Jonatan i fasbon boe blong Sol, mo hem i wan soldia we i no save fraet. Deved i talem se Jonatan i kwik moa i bitim wan igel, mo i strong moa i bitim wan laeon. Wan dei, Jonatan i luk 20 soldia blong Filistia antap long hil. Nao hem i talem long man ya we i karem ol tul blong faet blong hem se: ‘Sipos oli singaot yumitu i go, hemia wan saen we Jehova i givim blong soemaot se yumitu mas go faetem olgeta.’ I no longtaem, ol soldia blong Filistia oli singaot se: ‘!Ei! !Yutufala i kam faetem mifala!’ Ale, tufala i klaem i go antap long hil ya, mo tufala i winim ol soldia ya.

From we Jonatan i fasbon boe blong Sol, hem i gat raet blong kam king afta long papa blong hem. Be Jonatan i save se Jehova i jusumaot Deved blong i kam nekis king blong Isrel, mo hem i no jalus. Jonatan mo Deved, tufala i kam besfren. Tufala i promes blong protektem tufala mo givgivhan long tufala. Jonatan i givim kot, naef blong faet, bonara, mo strap blong hem i go long Deved, blong soemaot se hem i besfren blong hem.

Taem Deved i stap ronwe long Sol, Jonatan i go luk hem mo i talem long hem se: ‘Yu no fraet. Jehova i jusumaot yu finis, blong yu kam king blong Isrel. Papa blong mi tu i save gud samting ya.’ ?Olsem wanem? ?Yu yu glad sipos yu gat wan gudfala fren olsem Jonatan?

Plante taem, Jonatan i putum laef blong hem long denja blong givhan long fren blong hem. Hem i save se papa blong hem King Sol i wantem kilim Deved i ded, ale hem i talem long Sol se: ‘Deved i no mekem wan samting nating we i rong. ?From wanem yu wantem kilim hem i ded? Sipos yu mekem olsem, bae yu mekem wan bigfala sin.’ Sol i kros we i kros long Jonatan.

Sam yia biaen, Sol mo Jonatan tugeta i ded long faet. Taem Jonatan i ded, Deved i traehad blong faenem boe blong hem Mefiboset. Taem hem i faenem Mefiboset, hem i talem long hem se: ‘Bae mi mekem i gud long yu long ful laef blong yu, from we papa blong yu i wan gudfala fren blong mi. Bae yu kam stap long haos blong mi, mo yu kakae wetem mi oltaem.’ Deved i neva fogetem fren blong hem Jonatan.

Taem Sol i ded, Deved i kam king. Hem i gat 30 yia long taem ya. Afta we sam yia i pas, hem i mekem wan samting we i nogud tumas. Wan naet, hem i stap wokbaot antap long ruf blong haos blong hem, nao hem i luk wan naes woman. Deved i faenemaot se nem blong woman ya hemia Batseba, mo hem i mared long wan soldia we nem blong hem Uria. Deved i sanem sam man oli go blong tekem Batseba i kam. Nao Deved i slip wetem hem, mo Batseba i gat bel. Deved i traem haedem sin blong hem. Hem i talem long komanda blong ami se hem i mas putum Uria long fas laen blong ol soldia we oli fesem ol enemi, nao oli mas muv bak smol blong ol enemi oli kilim Uria i ded. Ale Uria i ded long faet, nao Deved i tekem Batseba i kam woman blong hem.

Jehova i luk ol nogud samting ya we i hapen. ?Hem i mekem wanem? Hem i sanem profet Natan i go luk Deved. Natan i talem long Deved se: ‘I gat tu man i stap long wan taon, wan man i rij mo wan i pua. Rijman i gat plante buluk mo sipsip blong hem, be puaman i gat wan smol sipsip nomo, mo i stap lukaot gud long hem. Wan dei, rijman ya i girap, i go tekemaot smol sipsip blong puaman ya, wan nomo we hem i gat.’ Deved i kros tumas, i talem se: “!Man we i mekem samting ya i mas ded!” Natan i talem long Deved se: “!Yu nao man ya!” Deved i harem nogud bitim mak, nao i talem long Natan se: “Mi mi mekem sin agens long Jehova.” Sin blong Deved i mekem se hem mo famle blong hem oli kasem bigfala trabol. Jehova i panisim hem be i no kilim hem i ded, from we Deved i talemaot sin blong hem mo i mekem tingting blong hem i stap daon.

Deved i wantem wokem wan tempol blong Jehova, be Jehova i jusum Solomon, pikinini blong Deved, blong i wokem tempol ya. Deved i rerem plante samting blong Solomon, mo i talem se: ‘Haos blong Jehova i mas wan nambawan haos. Solomon i yang yet. Bae mi rerem ol samting blong hem.’ Deved i givim plante mane, mo i faenem ol man we oli gat gudhan blong mekem ol defdefren wok. Hem i hivimap gol mo silva, mo i karem ol gudfala wud ya sida long Taea mo Saedon. Bifo we Deved i ded, hem i givim ol plan blong haos ya long Solomon, mo i talem se: ‘Mi mi raetemdaon ol samting ya stret olsem Jehova i talem. Jehova bae i givhan long yu. Yu no fraet, yu mekem tingting blong yu i strong, mo yu wok had.’