Baebol i Talem Wanem

?God i Stap Jenis?

MAN ya George Dorsey, we i stap stadi long fasin blong ol man, i talem se God blong “Oltesteman” i wan God we i “raf mo i wael tumas.” Hem i gohed se: “Yahweh i . . . gat nogud fasin. Hem i God blong ol man we oli stil, kilim man, faet, mo ol man we oli wantem win nomo.” Sam narafala oli talem semfala samting long saed blong God ya blong “Oltesteman,” Yahweh no Jeova. Taswe, samfala tede oli wantem save sipos Jeova i rili wan God we i mekem man i harem nogud, be i jenisim fasin blong hem long “Niutesteman” blong kam wan God we i gat lav mo sore.

Tingting ya long saed blong God i no jes kamaot. Wan man long ol yia 200 we i gat tingting lelebet olsem ol Nostik,a nem blong hem Marcion, hem nao i faswan blong daonem God ya blong “Oltesteman.” Hem i ting se God ya i raf, i wantem win, mo hem i wan strong rula we i givim presen long ol man blong switim olgeta nomo blong oli mekem wosip long hem. Be, Marcion i ting se God blong “Niutesteman” we Jisas Kraes i soemaot fasin blong hem, hem i stretgud, i gat lav mo sore, i fulap long gladhat mo hem i fogivim man.

Jeova i Save Mekem Ol Defdefren Kaen Wok

Prapa nem blong God, Jeova, i minim “Hem i Mekem i Kamaot.” Tok ya i soem se Jeova i save mekem enikaen wok we hem i nidim blong mekem, blong ol promes blong hem oli kamtru. Moses i bin askem nem blong God, nao Jeova i talem mining blong nem blong hem se: “Mi Stap We Mi Stap.” (Eksodas 3:14) Baebol blong Rotherham i tanem vas ya olsem: “Bambae mi mi kam olsem we mi mi wantem.”

Ale, Jeova i save kam, no stap olsem we hem i wantem, blong mekem ol gudfala tingting mo promes blong hem oli kamtru. Samting we i soemaot poen ya, hemia ol defren kaen taetel, no nem, we Baebol i putum long hem olsem: Jeova blong ol ami, Jaj, King, Jelas, King mo Masta, Man Blong Wokem olgeta samting, Papa, Bigfala Tija, Man Blong Lukaot long sipsip, Man Blong Harem ol prea, Man Blong Pemaot ol man, hapi God, mo plante narawan bakegen. Hem i jusum blong mekem olgeta wok ya, mo sam narafala wok bakegen, blong mekem ol tingting blong hem oli kamtru wetem lav.—Eksodas 34:14, NW; Jajes 11:27, NW; Ol Sam 23:1, NW; 65:2, NW; 73:28; 89:26; Aesea 8:13, NW; 30:20, NW; 40:28, NW; 41:14, NW; 1 Timoti 1:11, NW.

?Hemia i min se God i stap jenjenisim prapa fasin blong hem mo ol rul we hem i putumap? Nogat. Long saed blong God, Jemes 1:17 i talem se: “Fasin blong hem i no save jenis, mo hem i no save tanem baksaed long yumi blong livim yumi long tudak.” ?Olsem wanem God i save winim ol defren samting we oli kamaot sipos hem i no jenjenisim fasin blong hem?

Bambae yumi kasem save olsem wanem hem i mekem olsemia, sipos yumi tingbaot wan papa no mama we i mekem ol defdefren wok blong lukaotgud long pikinini blong hem we hem i laekem tumas. Long wan dei nomo, maet hem i kuk, klinim haos, wokem lektrik, mo hem i mekem wok blong nes, fren, man blong givim advaes, tija, man blong stretem narafala, mo plante narafala samting. Papa no mama ya i no jenjenisim prapa fasin blong hem blong mekem ol wok ya, hem i jes mekem samting we i laenap wetem wanem we i nidim blong mekem. Sem samting i tru long saed blong Jeova, be long fasin we i bigwan moa. Jeova i save karem eni kaen fasin we i stret blong givhan blong mekem ol tingting blong hem oli kamtru, mo blong mekem i gud long ol man we hem i wokem.—Rom 11:33.

Hibru mo Grik haf blong Baebol tugeta oli soemaot se Jeova i gat lav mo sore. Long ol yia 700 B.K.T., profet Maeka i tokbaot Jeova se: “Hae God. I no gat wan narafala god we i olsem yu. Bambae yu save fogivim olgeta we oli stap kamaot biaen long mifala, yu save tekemaot ol sin blong olgeta. Taem yu yu kros, be kros blong yu i no save stap longtaem. Oltaem yu yu glad blong soemaot long mifala we yu stap lavem mifala tumas.” (Maeka 7:18) Aposol Jon tu i raetem tok we ol man oli save long hem se: “God i stamba blong fasin ya blong lavem man.”—1 Jon 4:8.

Be, tufala haf blong Baebol oli soemaot tu se Jeova i wan stret Jaj blong ol man we oli wantem nomo blong agensem loa blong hem oltaem mo spolem narafala. Man blong raetem Sam i talem se: “Bambae [“Jeova,” NW ] i spolem olgeta we oli stap mekem ol fasin nogud.” (Ol Sam 145:20) Mo tu, Jon 3:36 i talem se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem. Mo man olsem, God bambae i stap kros long hem olwe nomo.”

Ol Fasin Blong Hem Oli No Jenis

Prapa fasin blong Jeova mo ol stamba fasin blong hem olsem lav, waes, stret fasin, mo paoa, oli no stap jenis. Hem i talem long ol man Isrel se: “Mi mi Hae God, mo mi no save jenis samtaem.” (Malakae 3:6) Hemia 3,500 yia afta we hem i wokem faswan man. Taem yumi stadi gud long Baebol, yumi luksave se tok ya i tru. God i no stap jenjenisim ol rul we hem i putumap mo ol fasin blong hem. Long ol yia we oli pas, Jeova i no kam sofsof moa long ol fasin blong hem, from se hem i no nidim blong kam sofsof moa.

Baebol i soemaot se, stat long Iden kam kasem naoia, God i stap stanap strong long ol stret rul, mo hem i gat bigfala lav. Samting ya i sem mak yet, hem i no slakem stret fasin blong hem, mo hem i no mekem lav blong hem i kam antap moa. Long sam stori blong Baebol, maet i luk olsem we fasin blong hem i stap jenis. Be hemia i rili ol defdefren wok blong God, we prapa fasin blong hem i no save jenis samtaem. Ol defdefren wok ya oli soemaot tingting blong hem mo olsem wanem hem i fren wetem narafala, taem wan narakaen samting i kamaot no taem hem i wok wetem ol defdefren kaen man.

Taswe, Baebol i soemaot klia se prapa fasin blong God i no jenis long ol handred yia we oli pas, mo bambae i no save jenis long fiuja. I no gat wan olsem Jeova we i stap sem mak oltaem mo i stap stanap strong long ol semfala rul oltaem. Oltaem nomo yumi save trastem hem mo bilif long hem. Yes, yumi save dipen fulwan long hem.

[Futnot]

[Tok blong pija long pej 26]

Semfala God we i spolem Sodom mo Gomora . . .

. . . bambae i mekem wan niufala wol blong stret fasin