Jehova i talem long Samuel se: ‘Yu go luk wan man, nem blong hem Jese. Wan boe blong hem nao bae i kam king.’ Ale Samuel i go long haos blong Jese. Taem hem i luk fasbon boe blong Jese, hem i ting se: ‘Ating hem nao bae i kam king.’ Be Jehova i no jusum boe ya, mo hem i talem long Samuel se: ‘Mi mi no luk bodi blong man, be mi luk samting we i stap long hat blong hem.’

Jese i tekem sikis narafala boe blong hem oli kam. Be Samuel i talem se: ‘No, Jehova i no jusum wan long olgeta. ?Hemia nao evri boe blong yu?’ Jese i talem se: ‘Lasbon long olgeta, Deved, i stap yet, be hem i stap lukaot long ol sipsip.’ Oli singaot Deved i kam, nao Jehova i talem long Samuel se: ‘!Hem nao!’ Ale, Samuel i kafsaedem oel long hed blong Deved, blong makemaot hem se bambae i kam king blong Isrel long fiuja.

Taem i pas, nao ol man Isrel oli stap rere blong mekem faet long ol man Filistia. I gat wan jampion soldia blong Filistia we i wan bigfala man bitim mak, nem blong hem Golaeat. Evri dei, hem i stap jikim ol man Isrel se: ‘Yufala i jusumaot wan strong man blong i kam faetem mi. Sipos hem i win, bae mifala i kam slef blong yufala. Be sipos mi mi win, bae yufala i kam slef blong mifala.’

Deved i karem kakae i kam long ol brata blong hem, we oli soldia blong ol man Isrel. Taem Deved i harem ol tok blong Golaeat, hem i talem se: ‘!Mi bae mi faetem hem!’ Be King Sol i talem se: “Yu yu wan yang boe nomo.” Deved i ansa se: ‘Jehova bae i givhan long mi.’

Sol i givim klos blong faet blong hem long Deved, be Deved i talem se: ‘Sipos mi werem ol samting ya, bae mi no save faet.’ Ale Deved i karem sling blong hem nomo, i godaon long wan smol reva, i pikimap faef ston we oli raon gud, mo i fulumap olgeta long smol basket blong hem. Nao hem i ron i go blong faet agensem Golaeat. Golaeat i singaot se: ‘Ale, smol boe, yu kam. Bae mi givim bodi blong yu long ol pijin mo ol wael anamol, blong oli kakae.’ Deved i no fraet. Hem i singaot bigwan se: ‘Yu yu faet wetem naef mo spia, be mi mi faet long nem blong Jehova. Yu no stap faet agensem mifala, be yu stap faet agensem God. Evriwan long ples ya bae oli luk se Jehova i gat moa paoa i bitim naef mo spia blong yu. Bae hem i putum yufala evriwan long han blong mifala.’

Deved i putum wan ston long sling blong hem, nao i slingim wetem ful paoa blong hem i go long Golaeat. Jehova i givhan long Deved, ale ston ya i faerap long fored blong Golaeat, nao hem i foldaon long graon, i ded. Taem ol man Filistia oli luk we Golaeat i ded, oli girap, oli ronronwe. ?Olsem wanem? ?Yu yu trastem Jehova, olsem Deved?

Afta we Deved i kilim Golaeat i ded, King Sol i putumap hem i kam komanda blong ol ami blong hem. Deved i winim plante faet, mo ol man oli glad long hem. Taem hem i kamhom, ol woman oli kam afsaed, oli danis, mo oli singsing se: “Sol i kilim taosen man oli ded, mo Deved i kilim plante taosen.” Ale, Sol i kam jalus, nao i traem kilim Deved i ded.

Deved i save plei gud long hap. Wan dei, hem i stap plei blong mekem Sol i harem gud. Nao Sol i girap i sakem spia i go long Deved, be hem i muv, nao spia i go fas long wol. Plante taem, Sol i traem kilim Deved i ded, gogo, wan dei, Deved i girap, i ronwe i go haed long draeples.

Sol i tekem 3,000 soldia oli go blong lukaotem Deved. Sol i go insaed long wan hol blong ston we Deved mo ol man blong hem oli stap haed long hem. Ol man blong Deved oli toktok smol long hem se: ‘!Ei, janis ya! !Yu kilim hem i ded!’ Deved i wokbaot sloslo i go klosap long Sol mo i katemaot en blong kot blong hem, be Sol i no save. Afta, Deved i harem nogud, from we hem i no bin soemaot respek long king ya we Jehova i putumap. Nao hem i no letem ol man blong hem oli go kilim Sol. Biaen, hem i singaot Sol, mo i talem long hem se hem i gat janis blong kilim Sol i ded, be hem i no mekem. ?Yu ting se naoia Sol bambae i laekem Deved?

!Nogat! Sol i gohed blong ronem Deved. Wan naet, Deved mo Abisae we i boe blong sista blong Deved, tufala i wokbaot sloslo i go long kamp blong Sol. Evriwan oli stap slip, wetem Abnere tu, we i bodigad blong Sol. Abisae i talem se: ‘!Hemia janis blong yumitu! !Yu letem mi mi kilim Sol i ded!’ Be Deved i talem se: ‘Jehova nomo bae i kilim Sol i ded. Yumitu karem spia blong hem nomo wetem jag blong wota.’

Deved i klaem i go antap long wan bigfala hil, i lukluk i godaon long kamp blong Sol, mo i singaot se: ‘?Abnere, from wanem yu no stap lukaot gud long king? ?Wehem spia mo jag blong wota blong hem?’ Sol i haremsave voes blong Deved, mo i talem se: ‘!Man! Yu save kilim mi mi ded isi nomo, be yu no mekem. Mi save se yu bae yu kam king blong Isrel.’ Ale Sol i girap i gobak long ples blong hem. Be i gat wan famle blong Sol we i no agensem Deved.