!Kingdom Blong God i Stap Rul Naoia!

Kingdom blong God i stat rul long heven long 1914. Long taem ya tu, lasdei blong rul blong man i stat. ?Olsem wanem yumi save samting ya? Bambae yumi luk sam profet tok we Baebol i talem, mo samting we i hapen long wol, mo fasin blong man stat long 1914 i kam.

1. ?Baebol i talem wanem profet tok?

Buk blong Daniel i tokbaot se Kingdom blong God, bambae i stat blong rul afta we “seven taem i pas.” (Daniel 4:16, 17) Plante handred yia biaen, Jisas i tokbaot taem ya se “taem blong ol nesen,” mo hem i tijim se taem ya i stap gohed yet. (Luk 21:24) Olsem we bae yumi luk, ol seven taem ya i finis long 1914.

2. ?Wanem ol samting mo ol fasin we i stap hapen stat long 1914?

Ol disaepol blong Jisas oli askem long hem se: “?Wanem saen bambae i soemaot se yu yu stap, mo se hem i lashaf blong sistem blong wol ya?” (Matiu 24:3) Long ansa blong Jisas, hem i tokbaot plante samting we bambae oli hapen afta we hem i kam King long Kingdom blong God long heven. Sam long ol samting ya hemia ol wo, kakae i sot, mo graon i seksek. (Ridim Matiu 24:7.) Mo tu, Baebol i talem se fasin blong ol man long “las dei” bambae i mekem i “had blong winim ol trabol” blong laef. (2 Timoti 3:1-5) Ol samting ya oli kam klia moa, stat long 1914.

3. ?From wanem laef i kam moa nogud taem Kingdom i stat rul?

Smoltaem afta we Jisas i kam King long Kingdom blong God long heven, hem i faet agensem Setan mo ol dimon blong hem. Setan i lusum faet ya. Baebol i talem se: “Nao oli slingim hem i kamdaon long wol” wetem “ol enjel blong hem.” (Revelesen 12:9, 10, 12) Setan i kros tumas from we i save se bambae oli distroem hem. Taswe hem i mekem ol man oli harem nogud mo oli safa long olgeta ples long wol. !Hemia nao from wanem ol samting oli kam moa nogud! Be Kingdom blong God bambae i finisim olgeta problem ya.

DIGIM MOA

4. Ol det mo ol namba long Baebol oli soem se Kingdom i rul long 1914

VIDEO: Kingdom Blong God i Stat Rul Long 1914 (5:02)

God i soem wan drim long King Nebukadnesa blong Babilon long saed blong fiuja. Yumi save ridim drim ya mo samting we Daniel i talem, long Baebol. I klia se drim ya i tokbaot rul blong Nebukadnesa mo Kingdom blong God.—Ridim Daniel 4:17.a

Ridim Daniel 4:20-26, mo biaen yusum jat blong ansa long ol kwestin ya:

• (A) ?Nebukadnesa i luk wanem long drim blong hem?—Luk vas 20 mo 21.

• (B) ?Wanem bambae i hapen long tri ya?—Luk vas 23.

• (C) ?Wanem bambae i hapen afta we “seven taem i pas”?—Luk vas 26.

Drim Blong Nebukadnesa i Joen Wetem Kingdom Blong God

PROFET TOK (Daniel 4:20-36)

Rul

(A) Wan bigfala tri

Rul i stop smol

(B) “Katemdaon tri ya,” mo letem “seven taem i pas”

Rul bakegen

(C) “Kingdom blong yu bambae i kam kingdom blong yu bakegen”

Faswan taem we profet tok ya i kamtru . . .

• (D) ?Tri ya i representem hu?—Luk vas 22.

• (E) ?Olsem wanem rul blong hem i stop?—Ridim Daniel 4:29-33.

• (F) ?Wanem i hapen long Nebukadnesa afta we “seven taem” i finis?—Ridim Daniel 4:34-36.

FASWAN TAEM WE PROFET TOK YA I KAMTRU

Rul

(D) Nebukadnesa, King blong Babilon

Rul i stop smol

(E) Afta 606 B.K.T., Nebukadnesa i lusum hed mo i no save rul gogo seven yia i pas

Rul bakegen

(F) Nebukadnesa i kamgud nao hem i rul bakegen

Seken taem we profet tok ya i kamtru . . .

• (G) ?Tri ya i representem hu?—Ridim 1 Kronikel 29:23.

• (H) ?Olsem wanem rul blong olgeta i stop? ?Olsem wanem yumi save se hem i stap yet olsem taem Jisas i stap long wol?—Ridim Luk 21:24.

• (I) ?Wetaem mo weples Kingdom ya i stanap bakegen?

SEKEN TAEM WE PROFET TOK YA I KAMTRU

Rul

(G) Ol king blong Isrel we oli representem rul blong God

Rul i stop smol

(H) Oli spolem Jerusalem, nao laen blong ol king blong Isrel i stop gogo 2,520 yia i pas

Rul bakegen

(I) Jisas i stat rul olsem King long Kingdom blong God long heven

5. Ol samting long wol oli jenis stat long 1914

Plei VIDEO.

VIDEO: Ol Samting Long Wol Oli Jenis Stat Long 1914 (1:10)

Jisas i tokbaot ol samting we bambae oli hapen afta we hem i kam King. Ridim Luk 21:9-11, mo tokbaot kwestin ya:

• ?Weswan long ol samting ya we yu bin luk se i hapen?

Aposol Pol i tokbaot fasin we ol man bambae oli gat long lasdei blong rul blong ol man. Ridim 2 Timoti 3:1-5, mo tokbaot kwestin ya:

• ?Weswan long ol fasin ya we yu makem long ol man tede?

6. Rul blong Kingdom i mas pulum yumi blong mekem sam samting

Ridim Matiu 24:3, 14, mo tokbaot ol kwestin ya:

• ?Wanem wok i soem se Kingdom blong God i rul finis?

• ?Olsem wanem yu save joen long wok ya?

Kingdom blong God i stap rul naoia, mo dei ya we bambae hem i rulum fulwol i klosap. Ridim Hibru 10:24, 25, mo tokbaot kwestin ya:

• ?Yumi evriwan i mas mekem wanem taem yumi “luk we dei ya i stap kam klosap”?

SAMARI

Ol profet tok, ol det mo namba, mo ol samting we oli hapen long wol oli pruvum se naoia Kingdom blong God i stap rul. Yumi soemaot se yumi bilif long ol samting ya taem yumi tokbaot Kingdom long ol narafala, mo yumi go long ol kongregesen miting.

Tingtingbak

• Folem profet tok blong Daniel, ?wanem i hapen afta we seven taem i pas?

• ?Wanem i pruvum long yu se Kingdom blong God i stat rul long 1914?

• ?Sipos yu bilif se Kingdom i stap rul, bambae yu mekem wanem?

FAENEMAOT

Luk samting we ol man blong histri mo ol narafala oli tokbaot, long saed blong ol jenis long wol stat long 1914.

“?Wetaem Ol Gudfala Fasin Oli Lus Hareap?” (Wekap!, Eprel 2007)

Ridim olsem wanem profet tok blong Matiu 24:14 i afektem laef blong wan man.

“!Mi Laekem Besbol Tumas!” (Wajtaoa N. 3 2017)

?Olsem wanem yumi save se profet tok long Daniel japta 4 i laenap wetem Kingdom blong God?

“When Did God’s Kingdom Begin Ruling? (Part 1)” (Wajtaoa, 1 Oktoba 2014)

?Wanem i soem se “seven taem” we Daniel japta 4 i tokbaot i finis long 1914?

“When Did God’s Kingdom Begin Ruling? (Part 2)” (Wajtaoa, 1 Novemba 2014)