“Mi Nidim Blong Trastem God”

Wan man i livim wan leta i stap long Haos Kingdom blong ol Witnes blong Jeova long Edmonton, Alberta, Kanada. Tok blong hem i olsem:

“Man Blong Karem Mesej:

“Mi raetem leta ya blong talem tangkiu long wan man we i mekem wan merikel i kamaot long laef blong mi, be ating hem i no save.

“Tu wik i pas finis, mi mo man blong mi i stap rao bigwan. Mi mi bin talem se: ‘Trabol ya i bigfala tumas, mi no save sipos mi save fogetem.’ Semtaem, wan man i kilkilim doa. Hemia wan Witnes blong Jeova, be mi no moa gat taem blong haed.

“Ale, mi openem doa, be mi no rili lesin long samting we hem i stap talem, from we tingting blong mi i stap long narafala samting. Mi tingbaot nomo we hem i bin talem tok ya ‘pikinini’ mo ‘famle.’ Hem i soem wan buk long mi, nem blong hem, Spesel Rod Blong Mekem Famle i Hapi. Taem mi luk nem blong buk ya mi stat krae, mo mi no save stop. Hem i lukluk mi, i talem sore we hem i mekem mi mi harem nogud, i givim buk ya long mi, mo hem i gobak.

“?Wanem ya merikel we mi tokbaot? Hem i pulum mi blong tingbaot se taem mi no save wanem blong mekem, mi no mas wari from we God i save. Mi nidim blong trastem God. Hem i sanem wan man blong karem mesej ya i kam long mi tu. Tangkiu.”

Buk ya Spesel Rod Blong Mekem Famle i Hapi i save givhan long evriwan long famle. Sam japta blong hem we oli tijimgud famle, hemia “Blokem Ol Samting We Oli Save Spolem Famle Blong Yu,” “Holem Pis Insaed Long Famle,” mo “Yu Save Winim Ol Problem We Oli Spolem Famle.”

Sipos yu yu wantem buk ya, fulumap smol bokis daon long pej ya mo sanem i kam long adres we i stret long yu long pej 5. Bambae buk ya i givim ol stret advaes long yu blong winim ol trabol long famle mo mekem famle laef i hapi, olsem we Man Blong Wokem Yumi i wantem fastaem.

□ Plis sanem buk ya long mi Spesel Rod Blong Mekem Famle i Hapi.

□ Plis, mi mi wantem se wan man i kam luk mi blong mekem Baebol stadi wetem mi we mi no pem.