Respektem Tingting Blong Narafala—?Olsem Wanem Baebol i Save Givhan?

“Pis i save stap nomo sipos ol man oli respektem tingting blong ol narafala.”—UNESCO Declaration of Principles on Tolerance, 1995.

Sipos ol man oli no gat respek long ol narafala, oli save agensem olgeta. Nao filing ya i save mekem se oli tok nogud long narafala blong soemaot se oli no laekem hem, oli mekem i moa gud long samfala i bitim ol narafala, mo oli faetem mo kilim man we oli no laekem.

Be i gat defdefren tingting long fasin ya blong respektem tingting blong narafala. Samfala oli ting se blong respektem tingting blong narafala, oli mas agri long enikaen fasin we hem i mekem. Sam narafala oli gat tingting we Baebol i talem, se yumi mas respektem raet blong narafala blong jusum ol fasin mo bilif we hem i wantem folem, nating se yumi no agri long olgeta.

?Olsem wanem? Long taem blong yumi, ?Baebol i save halpem yumi blong respektem tingting blong narafala?

?Baebol i talem wanem?

Baebol i talem se yumi mas respektem tingting blong ol narafala, i se: “Yufala i mas soemaot long olgeta man se yufala i no stap mekem i strong tumas long ol narafala.” (Filipae 4:5) Baebol i pulum yumi blong tingbaot ol narafala, kaen long olgeta, mo mekem i stret long olgeta. Maet yumi no agri wetem ol fasin mo bilif blong ol narafala, be yumi respektem raet blong olgeta blong jusum rod we oli wantem folem.

Baebol i soemaot ol fasin we God i glad long olgeta, i se: “Man blong wol, [God] i talem long yu finis wanem i gud.” (Maeka 6:8) God i talemaot long Baebol, wanem we i save halpem ol man blong oli gat wan gudfala laef.—Aesea 48:17, 18.

God i no givim raet long yumi blong jajem narafala. Baebol i talem se: “I gat wan man nomo we i Man Blong Givim Loa mo i Jaj . . . ?yu yu hu blong yu jajem neba blong yu?” (Jemes 4:12) God i letem yumi wanwan i jusum rod blong yumi, mo yumi mas akseptem frut we i kamaot from.—Dutronome 30:19.

?Baebol i talem wanem long saed blong respek?

Baebol i talem se yumi mas “gat respek long evriwan.” (1 Pita 2:17, New Jerusalem Bible) Taswe, olgeta we oli wantem folem ol advaes blong Baebol, oli respektem olgeta man, nomata wanem bilif o fasin blong laef oli jusum. (Luk 6:31) Hemia i no min se olgeta we oli folem Baebol oli agri wetem evri bilif mo tingting blong ol narafala, mo sapotem evri desisen we oli mekem. Be oli traehad blong folem fasin we Jisas i mekem long ol man, i bitim we oli mekem i nogud long olgeta mo oli no soemaot respek.

Wan taem, Jisas i bin mitim wan woman we i folem wan skul we Jisas i no agri long hem. Mo tu, woman ya i stap wetem wan man we i no hasban blong hem, hemia wan fasin we Jisas i no agri long hem. Nating se i olsem, Jisas i soemaot respek long woman ya.—Jon 4:9, 17-24.

Olsem Jisas, ol Kristin oli rere blong eksplenem bilif blong olgeta long ol man we oli wantem save, be oli mekem wetem “bigfala respek.” (1 Pita 3:15) Baebol i talem long ol Kristin se oli no mas fosem narafala blong agri long tingting blong olgeta. Mo Baebol i talem se wan man blong Kraes “i no mas faet, [be] hem i mas kaen long evriwan,” hemia i minim tu ol man we oli gat defren bilif.—2 Timoti 2:24.

?Baebol i talem wanem long saed blong fasin blong agensem narafala?

Baebol i talem se yumi mas “traehad blong gat pis wetem olgeta man.” (Hibru 12:14) Man we i traehad blong gat pis, i sakemaot fasin blong agensem narafala. I tru, hem i no mekem ol fasin we hem i no agri long olgeta, be hem i traehad blong gat pis wetem ol man raonabaot long hem. (Matiu 5:9) Mo tu, Baebol i pulum ol Kristin blong lavem ol enemi blong olgeta. Oli mekem olsem taem oli soemaot kaen fasin long ol man we oli mekem i nogud long olgeta.—Matiu 5:44.

Baebol i talem se God i “no laekem nating” ol aksen we oli daonem o mekem i nogud long ol narafala. (Ol Proveb 6:16-19) Be Baebol i yusum tok ya “no laekem nating” blong eksplenem strong filing we yumi mas gat agensem ol nogud aksen. Baebol i soemaot se God i rere blong fogivim mo halpem ol man we oli wantem jenisim fasin blong olgeta mo folem ol fasin we hem i glad long olgeta.—Aesea 55:7.

Ol vas we oli joen wetem fasin blong respektem tingting blong narafala

Taetas 3:2: “Oli mas rere blong lego prapa tingting blong olgeta, mo taem oli stap wetem ol narafala oli mas gat kwaet fasin.”

Matiu 7:12: “Olgeta samting we yufala i wantem blong ol man oli mekem long yufala, yufala tu i mas mekem long olgeta.”

Josua 24:15: “Naoia yufala i mas jusum wanem god we bambae yufala i wosipim.”

Ol Wok 10:34: “God i stap mekem i sem mak nomo long olgeta man.”

Habakuk 1:12, 13: “[God,] yu no glad long ol fasin nogud.”

Rom 12:19: “Yufala i letem God i soemaot kros blong hem long man we i mekem rong, from we Baebol i talem se: ‘Jehovaa i talem se, “Mi bambae mi givimbak. Mi nao bambae mi givim panis.”’”

Jehova God i no givim raet long eniman blong i givimbak ol nogud fasin long narafala. Hem bambae i meksua se stret fasin i win long taem we hem i makemaot finis. Blong save moa, ridim atikol ya “?Yu Ting Se i Save Gat Jastis Long Wol?”