?Hu Ya Bigfala Babilon?

Ansa we Baebol i givim

Buk blong Revelesen i tokbaot “wan woman” we i wan “bigfala prostitut,” mo we nem blong hem “i wan tokhaed, hemia: ‘Bigfala Babilon.’” (Revelesen 17:1, 3, 5) Woman ya i pija blong olgeta giaman skul long wol we oli “jusum blong bilif long giaman tok, i bitim we oli bilif long trutok blong God.”a (Rom 1:25) Nating se ol skul ya oli defdefren, be olgeta evriwan oli lidim ol man oli gowe long wosip blong trufala God, Jehova.—Dutronome 4:35.

Luksave hu ya Bigfala Babilon

1. Bigfala Babilon i wan pijatok. Long buk blong Revelesen i gat “ol saen,” taswe i stret se Bigfala Babilon tu i wan saen nomo, be i no wan prapa woman. (Revelesen 1:1) Mo tu, hem i “stap sidaon long plante wota,” we i minim “ol man, mo ol hip blong ol man, mo ol nesen, mo ol lanwis.” (Revelesen 17:1, 15) Wan prapa woman i no save mekem samting ya.

2. Bigfala Babilon i stap long olgeta kantri blong wol. Hem i “bigfala taon ya we kingdom blong hem i rul antap long olgeta king blong wol.” (Revelesen 17:18) Taswe, hem i gat paoa long olgeta ples long wol.

3. Bigfala Babilon i minim ol skul, i no politik mo ol bisnes. Ol man long Babilon bifo oli strong long relijen blong olgeta , mo ol narafala oli save taon ya from “ol majik” mo “ol wok blong kleva” we ol man long ples ya oli stap mekem. (Aesea 47:1, 12, 13; Jeremaea 50:1, 2, 38) Blong talem stret, long taon ya oli mekem wosip long ol giaman god, we i agensem wosip blong trufala God, Jehova. (Jenesis 10:8, 9; 11:2-4, 8) Ol flas rula blong Babilon oli leftemap olgeta antap long Jehova mo wosip blong hem. (Aesea 14:4, 13, 14; Daniel 5:2-4, 23) Long sem fasin, ol man oli save Bigfala Babilon from we hem i joen long wok blong ol rabis spirit. Hemia i soemaot se hem i wan oganaesesen blong ol skul.—Revelesen 18:23.

   Bigfala Babilon i no minim politik, from we “ol king blong wol” oli stap krae taem hem i lus. (Revelesen 17:1, 2; 18:9) Mo tu, hem i no minim ol bisnes, from we Baebol i soemaot se hem i defren long “ol bisnesman blong wol ya.”—Revelesen 18:11, 15.



Photograph taken by courtesy of the British Museum

4. Bigfala Babilon i gat sem fasin olsem ol giaman skul. Ol giaman skul oli no tijim ol man blong oli kam klosap moa long trufala God Jehova, be oli lidim ol man blong oli wosipim ol narafala god. Baebol i talem se oli “mekem wok blong prostitut wetem ol narafala god.” (Levitikas 20:6; Eksodas 34:15, 16) Plante giaman skul tede oli stap tijim ol man yet long ol tijing we oli kamaot long Babilon bifo, olsem tijing ya blong triniti, tijing ya se sol i no save ded, mo wosip blong ol aedol. Mo tu, ol skul ya oli laekem ol samting blong wol, mo oli joenem ol samting ya wetem wosip blong olgeta. Baebol i talem se, long saed blong wosip, oli olsem woman we i mekem adaltri wetem narafala man.—Jemes 4:4.

   Baebol i talem se Bigfala Babilon i werem klos we “i pepol mo i laet red” mo “i flasem hem long ol samting we oli wokem long gol mo long ol sas ston mo long ol perel.” Hemia i stret long ol rij samting we ol giaman skul oli gat, mo fasin blong olgeta blong soem ol rij samting ya. (Revelesen 17:4) Bigfala Babilon hem i stamba blong “ol nogud samting blong wol ya we oli nogud olgeta,” hemia ol tijing mo aksen we oli sakem doti long nem blong God. (Revelesen 17:5) Olgeta we oli joen long ol giaman skul, hemia “ol man, mo ol hip blong ol man, mo ol nesen, mo ol lanwis” we oli sapotem Bigfala Babilon.—Revelesen 17:15.

Bigfala Babilon i gat fol from ded blong “olgeta man we ol man oli kilim olgeta i ded long wol.” (Revelesen 18:24) Long olgeta yia we i pas, ol giaman skul oli statem plante faet, mo oli sapotem wok blong ol teroris, mo tu, oli no tijim ol man long trutok long saed blong God ya blong lav, Jehova. (1 Jon 4:8) Hemia i mekem se ol man oli stap kilkilim olgeta i ded.

?God i gat wanem tingting long Bigfala Babilon?

Long tingting blong God, ol sin blong Bigfala Babilon “oli hivap gogo kasem heven.” (Revelesen 18:4, 5) God i kros long ol giaman skul from we oli mekem se ol man oli gat rong tingting long hem, mo oli mekem i nogud long ol man blong hem.

?Wanem bambae i hapen long Bigfala Babilon?

Baebol i talem se: “God i jajem [Bigfala Babilon] finis.” (Revelesen 18:20) Baebol i yusum wan pijatok blong soemaot se God bambae i finisim olgeta giaman skul. (Revelesen 18:8) Bambae hem i mekem se wan wael animol we kala blong hem i laet red, i girap agensem ol giaman skul mo spolem hem fulwan. Wael animol ya i pijarem wan strong politik paoa. (Revelesen 17:16, 17) Baebol i talem se: “Samting ya nao bambae oli mekem long bigfala taon ya Babilon, mo bambae oli neva faenem hem bakegen.” (Revelesen 18:21) Taswe ol man we oli wantem mekem God i glad, oli mas “kamaot” long ol giaman skul mo no moa joen long olgeta.—2 Korin 6:14-17.