Talem Strong Ol Stret Tok Long Vas We Yu Ridim

NATING se yu toktok long wan man nomo blong talemaot stamba tingting blong God, no yu tokbaot samting ya antap long stej, be tok blong yu i mas stanap long Tok blong God. Taswe, yu ridim sam vas blong Baebol. Be yu mas ridim gud ol vas ya.

Voes Blong Yu i Soemaot Ol Defren Fasin. Taem yu ridim ol vas, voes blong yu i mas soemaot ol defren fasin. Yu traem tingbaot ol vas ya. Taem yu ridim Ol Sam 37:11, voes blong yu i mas glad. Hemia i soemaot se yu stap tingbaot taem ya we promes ya blong pis bambae i kamtru. Taem yu ridim Revelesen 21:4 we i talem se bambae man i no moa ded mo i no moa harem nogud, voes blong yu i mas soemaot se yu tinghevi long bigfala jenis ya we bambae i kamaot. Taem yu ridim Revelesen 18:2, 4, 5, we i talem stret se yumi mas kamaot long ‘Bigfala Babilon’ we i fulap long sin, voes blong yu i mas soemaot se man i mas hareap blong mekem samting ya. Be yu no mas bitim mak. Fasin we yu yu soemaot long voes blong yu i mas kamaot long hat blong yu. Yu save soemaot fasin ya go kasem mak we i stret, sipos yu tingbaot ol tok long vas we yu ridim, mo yu tingbaot poen we yu wantem se vas ya i pruvum.

Yu Talem Strong Ol Stret Tok. Taem yu ridim wan vas nao yu wantem yusum wan haf blong vas ya blong soemaot wan poen, yu mas talem strong haf ya. Olsem nao, long Matiu 6:33 (NW), ating yu wantem soemaot mining blong tok ya ‘lukaot kingdom fastaem.’ Sipos i olsem, bambae yu no talem strong ol tok ya “stret fasin blong hem” mo “olgeta narafala samting,” be bambae yu talem strong ol tok ya ‘lukaot Kingdom fastaem.’

Maet yu gat wan tok long Miting Blong Kingdom Wok, nao yu wantem ridim Matiu 28:19. ?Wanem ol tok long vas ya we yu mas talem strong? Sipos yu wantem givhan long ol brata mo sista blong oli traehad blong statem ol Baebol stadi, yu mas talem strong ol tok ya “pulum olgeta oli kam man blong mi.” Be sipos yu stap tokbaot wok blong ol Kristin blong serem trutok blong Baebol wetem ol man blong ol narafala lanwis, bambae yu talem strong ol tok ya “ol man long olgeta ples long wol.” Bambae yu talem strong ol tok ya tu sipos yu wantem pulum sam pablisa blong oli go wok long ples we i gat moa nid.

Plante taem yumi yusum wan vas blong ansarem wan kwestin, no blong sapotem wan tingting we maet plante man oli no agri long hem. Sipos yu talem strong evri tingting long vas ya, ating ol man bambae oli no kasem save se vas ya i joen olsem wanem long poen we yu stap tokbaot. Ating yu yu kasem save klia nomo, be olgeta nogat.

Olsem nao, maet yu ridim Jon 17:3 we i tokbaot laef we i no save finis. Sipos yu wantem soemaot samting we man i mas mekem blong kasem laef we i no save finis, bambae yu talem strong ol tok ya “man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” Be sipos yu stap yusum vas ya blong soemaot wanem blesing we man i save kasem, bambae yu talem strong ol tok ya “laef ya,” i min se laef we i no save finis. Hemia i sem mak taem yu yusum Jemes 2:24 blong soemaot se i mas gat wok i joen wetem bilif. Yu mas talem strong ol tok ya “ol samting we hem i mekem.” Sipos yu talem strong ol narafala tok ya, “God i mekem man i stret man long fes blong hem,” ating ol man bambae oli mestem poen.

Wan narafala vas blong givhan long yu blong kasem save long poen ya, hemia Rom 15:7-13. Hemia haf blong leta we aposol Pol i raetem i go long wan kongregesen, we i gat sam man Jiu long hem mo sam man blong ol narafala laen tu. Ale, aposol ya i talem se wok blong prij olsem Kraes i mekem, i givhan long ol man Jiu we oli sakomsaes, mo i givhan tu long ol man blong ol narafala laen. Wok ya i “mekem rod blong ol man we oli no laen blong Isrel oli save leftemap nem blong God, from we hem i gat sore long olgeta.” Nao Pol i yusum fo vas blong Baebol blong pulum tingting blong olgeta i go long janis ya we ol man blong ol narafala laen oli gat. Sipos yu wantem talem strong poen ya we Pol i makemaot, ?yu mas ridim ol vas ya olsem wanem? Long vas 9, yu mas talem strong ol tok ya, “ol man we oli no laen blong Isrel.” Long vas 10, yu mas talem strong ol tok ya, “yufala we i no laen blong Isrel.” Long vas 11, yu mas talem strong ol tok ya, “yufala we i no laen blong Isrel” wetem “ol man blong olgeta ples.” Mo long vas 12, yu mas talem strong ol tok ya, “ol man blong ol narafala kantri.” Ale i gud yu ridim Rom 15:7-13 mo yu traem talem strong ol haf ya. Bambae yu luk se poen we Pol i tokbaot i kam klia, mo i isi blong kasem save long hem.

Ol Rod Blong Talem Strong Ol Tok. I gat plante rod blong makemaot bigfala tingting long vas we yu ridim. Rod we yu yusum i mas stret long ol tok long vas ya, mo long ol man we yu stap toktok long olgeta. Hemia sam rod.

Yu jenisim voes. Yu jenisim voes blong yu blong mekem se bigfala tingting i defren long ol narafala tok we yu ridim. Maet yu mekem voes blong yu i strong no yu mekem i kam kwaet moa. Long plante lanwis, yu save mekem se sam tok oli defren long ol narafala tok taem yu mekem voes blong yu i go antap. Be long sam lanwis i no stret blong mekem olsem, from we i save jenisim mining blong tok we yu talem. Sipos yu pulum moa ol stamba wod, hemia i save mekem ol tok ya oli hevi moa. Long ol lanwis we man i no save jenisim voes blong mekem se sam tok oli defren long ol narafala tok, yu mas folem samting we ol narafala man oli mekem taem oli wantem talem strong ol tok long lanwis ya.

Yu spel smol. Yu save spel smol bifo no afta we yu ridim impoten haf blong wan vas. No yu save spel long tufala ples ya wantaem. Sipos yu spel smol bifo we yu ridim wan bigfala poen, yu pulum ol man blong oli lesin gud long wanem we bambae yu talem biaen. Sipos yu spel smol afta we yu ridim wan bigfala poen, yu givhan blong mekem poen ya i stap gud long tingting blong ol man. Be yu no mas bitim mak. Sipos yu spel smol long evri tok, bambae i no gat wan tok we ol man oli luk se i defren long ol narawan.

Yu ridim bakegen. Narafala rod blong talem strong wan poen, se yu stop afta we yu ridim sam tok, nao yu ridim bakegen. Plante man oli laekem moa blong finisim ful haf we oli stap ridim, nao biaen oli ridim bakegen stamba poen blong hem.

Yu muvum han, bodi, mo fes. Yu save soemaot moa ol fasin long ol tok we yu ridim, sipos yu muvum bodi mo fes blong yu.

Tiun blong voes. Long sam lanwis, man i save jenisim tiun blong voes blong mekem mining blong sam tok we hem i ridim i kamaot klia, mo i mekem se sam tok oli defren long ol narafala tok we hem i ridim. Be man i mas lukaot gud taem i yusum fasin ya, antap moa, sipos hem i ridim sam tok we wan man i talem blong jikim narafala.

Narafala i Ridim Vas. Taem man blong haos i ridim vas, maet hem i no talem strong ol stret tok, no maet hem i no talem strong wan tok nating. ?Long taem olsem, yu save mekem wanem? I gud yu eksplenem vas ya mo yu tokbaot se i joen olsem wanem wetem samting we yu stap tokbaot. Afta, yu save talem ol stret tok blong vas ya we oli givim tingting ya.