?Baebol i Save Kamfotem Mi?
Ansa we Baebol i givim
Yes. (Rom 15:4) Tingbaot sam vas blong Baebol we oli kamfotem plante man finis long ol hadtaem we oli fesem, o taem tingting mo filing blong olgeta i trabol.
Long atikol ya
Ol problem
Ol Sam 23:4: “Nating se mi wokbaot long vali we i tudak olgeta, mi no fraet se wan samting i save spolem mi, from yu yu stap wetem mi.”
Mining: Yu save fesem ol problem wetem strong tingting, sipos yu prea long God, mo folem Tok blong hem Baebol.
Filipae 4:13: “Mi mi gat paoa blong fesem olgeta samting from God ya we i givim paoa long mi.”
Mining: God i save givim paoa long yu blong stanap strong agensem enikaen problem.
Wan fren o famle i ded
Prija 9:10: “I no gat wok, o plan, o save, o waes long Gref.”
Mining: Ol dedman oli no stap safa, mo oli no save spolem yumi. Olgeta oli no save wan samting.
Ol Wok 24:15: “Ol man . . . bambae oli laef bakegen.”
Mining: God i save mekem ol fren mo famle we oli ded finis, oli laef bakegen.
Gilti bitim mak
Ol Sam 86:5: “O Jehova,a yu yu gud mo yu rere blong fogif. Yu lavem tumas olgeta we oli stap singaot i kam long yu.”
Mining: God i fogivim olgeta we oli rili sore from ol mastik we oli mekem bifo, mo oli gat strong tingting blong no mekem bakegen.
Ol Sam 103:12: “Hem i putum ol sin blong yumi oli stap longwe we longwe long yumi, olsem we is i stap longwe we longwe long wes.”
Mining: Taem God i fogivim yumi, hem i putum ol sin blong yumi oli go longwe. Hem i no rimaenem yumi bakegen mo bakegen blong panisim yumi.
Harem nogud
Ol Sam 31:7: “Yu luk finis ol trabol blong mi. Yu save gud samting we i mekem mi mi harem nogud bitim mak.”
Mining: God i save gud evri samting we yu yu safa from. Hem i kasem save long ol dip filing blong yu, nating se ol narafala oli no kasem save.
Ol Sam 34:18: “Jehova i stap klosap long olgeta we hat blong olgeta i brok, hem i sevem olgeta we tingting blong olgeta i foldaon.”
Mining: God i promes blong givhan long yu taem yu harem nogud. Hem i save givim paoa long yu blong stanap strong.
Sik
Ol Sam 41:3: “Jehova bambae i gohed blong lukaot long hem taem hem i stap ledaon long bed blong sikman.”
Mining: Taem yu kasem wan strong sik, God i save putum pis long tingting blong yu, givim paoa blong yu stanap strong, mo givim waes blong mekem ol gudfala desisen.
Aesea 33:24: “Bambae i no gat wan man long ples ya i talem se: ‘Mi mi sik.’”
Mining: God i promes se bambae i gat wan taem we ol man oli gat gudfala helt.
Stres mo wari
Ol Sam 94:19: “Taem mi wari bitim mak, yu mekem mi harem gud, mo yu mekem tingting blong mi i kwaet.”
Mining: Sipos yumi prea long God taem yumi harem se yumi stres, hem i save mekem tingting blong yumi i kam kwaet.
1 Pita 5:7: “Yufala i mas lego ol wari blong yufala long hem, from we hem i kea long yufala.”
Mining: God i tingbaot yumi taem yumi stap safa. Hem i askem long yumi blong prea long hem long saed blong ol wari blong yumi.
Ol wo
Ol Sam 46:9: “Hem i stap finisim ol wo long olgeta ples long wol.”
Mining: I no longtaem Kingdom blong God bambae i finisim ol wo.
Ol Sam 37:11, 29: “Ol man we oli gat tingting daon bambae oli tekem wol ya i blong olgeta, mo bambae oli glad tumas from oli gat pis we i bigwan tumas. . . . Ol stret man bambae oli tekem wol ya i blong olgeta, mo bambae oli stap long hem blong olwe.”
Mining: Ol gudfala man bambae oli harem gud blong olwe long wol ya we i fulap long pis.
Wari long saed blong fiuja
Jeremaea 29:11: “‘Mi mi save gud ol tingting we mi stap tingbaot blong mekem long yufala, hemia tingting blong givim pis, be i no trabol, blong givim wan fiuja mo wan hop long yufala,’ hemia nao tok blong Jehova.”
Mining: God i promes se ol man blong hem oli save gat wan hapi fiuja.
Revelesen 21:4: “Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”
Mining: God i promes se bambae hem i finisim ol nogud samting we oli stap hapen long yu mo ol narafala.
a Jehova i prapa nem blong God. (Ol Sam 83:18) Luk atikol ya “?Hu Ya Jehova?”