Wan Kwestin

?Ol kristin oli mas tingbaot promes blong mared olsem wanem?

Taem wan man mo woman, tufala i mekem promes blong Mared, tufala i glad tumas, be tu, hemia wan impoten samting blong tingbaot. Wan Kristin we i strong long saed blong spirit, hem i no save ting nating long promes blong mared. Taem hem i mekem promes ya finis, hem i no mas ting se hem i save brekem promes ya bakegen from eni risen nomo. Afta we wan man mo woman, tufala i mekem promes ya, tufala i save tekem taem ya blong kasem save gud long tufala bifo we tufala i mared.

Taem yumi stap tokbaot fasin blong mekem promes blong mared, i gud blong tingbaot se ol man oli gat plante defren kastom long saed ya mo ol kastom ya oli stap jenisim oltaem. Baebol i givim sam eksampel.

Tufala gel blong Lot, we “i no gat man i go long tufala yet,” i olsem we i gat man i promes finis blong mared wetem tufala. Tufala man ya, bambae tufala i maredem tufala gel blong Lot. Be, Baebol i no talem from wanem no olsem wanem oli mekem promes long tufala gel ya. ?Tufala gel ya oli bigwan finis? ?Tufala i naf blong jusum hu man tufala i wantem maredem? ?Oli mekem sam samting long fes blong ol man blong soemaot se oli promes finis blong mared long tufala? Yumi no save talem stret ansa. (Jenesis 19:​8-​14) Samting we yumi save, hemia se Jekob i agri blong wok seven yia wetem papa blong Rejel, blong i save mared long Rejel. Long ol yia ya, nating se Jekob mo Rejel, tufala i no slip tugeta, be Jekob i stap singaot Rejel se “woman blong mi.” (Jenesis 29:18-​21, NW) Narafala eksampel, hemia Deved. Bifo we Deved i save maredem gel blong Sol, hem i mas winim wan faet wetem ol man Filistia. Ale Deved i winim ol man Filistia olsem we Sol i askem. Nao biaen, hem i save maredem Mikal, dota blong Sol. (1 Samuel 18:20-​28) Tufala fasin ya blong mekem “promes blong mared,” tufala i no sem mak. Mo long plante kantri tede, ol man oli gat ol defdefren kaen kastom long saed ya.

Loa blong Moses i givim sam rul long saed blong mared mo promes blong mared. Eksampel, wan man i save gat bitim wan waef. Hem i save mekem divos from defdefren risen, be waef blong hem i no save mekem olsem. (Eksodas 22:16, 17; Dutronome 24:​1-4) Wan man we i fosem wan gel we i neva slip wetem wan man, hem i mas mared wetem gel ya sipos papa blong hem i agri, mo man ya i no save mekem divos long hem. (Dutronome 22:28, 29) I gat sam narafala loa long saed blong mared, olsem long taem we man mo woman blong hem, tufala i no save slip tugeta. (Levitikas 12:​2, 5; 15:24; 18:19) ?Wanem ol rul we oli joen wetem promes blong mared?

I gat wan loa long saed blong wan woman Isrel we wan man i promes finis blong mared wetem hem. Folem loa ya, i olsem we woman ya i mared finis. Loa ya i no go long woman we wan man i no promes yet blong mared wetem hem. (Dutronome 22:23-​29; Matiu 1:​18, 19) Ol man Isrel oli no save mekem promes blong mared wetem eni famle blong olgeta. Hemia i from we olgeta oli blong sem laen. Mo tu, samfala promes blong mared mo sam mared, loa i blokem blong mekem se oli no lusum raet we oli gat long olting blong olgeta. (Levitikas 18:​6-​20; lukluk Wajtaoa blong Maj 15, 1978, pej 25-28,​—⁠Engglis). Yes, i klia nomo se ol man blong God oli no mas ting nating long promes blong mared.

Ol man Isrel oli mas folem olgeta rul ya we oli stanap long Loa. Be ol Kristin oli no stap aninit long Loa ya, wetem ol rul blong hem long saed blong fasin we man i blokem woman mo mared. (Rom 7:​4, 6; Efesas 2:​15; Hibru 8:​6, 13) Mo tu, Jisas i tijim se fasin we ol Kristin oli folem long saed blong mared i defren long hemia we Loa i tijim. (Matiu 19:​3-9) Be samting ya i no minim se Jisas i daonem mared mo fasin blong mekem promes blong mared. Taswe, ?wanem tingting blong ol Kristin long saed blong promes blong mared?

Long plante kantri, ol man wanwan oli jusum hu bambae oli mared wetem. Taem wan man mo woman, tufala i mekem promes blong mared, ol man oli luk tufala olsem we tufala i agri finis blong mared. Plante taem, oli no mekem wan narafala samting antap long promes we oli mekem finis blong mared. Long sam ples, man i givim wan ring long woman we bambae i mared wetem hem, blong soemaot se hem i promes finis blong mared wetem woman ya. Plante taem, oli talemaot samting ya long ol famle mo ol fren taem famle i stap kakae wanples no long wan narafala taem olsem. Hemia i disisen blong wanwan man. Baebol i no putum wan rul long saed ya. Taem wan man i promes blong mared wetem wan woman, hemia i minim se tufala i agri finis blong mared.a

Wan Kristin i no mas hareap blong fren blong mared, mekem promes blong mared, no blong mared. Mifala i wokem sam buk long saed blong Baebol we oli save halpem olgeta we oli no mared yet, blong luk sipos i waes blong stat fren no mekem promes blong mared no blong mared.b Wan impoten samting long ol advaes ya, hemia se wan Kristin mared i mas stanap strong go kasem en blong hem.​—Jenesis 2:​24; Mak 10:​6-9.

Wan Kristin man mo woman, tufala i mas savegud tufala bifo we tufala i mekem promes blong mared. Wanwan long tufala i save askem se ‘?Mi rili sua se brata no sista ya i strong long saed blong spirit mo hem i onagud long God? ?Mi mi save pijarem long tingting blong mi we mitufala i mekem wok blong Jeova long ful laef blong mitufala? ?Mitufala i tekem inaf taem blong savegud ol prapa fasin blong mitufala? ?Mi mi sua se bambae mitufala i save joengud go kasem en? ?Mitufala i savegud ol samting we mitufala i mekem long laef blong mitufala bifo mo naoia?’

Taem tu Kristin tufala i mekem promes blong mared, i stret nomo blong tufala mo blong ol narafala blong tingbaot se i no longtaem, bambae tufala i mared. Jisas i givim advaes ya se: “Sipos yu talem se ‘Yes’, yu mas talem ‘Yes’ nomo. Mo sipos yu talem se ‘No’, yu mas talem ‘No’ nomo.” (Matiu 5:​37) Ol Kristin we oli mekem promes blong mared, oli mas holem promes ya. Be sam samtaem, afta we wan Kristin i promes blong mared wetem narafala, hem i faenemaot wan problem we narafala ya i no bin talemaot long hem fastaem, no i haedem. Maet i wan problem we i kamaot from fasin we narafala ya i bin mekem bifo, maet fasin blong brekem loa no blong slip olbaot. Kristin we i kasem save long samting ya i mas tekem disisen se wanem nao bambae hem i mekem. Maet bambae tufala i storeyan gud long saed blong bisnes ya mo gohed blong holem promes we tufala i bin mekem blong mared. No maet tufala i agri blong brekem promes blong mared blong tufala. Tufala nomo i mas mekem disisen long saed ya. Ol narafala oli no gat raet blong pusum nus long bisnes ya no jajem tufala from. Nating se i olsem, tufala i mas skelemgud disisen we tufala i tekem. Be tu, maet hemia we i kasem save long problem ya, i wantem brekem promes we tufala i bin mekem blong mared, nating se narawan i wantem se promes ya i gohed.​—Lukluk haf ya “Wan Kwestin” long Wajtaoa blong Jun 15, 1975 (Engglis).

I gud blong stretem ol samting olsem bifo long mared. Jisas i talem se Baebol i givim wan risen nomo blong mekem divos mo mared bakegen. Risen ya, hemia por·neiʹa, fasin blong slip wetem narafala we i no man no woman blong hem. (Matiu 5:​32; 19:9) Jisas i no talem se man mo woman, tufala i save divos sipos wan i kasem save long wan problem no wan rong we narawan long tufala i mekem bifo long mared.

Eksampel, long taem blong Jisas, man i save kasem leprosi isi nomo. Sipos wan man Jyu i kasem save se waef (nating se woman ya i save no nogat) blong hem i kasem leprosi finis taem tufala i mared, ?bambae man ya i mekem wanem? ?Hemia wan risen blong hem i mekem divos long woman blong hem? Nogat. Maet wan man Jiu we i stap aninit long Loa i save mekem olsem, be Jisas i no talem se ol man blong hem oli save mekem divos from risen ya. Tingbaot sam eksampel long taem blong yumi. Maet wan man we i kasem ol sik olsem sifilis, AIDS, no wan narafala sik olsem, hem i mared be i no talemaot se hem i gat sik ya. Maet hem i kasem sik ya from we hem i slip olbaot bifo no long taem we hem i promes blong mared long wan woman. Biaen, taem waef blong hem i kasem save se hem i gat wan nogud sik no i bin slip olbaot fastaem (no i kasem save se man ya i no save gat pikinini,) samting ya i no jenisim tingting ya se tufala i mared finis. Sipos man ya i bin mekem rabis fasin bifo we tufala i mared, Baebol i no talem se hemia i wan risen blong mekem divos. Samting ya i sem mak nomo long woman we i kasem wan kaen sik no i haedem long man blong hem se hem i gat bel blong narafala man. Naoia tufala i mared finis mo tufala i agri blong laef tugeta.

Tru ya, wanwan taem nomo ol samting olsem oli hapen. Be ol eksampel ya, oli makemgud impoten poen ya se: Yumi mas ting hevi long promes we yumi mekem blong mared wetem narafala. Bifo we tufala Kristin i mekem promes blong mared mo afta long taem ya, tufala i mas traehad blong savegud tufala. Tufala wanwan i mas talem trutok long saed blong samting we narafala i wantem no i gat raet blong save long hem. (Long sam kantri, loa i askem ol man mo woman we oli wantem mared blong go luk dokta bifo we oli mared. Sam narafala oli mekem olsem jes from we oli wantem save helt blong olgeta.) Sipos wan man mo woman, tufala i folem ol rod ya, bambae tufala i glad mo i ting hevi long promes we tufala i mekem blong mared, mo bambae tufala i mekem ol fasin we i blong ona nomo taem tufala i stap rere blong kasem wan mak we i moa impoten mo i givim moa glad, hemia mared.​—Ol Proveb 5:​18, 19; Efesas 5:​33.

[Ol futnot]