nao oli tekemaot haos blong hem, yes, oli karemaot samting we man i kasem long papa blong hem.” (Maeka 2:2) Be Ol Proveb 20:21 i givim woning ya se: “Nating se fastaem wan man i kasem ol gudfala samting from hem i griri, be long en bambae hem i no kasem blesing.”
19 Jehova i promes blong tekemaot ol rij samting we ol man we oli griri oli kasem long rod we i no stret. Ol haos we oli tekem long fasin we i no stret “bambae i no gat man i laef long olgeta.” Ol graon ya we oli stap wantem tumas, bambae oli no save givim plante kakae. Baebol i no talem stret wetaem o olsem wanem panis ya bambae i hapen. Be i tokbaot nomo ol trabol we bambae oli kamaot taem ol man Isrel oli go kalabus long Babilon.—Aesea 27:10.
8-14 DISEMBA
OL SAS SAMTING LONG BAEBOL AESEA 6-8
“!Mi Ya! !Yu Sanem Mi!”
Sipos Yu Talem Se ‘Yes’, Yu Mas Talem ‘Yes’ Nomo
10 “!Mi ya, mi save go! !Yu sanem mi!” (Aes. 6:8) Bifo we Aesea i talem tok ya, hem i luk wan vison mo long vison ya Jehova i stap sidaon long bigfala jea blong hem antap long tempol blong Isrel. Nao Aesea i harem Jehova i talem se: “?Bambae mi mi sanem hu? ?Hu bambae i go talemaot tok blong mifala?” Jehova i wantem se wan man i go talemaot tok blong hem long ol man blong hem we oli no moa obei long hem. Taem Aesea i talem se: “!Mi ya, mi save go! !Yu sanem mi!” i olsem we hem i stap talem se: “Yes, mi bambae mi go blong mekem wok ya we yu givim long mi.” Nao Aesea i soemaot se taem hem i talem “Yes” hem i minim Yes. Hem i mekem samting ya taem hem i talemaot ol profet tok blong God, 46 yia. Hem i talemaot se God bambae i panisim ol stronghed man blong hem, mo biaen bambae i karem olgeta oli kambak long ples ya blong oli mekem wosip long hem.
ip-1 95 ¶15-16
Jehova i Stap Long Holi Tempol Blong Hem
15 Biaen, Jehova i tokbaot samting we Aesea i mas talemaot mo ol fasin we ol man Jiu bambae oli gat taem oli harem ol tok ya. Jehova i talem se: “Yu go mo yu talem long ol man ya se: ‘Bambae yufala i harem bakegen mo bakegen, be bambae yufala i no kasem save, bambae yufala i lukluk bakegen mo bakegen, be bambae yufala i no gat save nating.’ Yu mekem hat blong ol man ya i kam strong, yu mekem olgeta oli no obei long samting we oli harem long sora blong olgeta, mo yu mekem ae blong olgeta i sat, olsem we oli putum glu long hem, blong oli no save lukluk wetem ae blong olgeta, mo oli no save harem samting long sora blong olgeta, blong hat blong olgeta i no naf blong kasemsave samting mo blong oli no kambak mo mi hilim olgeta.” (Aesea 6:9, 10) ?Olsem wanem? ?Hemia i minim se Aesea i mas tok nogud long ol man Jiu long fasin we i no kaen mo mekem se oli go longwe long Jehova? Nogat. Ol man ya oli ol manples blong Aesea mo hem i sore long olgeta. Taswe ol tok we Jehova i talem, i blong makem fasin we ol man Jiu bambae oli gat, nating se Aesea i traehad blong mekem gud wok blong hem.
16 Aesea i toktok long olgeta “bakegen mo bakegen” be bambae oli no akseptem ol tok blong hem. I fol blong olgeta nomo. Bighaf blong olgeta bambae oli stronghed mo oli no wantem lesin, hemia i olsem we oli blaen mo sora blong olgeta i fas. Taem Aesea i go luk olgeta bakegen mo bakegen, hemia i blong soemaot se “ol man ya” nomo oli no wantem kasemsave. I olsem we oli mekem tingting mo hat blong olgeta i kam strong blong oli no harem mesej blong Aesea, we i kam long Jehova. !Hemia i sem mak tu long taem blong yumi tede! Plante man oli no wantem lesin long ol Witnes blong Jehova taem oli stap talemaot gud nius blong Kingdom blong God, we i no longtaem bambae i kamtru.
ip-1 99 ¶23
Jehova i Stap Long Holi Tempol Blong Hem
23 Jisas i talem ol tok ya blong Aesea blong soemaot se profet tok ya i kamtru tu long taem blong hem. Plante man long taem blong Jisas, hat blong olgeta i sem mak long hat blong ol man Jiu long taem blong Aesea. Hemia from we oli mekem olsem se oli blaen mo sora blong olgeta i fas, taem oli harem mesej blong Jisas, taswe bigfala trabol i kasem olgeta. (Matiu 23:35-38; 24:1, 2) Long yia 70 K.T., ami blong Rom we Jenerol Titus i lidim oli kam long Jerusalem mo oli spolemgud taon ya wetem tempol. Be i gat sam man we oli lesin long Jisas mo oli kam ol disaepol blong hem. Jisas i tokbaot olgeta ya se oli “glad.” (Matiu 13:16-23, 51) Hem i talem long olgeta se taem oli luk we “ol soldia oli raonemgud Jerusalem,” oli mas “ronwe i go long ol bigfala hil.” (Luk 21:20-22) Long rod ya, “sid we i tabu” hemia olgeta we oli soemaot se oli bilif, oli sef. Olgeta ya nao oli kam wan nesen long saed blong spirit, hemia “Isrel blong God.”—Galesia 6:16.
Ol Gudgudfala Samting
Ol Bigfala Poen Long Buk Blong Aesea—Haf 1
7:3, 4—?From wanem Jeova i sevem rabis King ya Ahas? King blong Siria mo King blong Isrel oli mekem plan blong spolem King Ahas blong Juda mo blong putumap wan narafala man i kam king long ples blong hem. Man ya hemia pikinini boe blong Tabehel we hem i no laen blong Deved. Plan blong tufala king ya i kamaot long Setan stret, from we i save spolem kontrak blong Kingdom we Jeova i mekem wetem King Deved. From samting ya nao, Jeova i wantem sevem King Ahas blong mekem se laen ya, we “Pikinini ya blong King, we Hem i Stamba blong Pis” bambae i kamaot long hem, i no save lus.—Aesea 9:6.
15-21 DISEMBA
OL SAS SAMTING LONG BAEBOL AESEA 9-10
Profet Tok Long Saed Blong “Wan Bigfala Laet”
ip-1 125-126 ¶16-17
Bambae i Gat Wan Prins Blong Pis
16 Taem Aesea i talem se “i gat taem i stap kam,” hem i stap tokbaot taem ya we Jisas i stap long wol, i stap prij. Jisas i spenem bighaf blong laef blong hem long Galili. Long ples ya nao, hem i statem wok blong prij mo i stat blong talemaot se: “Kingdom blong heven i kam klosap finis.” (Matiu 4:17) Mo tu, hemia nao ples we hem i mekem Bigfala Toktok Antap Long Hil, hem i jusum ol aposol blong hem, hem i mekem faswan merikel blong hem, mo hem i kamtru long samwe 500 disaepol afta we hem i laef bakegen. (Matiu 5:1–7:27; 28:16-20; Mak 3:13, 14; Jon 2:8-11; 1 Korin 15:6) Long rod ya, Jisas i stap mekem profet tok blong Aesea i kamtru, we i talem se ol man bambae oli tinghae long “graon blong Sebulun mo graon blong Naftali.” Be Jisas i no prij nomo long ol man Galili, hem i prij tu long ol man blong narafala ples. Taem hem i mekem olsem, hem i “mekem we ol man oli tinghae” long ful nesen blong Isrel, hemia i minim Juda tu.
17 ?Be olsem wanem long tok ya we Matiu i talem long saed blong “wan bigfala laet” long Galili? Hemia tu i wan profet tok we Aesea i talem. Aesea i raetem se: “Ol man we oli stap wokbaot long tudak, naoia oli luk wan bigfala laet. Mo olgeta we oli stap long graon ya we sado i kavremap, i mekem i tudak we i tudak, laet i saen long olgeta finis.” (Aesea 9:2) Long taem blong ol faswan Kristin, ol giaman tijing blong ol hiten man i haedem laet blong trutok. Mo ol lida blong ol man Jiu oli mekem problem ya i kam mowas, taem oli holemtaet ol kastom blong olgeta we i mekem se “tok blong God i kam nating nomo.” (Matiu 15:6) Hemia i spolem gud ol man we oli gat tingting daon, i mekem oli harem nogud mo oli konfius taem oli folem ol ‘lida ya we oli blaen.’ (Matiu 23:2-4, 16) Be taem Jisas we i Mesaea i kamtru, hem i openem ae blong plante man we oli gat tingting daon nao oli luksave plante samting. (Jon 1:9, 12) Ol wok we Jisas i mekem taem hem i stap long wol mo ol blesing we oli kamaot from sakrefaes blong hem, oli laenap wetem profet tok blong Aesea we i tokbaot “wan bigfala laet.”—Jon 8:12.
!Karem Kakae Long Garen Wetem Glad!
19 I gat plante risen blong stap glad long taem we Jisas i stap mekem minista wok blong hem mo smoltaem biaen tu. Long taem ya, plante man oli lesin long gud nius. Bigfala glad i kamaot long Pentekos 33 K.T. taem samwe long 3,000 man oli akseptem tok blong Pita, oli kasem tabu spirit blong Jeova, mo oli joen long Isrel blong God. Tru ya, namba blong olgeta i gohed blong go antap mo glad blong olgeta i kam bigwan moa taem “evri dei, Hae God i stap sevem ol man, i stap joenem olgeta long grup ya blong ol aposol.”—Ol Wok 2:37-41, 46, 47; Galesia 6:16; 1 Pita 2:9.
20 Long taem ya, profet tok ya blong Aesea i kamtru se: “Yu [Jeova] yu mekem mifala [“bigfala nesen,” NW] i harem gud tumas, yu yu mekem mifala i glad. Mifala i hapi tumas long ol samting ya we yu yu mekem, olsem we ol man oli hapi long taem we oli stap tekemaot ol kakae long garen, oli karem i kam, olsem we oli hapi tumas long taem we oli stap seraot ol samting we oli winim long taem blong faet.” (Aesea 9:3) Nating se naoia, ‘bigfala nesen’ blong ol tabu Kristin i fulap gud finis, yumi glad tumas blong luk se evri yia namba blong ol narafala man blong karem kakae long garen i stap go antap.—Ol Sam 4:7; Sekaraea 8:23; Jon 10:16.
ip-1 128-129 ¶20-21
Bambae i Gat Wan Prins Blong Pis
20 Ol samting we Jisas i mekem bambae oli stap blong olwe, yumi luksave samting ya long nekiswan tok we Aesea i talem, i se: “Yu brebrekem finis yok we oli stap karem ol hevi samting blong olgeta long hem, long ol smosmol pis, hemia stik we i stap long solda blong olgeta, we i stik blong bos blong ol slef, olsem long taem blong ol man Midian.” (Aesea 9:4) Plante yia bifo long taem blong Aesea, ol man Midian mo ol man Moab oli mekem plan blong pulum ol man Isrel blong mekem sin. (Namba 25:1-9, 14-18; 31:15, 16) Biaen, ol man Midian oli mekem i strong tumas long ol man Isrel, taem oli spolem ol vilej mo ol garen blong olgeta blong seven yia. (Jajes 6:1-6) Be Jehova i yusum Gideon blong i sevem ol man blong hem. Afta long “taem blong ol man Midian,” i no gat wan pruf we i soemaot se ol man blong Jehova oli safa bakegen long han blong ol man Midian. (Jajes 6:7-16; 8:28) Long fiuja, Jisas Kraes we i bigfala Gideon, bambae i finisim ol man nogud we oli stap spolem ol man blong God. (Revelesen 17:14; 19:11-21) Mo “olsem long taem blong ol man Midian,” ol man blong God bambae oli win fulwan i no long paoa blong olgeta, be long paoa blong Jehova. (Jajes 7:2-22) Yes, ol man blong God bambae oli no moa safa bakegen samtaem.
21 Bigfala paoa we Jehova mo Jisas i yusum, i no blong leftemap faet. Jisas i Prins Blong Pis, taswe taem hem i finisim ol enemi blong hem bambae hem i mekem se i gat pis blong olwe. Aesea i tokbaot olsem wanem bambae oli spolem gud ol tul blong faet, i se: “Evri but we i mekem wol i muvmuv taem oli stap maj mo evri klos we i fulap long blad, bambae oli kam olsem faeawud blong mekem faea.” (Aesea 9:5) Ol man bambae oli no moa harem bakegen noes blong ol but blong ol soldia we oli stap maj, mo bambae oli no moa luk ol yunifom blong ol soldia we i fulap long blad. !Wo bambae i finis!—Ol Sam 46:9.
Ol Gudgudfala Samting
w25.07 10, bokis
?Olsem Wanem Blong Givim Advaes?
Folem Fasin Blong Jisas Taem Yu Givim Advaes
Makem sam samting we i mekem se Jisas i wan “Nambawan Advaesa,” mo luk olsem wanem yumi save folem eksampol blong hem.
• Jisas i save wanem blong talem. Oltaem hem i save stret samting blong talem from we ol advaes we hem i givim i kam long Jehova, be i no long prapa tingting blong hem. Hem i talem long ol disaepol blong hem se: “Ol samting we mi talem long yufala, oli no kamaot long tingting blong mi nomo.”—Jon 14:10.
Lesen: Nating se yumi gat plante ekspiriens mo yumi waes, be yumi mas meksua se oltaem advaes we yumi givim i kamaot long Tok blong God, be i no long prapa tingting blong yumi.
• Jisas i save stret taem blong givim advaes. Hem i no talemaot evri samting wantaem long ol disaepol blong hem. Be hem i wet go kasem wan taem we i stret, blong i givim advaes long olgeta, mo hem i talem nomo samting we oli naf blong kasemsave.—Jon 16:12.
Lesen: Taem yumi wantem givim advaes long narafala, yumi mas wet go kasem wan stret “taem blong toktok.” (Pri. 3:7) Sipos yumi talem plante samting wantaem long wan man, maet bambae hem i konfius mo tingting blong hem i save foldaon. Taswe i gud yumi talem nomo long hem ol samting we hem i nid blong save.
• Jisas i save stret rod blong givim advaes. Plante taem Jisas i givim advaes long ol aposol blong hem se oli mas gat tingting daon. Be long ol taem ya, oltaem hem i toktok long kaen fasin mo wetem respek.—Mat. 18: 1-5.
Lesen: Nating sipos yumi mas givim sem advaes long wan man plante taem, be i gud we yumi toktok long kaen fasin mo wetem respek. Olsem nao, bambae i isi moa blong hem i folem advaes blong yumi.
22-28 DISEMBA
OL SAS SAMTING LONG BAEBOL AESEA 11-13
?Baebol i Talem Wanem Long Saed Blong Mesaea?
ip-1 159 ¶4-5
Rul Blong Mesaea i Sevem Yumi Mo i Mekem Yumi Glad
4 Plante yia bifo long taem blong Aesea, ol narafala man we oli raetem Hibru Haf Blong Baebol oli tokbaot Mesaea, we i trufala Lida, we Jehova bambae i sanem i kam long Isrel. (Jenesis 49:10; Dutronome 18:18; Ol Sam 118:22, 26) Naoia tru long Aesea, Jehova i givim sam moa save long saed blong Mesaea. Aesea i raetem se: “Wan niu sut bambae i kamaot long stamba blong Jese, mo wan niufala gru we i kamaot long ol rus blong hem, bambae i karem frut.” (Aesea 11:1; skelem wetem Ol Sam 132:11.) Tufala tok ya “niu sut” mo “niufala gru,” i soemaot se Mesaea bambae i kamaot long laen blong Jese, tru long Deved we oli yusum oel blong makemaot hem olsem king blong Isrel. (1 Samuel 16:13; Jeremaea 23:5; Revelesen 22:16) Taem Mesaea i kamtru, hemia “niufala gru” we i kamaot long laen blong Deved, bambae hem i karem gudfala frut.
5 Mesaea ya we Jehova i promes blong sanem i kam, hemia Jisas. Gospel blong Matiu i yusum profet tok we i stap long Aesea 11:1 blong tokbaot se ol man bambae oli singaot Jisas se “wan Nasarin.” Hemia i mekem ol tok we ol profet oli talem bifo, i kamtru. Mo from we Jisas i gruap long taon ya Nasaret, ol man oli singaot hem se hem i wan Nasarin. I luk olsem se nem ya i joen wetem Hibru tok ya we i minim “niufala gru,” we Aesea 11:1 i tokbaot.—Matiu 2:23, futnot; Luk 2:39, 40.
ip-1 159 ¶6
Rul Blong Mesaea i Sevem Yumi Mo i Mekem Yumi Glad
6 ?Mesaea bambae i rul long wanem fasin? ?Bambae hem i mekem i strong olsem ol man Asiria we oli distroem ol ten traeb blong Isrel? Nogat. Aesea i tokbaot Mesaea se: “Spirit blong Jehova bambae i stap long hem, hemia spirit blong waes mo blong kasemsave samting, spirit blong advaes mo paoa mo spirit blong save mo fasin blong fraet long Jehova. Mo bambae hem i kasem glad from fasin blong fraet long Jehova.” (Aesea 11:2, 3a) Jehova i no yusum oel, be i yusum tabu spirit blong makemaot Mesaea. Taem Jisas i baptaes, Jon Baptaes i luk we tabu spirit blong God i kamdaon long Jisas olsem wan sotleg. (Luk 3:22) Tabu spirit blong Jehova i mekem se Jisas i naf blong kasemsave samting, i waes, i givim gudfala advaes, i kasem paoa, mo save. !Hemia nao ol fasin blong wan gudfala rula!
?From Wanem Yumi Mas Fraet Long Jehova?
5 Wan man we i fraet long God, hem i lavem God mo i no wantem mekem eni samting we i save spolem frensip blong hem wetem God. Jisas tu i “fraet long God.” (Hib. 5:7) Be hem i no fraet se Jehova bambae i panisim hem. (Aes. 11:2, 3) Hem i lavem Jehova tumas mo i wantem obei long hem. (Jon 14:21, 31) Olsem Jisas, yumi fraet long Jehova mo yumi gat bigfala respek long hem from hem i gat lav, i waes, i mekem i stret, mo i gat bigfala paoa. Mo tu, yumi save se Jehova i lavem yumi tumas mo i intres blong save se bambae yumi mekem wanem taem yumi kasem ol tijing blong hem. Sipos yumi no obei long Jehova bambae hem i harem nogud, be sipos yumi obei bambae yumi mekem hem i glad.—Sam 78:41; Prov. 27:11.
ip-1 160 ¶9
Rul Blong Mesaea i Sevem Yumi Mo i Mekem Yumi Glad
9 Aesea i tokbaot sam moa samting long saed blong fasin blong Mesaea blong rul. Hem i se: “Bambae hem i no jaj folem samting nomo we hem i luk long ae blong hem, no i stretem man folem samting nomo we hem i harem long sora blong hem.” (Aesea 11:3b) Traem tingbaot sipos yu pas long kot, mo jaj i gat ol fasin ya, ?bambae yu yu harem olsem wanem? I sua se bambae yu harem gud. Yes, i no gat wan samting olsem ol giaman witnes, ol smat wei blong mekem wan kot kes, ol giaman toktok, o ol samting we ae blong hem i luk olsem sipos man ya i rij, we i save trikim Mesaea we i Jaj blong olgeta man. Jisas i savegud taem wan man i giaman. Hem i no lukluk nomo fes mo bodi blong man, be hem i luk “ol samting we oli stap long hat” blong man. (1 Pita 3:4) Jisas i soemaot nambawan eksampol long olgeta we oli kasem wok blong stretem ol problem insaed long Kristin kongregesen.—1 Korin 6:1-4.
ip-1 161 ¶11
Rul Blong Mesaea i Sevem Yumi Mo i Mekem Yumi Glad
11 Taem Jisas i stretem ol man blong hem, hem i mekem long wan fasin we i blong givhan long olgeta. Hemia i wan gudfala eksampol blong ol Kristin elda oli folem. Be olgeta we oli stap gohed blong mekem ol samting we i no stret, i klia se bambae oli kasem fasin stretem we i strong moa. Long taem we God bambae i givim oda blong finisim rabis sistem blong wol ya, Mesaea bambae i yusum paoa we hem i kasem blong “kilim ol man blong ol nesen,” mo i jajem ol rabis man blong oli lus blong olwe. (Ol Sam 2:9; skelem wetem Revelesen 19:15.) Afta long samting ya, bambae i gat pis long fulwol. (Ol Sam 37:10, 11) From we Jisas i strapem stret fasin mo fasin blong holemstrong i goraon long weist blong hem, hemia i soemaot se hem i gat paoa blong distroem ol rabis man.—Ol Sam 45:3-7.
Ol Gudgudfala Samting
ip-1 165-166 ¶16-18
Rul Blong Mesaea i Sevem Yumi Mo i Mekem Yumi Glad
16 Faswan taem we Setan i traem blong spolem tru wosip, hemia taem hem i pulum Adam mo Iv blong no obei long Jehova. Kam kasem tede, Setan i gohed blong pulum plante moa man blong oli gowe long God. Be Jehova bambae i neva letem se tru wosip i lus fulwan long wol ya, from hemia i save spolem nem blong hem mo from we hem i kea bigwan long ol man we oli wosipim hem. Taswe, hem i mekem wan strong promes tru long profet Aesea, we i se: “Long dei ya, rus blong Jese bambae i stanap olsem wan saen blong olgeta man. Mo ol nesen bambae oli lukluk i go long hem blong i lidim olgeta, mo ples blong spel blong hem, bambae i kam wan naesfala ples.” (Aesea 11:10) Jerusalem i taon ya we Deved i mekem i kam kapital blong Isrel, mo i wan saen o stamba ples blong tru wosip. Taswe long yia 537 B.K.T., oli singaotem olgeta man Jiu we oli stap olbaot long ol nesen, blong oli kam mo bildim bak tempol.
17 Be, profet tok ya i tokbaot sam narafala samting tu. Olsem we yumi luk finis, hem i tokbaot rul blong Mesaea, trufala Lida blong ol man blong olgeta nesen. Aposol Pol i yusum ol tok we i stap long Aesea 11:10 blong soemaot se long taem blong hem, ol man blong ol narafala nesen bambae oli joen long Kristin kongregesen. Pol i yusum ol tok we i stap long Baebol ya Septuagint, blong raetem se: “Aesea i talem se: ‘Rus blong Jese bambae i kamtru, hem i man ya we bambae i girap blong rulum ol nesen, mo ol nesen bambae oli putum hop blong olgeta long hem.’” (Rom 15:12) Profet tok ya i stap gohed blong kamtru tede, from we plante moa man blong ol defdefren nesen oli soemaot se oli lavem Jehova, taem oli sapotem ol tabu brata blong Mesaea.—Aesea 61:5-9; Matiu 25:31-40.
18 Long taem blong yumi, tok ya “dei ya” we Aesea i tokbaot, i stat taem Mesaea i kam King long Kingdom blong God long 1914. (Luk 21:10; 2 Timoti 3:1-5; Revelesen 12:10) Stat long taem ya, Jisas Kraes i stap olsem wan klia saen blong Isrel long saed blong spirit, mo blong ol man blong ol nesen we oli wantem tumas blong stap aninit long wan gavman we i rul long stret fasin. Folem oda ya we Mesaea i bin givim, gud nius blong Kingdom i stap goaot long olgeta nesen. (Matiu 24:14, Mak 13:10) Gud nius ya i gat bigfala paoa long plante man. Baebol i tokbaot “wan bigfala hip blong ol man, we i no gat man i save kaontem olgeta. Ol man ya oli kamaot long olgeta kantri,” mo oli obei long Mesaea taem oli joen wetem smol haf blong ol tabu Kristin we oli stap yet long wol, long tru wosip. (Revelesen 7:9) Taem plante moa man oli gohed blong kam joen wetem ol tabu man long “haos blong prea” blong Jehova long saed blong spirit, oli stap givim moa glori long “ples blong spel” blong Mesaea, hemia bigfala tempol blong God long saed blong spirit.—Aesea 56:7; Hagae 2:7.
29 DISEMBA–4 JENUWARE
OL SAS SAMTING LONG BAEBOL AESEA 14-16
Ol Enemi Blong God Bambae Oli Kasem Panis
ip-1 180 ¶16
Jehova i Spolem Wan Taon We i Flas
16 Samting ya i no hapen stret long yia 539 B.K.T. Nating se i olsem, tede yumi luksave se evri samting we Aesea i talemaot long saed blong Babilon, oli kamtru. Wan buk we i eksplenem Baebol, i talem se: “Blong plante yia kam kasem naoia, Babilon i kam wan ples we i emti nomo, mo i fulap long ol hip ston.” Buk ya i gohed, i se: “Sipos wan man i luk ples ya, bambae hem i luksave se samting ya i kamtru stret olsem we profet tok blong Aesea mo Jeremaea i bin talemaot.” Blong talem stret, i no gat wan man long taem blong Aesea we i naf blong talemaot se Babilon bambae i foldaon, mo i kam ples nating nomo. Samwe 200 yia afta we Aesea i raetem buk blong hem, ol man Media mo Pesia oli kam winim Babilon. Mo plante yia biaen, Babilon i jes kam olsem wan ples we i stap nating nomo. Hemia i mekem bilif blong yumi i strong se Baebol i Tok blong God. (2 Timoti 3:16) Antap long hemia, from we Jehova i bin mekem ol profet tok bifo oli kamtru, yumi trastem se ol narafala profet tok blong Baebol we oli no kamtru yet, God bambae i mekem oli kamtru long stret taem.
ip-1 184 ¶24
Jehova i Spolem Wan Taon We i Flas
24 Baebol i tokbaot ol king we oli kamaot long laen blong Deved se oli olsem ol sta. (Namba 24:17) Stat long King Deved, ol “sta” ya oli rul long Hil Ya Saeon. Afta we Solomon i bildim tempol long Jerusalem, oli singaot ful taon ya se Saeon. Folem kontrak blong Loa, evri hed blong famle long Isrel oli mas go long Saeon, tri taem long wan yia. From samting ya, ples ya i kam “bigfala hil ya blong miting.” Taem Nebukadnesa i plan blong winim ol king blong Juda mo i tekemaot olgeta long hil ya, hem i soemaot se hem i wantem putumap hem wan i kam hae moa long “ol sta” ya. Hem i no presem Jehova taem hem i winim ol king blong Juda, be hem i leftemap hem wan mo i wantem tekem ples blong Jehova.
ip-1 189 ¶1
Tok We Jehova i Talem Agensem Ol Nesen
JEHOVA i save yusum ol narafala nesen blong panisim ol man blong hem, taem oli no obei mo oli mekem ol nogud samting. Be hemia i no min se Jehova i agri long ol nesen ya we oli flas, oli stap mekem ol nogud samting, o taem oli agensem tru wosip. Traem tingbaot. Plante yia bifo finis, Jehova i pulum profet Aesea blong talemaot “wan strong tok agensem Babilon.” (Aesea 13:1) Be profet tok ya long saed blong Babilon bambae i jes kamtru fiuja. Long taem we Aesea i talemaot profet tok ya, ol man Asiria nao oli stap spolem ol man ya we God i mekem kontrak wetem olgeta. Oli spolemgud kingdom blong Isrel long not, mo bighaf blong ol ples long Juda. Be hemia i blong smoltaem nomo. Aesea i raetem se: “Jehova komanda blong ol ami i mekem wan strong tok finis se: ‘Bambae i mas kamtru, stret olsem we mi wantem . . . Bambae mi smasem man Asiria ya long graon blong mi, mo long ol bigfala hil blong mi, bambae mi wokbaot antap long hem. Bambae mi tekemaot yok blong hem long olgeta, mo ol hevi samting blong hem we i stap long solda blong olgeta, bambae oli kamaot.’” (Aesea 14:24, 25) Smoltaem afta we Aesea i talemaot profet tok ya, trabol i kasem ol man Asiria nao oli no moa spolem Juda.
ip-1 194 ¶12
Tok We Jehova i Talem Agensem Ol Nesen
12 ?Wetaem bambae profet tok ya i kamtru? Bambae i kamtru i no longtaem. Aesea i raetem se: “Hemia nao tok we Jehova i talemaot fastaem, blong tokbaot Moab. Mo naoia Jehova i talem se: ‘Long tri yia nomo, olsem ol yia blong wan man blong wok, ol gudgudfala samting blong Moab bambae oli sem mo bambae i gat enikaen noes nomo long taem ya, mo olgeta we oli stap yet bambae oli no plante mo oli ol man nating nomo.’” (Aesea 16:13, 14) Folem profet tok ya, ol man blong digim graon oli faenem ol pruf we i soemaot se long ol yia 800 B.K.T., ol man Moab oli safa bigwan mo plante man oli no moa laef long ol eria blong Moab. Tiglatpilesa III i tokbaot se Salamanu we i blong Moab, hem i wan long ol lida we i givim sam presen long hem. Senakerib i kasem sam presen long Kammusunadbi we i king blong Moab. King Esaradon mo King Ashurbanipal blong Asiria, i tokbaot se Musuri mo Kamashaltu we tufala i king blong Moab, oli stap aninit long paoa blong olgeta. Plante yia bifo, ol man Moab oli no moa stap olsem wan nesen. Ol man blong digim graon oli faenem sam haos we i brokbrok i stap mo oli ting se maet hemia i ples we ol man Moab oli bin laef long hem. Nating se i olsem, oli no faenem plante samting we i pruvum se Moab i wan strongfala enemi blong ol man Isrel.
Ol Gudgudfala Samting
Ol Bigfala Poen Long Buk Blong Aesea—Haf 1
14:1, 2—?Olsem wanem ol man blong Jeova oli mekem we ‘narafala kantri i wok slef blong olgeta’ mo ‘oli rulum olgeta we oli stap mekem i strong tumas long olgeta’? Samting ya i kamtru long taem blong ol man olsem Daniel we i holem wan hae posisen long Babilon aninit long rul blong ol man Media mo Pesia; Esta we i kam kwin blong Pesia; mo Modekae we i kam praeminista long ol kantri we Pesia i rul long olgeta.