Oli Mekem Bes Blong Olgeta

Taem Wol Wo II i finis long 1945, plante samting long Jemani i kam nogud. Oli bin distroem ol taon, ol skul oli emti, oli no moa save yusum ol hospital, mo ol laef bom oli stap long evri ples. Antap long hemia, i no gat naf kakae, mekem se praes blong kakae i sas tumas. Eksampol, !long blak maket, praes blong 500 gram bata, i sem mak long pei we man i kasem long sikis wik!

Long medel blong olgeta ya we oli kasem trabol, i gat plante handred Witnes blong Jehova we oli spenem plante yia long prisen mo long ol rabis kamp from bilif blong olgeta. Long 1945, oli letem olgeta oli gofri we oli no karem eni samting wetem olgeta, oli go nomo wetem ol klos blong prisen we oli stap werem. Ol narafala Witnes oli lusum ol propeti mo ol narafala samting blong olgeta. Samfala oli safa from hanggri mekem se plante, ae blong olgeta i dak long taem blong ol Kristin miting.

Ol Witnes Long Narafala Kantri Oli Givhan Kwiktaem

Ol Witnes blong Jehova long ol narafala kantri long wol, oli givhan kwiktaem, oli givim kakae mo klos. Ol brata long wol hedkwota long Yunaeted Stet oli askem branj ofis long taon ya Bern long Swiselan, blong halpem ol brata long Jemani. Nathan H. Knorr we i representem hedkwota, i go long Yurop blong oganaesem mo spidimap rilif wok ya.

Ol Witnes long Swiselan oli glad blong givim kakae, klos, mo mane. Oli sanem ol samting ya i go fastaem long taon ya Bern, ale long ples ya oli seraotem mo pakemap bifo we oli sanem i go long Jemani. Ol Witnes long ol narafala kantri, olsem Swiden, Kanada, mo Yunaeted Stet, olgeta tu oli givhan long rilif wok ya blong givhan long ol man blong Jehova long Jemani, be tu long plante kantri long Yurop mo Esia we i gat faet.

Nambawan Samting i Kamaot

Long sam manis nomo, branj blong Swiselan i sanem kofe, milk, suga, ol sereal, drae frut, ol vejtebol, mo ol tin mit mo fis. Mo oli sanem sam mane tu.

Antap long hemia, ol Witnes long Swiselan oli sanem faef tan blong ol klos, wetem ol kot, ol klos blong ol woman, mo ol sut blong ol man. Wajtaoa blong 15 Jenuware 1946 i talem se: “Ol brata oli givim ol beswan samting we oli gat. Oli mekem bigfala sakrefaes blong givhan long ol brata mo sista blong olgeta long Jemani.”

Mo tu, ol Witnes long Swiselan oli givim klosap 1,000 sus. Oli jekem gud ol sus ya blong luk se oli gud bifo we oli sanem i go. Ol brata mo sista long Wiesbaden, Jemani, we oli tektekemaot ol samting ya oli sapraes long ol gudgudfala samting mo defdefren samting we ol brata mo sista oli givim. Wan Witnes i raetem se: “Mi sua se i no gat wan stoa long Jemani we i salem ol gudfala klos mo sus olsem.”

Oli gohed blong sanem ol samting blong rilif wok kasem Ogis 1948. Ol Witnes long Swiselan oli sanem 444 bigfala bokis blong ol rilif saplae we weit blong hem i 25 tan, i go long ol brata mo sista blong olgeta long Jemani. Olsem yumi tokbaot finis, i no ol Witnes long Swiselan nomo we oli joen long rilif wok ya. Olgeta oli wan smol haf blong grup we oli joen wetem ol narafala blong givhan long wok ya. !Long taem ya, i gat 1,600 Witnes nomo long Swiselan!

“Yufala i Lavlavem Yufala”

Jisas i bin talem se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:34, 35) Yes, lav i pulum ol man blong Jehova blong givim samting long narafala, i no jes ol ekstra samting we oli gat, be oli givim beswan we oli gat. (2 Korin 8:1-4) Wan leta blong Zurich i talem se “sam brata oli wantem givhan, be oli no gat kakae blong givim, ale oli givim mane nomo.”

Ol man blong Jehova long Jemani oli harem gud kwiktaem, afta we ol man oli mekem i nogud long olgeta mo afta long wo. Wan risen hemia from we ol brata mo sista blong olgeta we oli gat sem bilif oli oganaes gud, oli gat gladhat blong givim samting, mo oli mekem sakrefaes ya blong soemaot lav long olgeta.