Baebol i Talem Wanem
?Tingting Blong God i Longfala Olsem Wanem?
‘GOD I WANTEM SOEMAOT WE HEM I KROS TUMAS LONG OL MAN WE OLI MEKEM SIN, WE I STRET NOMO BLONG OLI LUS. MO TU, HEM I WANTEM MEKEM OLGETA OLI SAVE WE HEM I GAT PAOA. BE FROM WE HEM I GAT LONGFALA TINGTING, HEM I NO KWIK BLONG PANISIM OLGETA.’—ROM 9:22.
LONG olgeta yia we oli pas, God i soemaot longfala tingting long ol man we oli mekem nogud mo long olgeta tu we oli rabis stret. Bitim 3,000 yia bifo, Job i harem nogud i talem se: “?From wanem God i stap letem ol man nogud oli stap laef, oli stap kam olfala we oltaem oli stap win bigwan? Oli gat ol pikinini blong olgeta mo ol smol bubu blong olgeta, mo oltaem oli stap blong luk olgeta ya oli kam bigwan. Hom blong olgeta i stap gud oltaem, mo fraet i no save spolem olgeta. Neva God i save mekem olgeta oli kasem bigfala trabol.” (Job 21:7-9) Sam narafala we oli laekem stret fasin, olsem profet Jeremaea, olgeta tu oli bin talemaot wari blong olgeta taem oli luk we God i gat longfala tingting long ol rabis man.—Jeremaea 12:1, 2.
?Wanem tingting blong yu? ?Yu faenem i had blong kasem save from wanem God i letem ol nogud fasin oli gohed? ?Sam samtaem yu harem se God i mas hareap blong spolem ol man nogud? Tingbaot wanem we Baebol i talem long saed blong mak blong longfala tingting blong God, mo from wanem hem i gat longfala tingting olsem.
?From Wanem God i Gat Longfala Tingting?
Fastaem, yumi mas askem se: ?From wanem God we i putumap ol strong rul blong stret fasin, i letem ol rabis fasin oli stap? (Dutronome 32:4; Habakuk 1:13) ?Samting ya i min se hem i agri long fasin nogud? !No gat! Tingbaot pijatok ya: Maet wan dokta blong katem man i brekem ol rul blong klin fasin, mo i mekem ol sikman oli harem i soa tumas. ?Nao olsem wanem? ?Yu no ting se bambae oli karemaot hem kwiktaem long wok blong hem long hospital? Be sipos hem i wok long wan narafala ples, olsem ples we faet i stap gohed long hem, maet tingting blong ol man i mas longfala moa. Long ples olsem, maet oli mas letem ol dokta blong katem man oli wok long fasin we i denja mo i no laenap wetem ol rul. Mo maet oli mas letem olgeta oli yusum ol tul we oli no nambawan mo oli no stret long wok we oli stap mekem.
Long sem fasin, God i gat longfala tingting tede. Taswe, hem i letem plante samting i gohed we hem i no agri long olgeta nating. Hem i no laekem nating ol rabis fasin, be hem i letem i gohed blong smoltaem. I gat sam gudfala risen from wanem hem i mekem olsem. Wan samting se, hem i letem taem i pas blong stretem fulwan ol giaman toktok we Setan i bin sakem agensem Hem taem hem i rebel long garen blong Iden. Setan i bin toktok agensem fasin blong God blong rul mo raet we hem i gat blong rul. Mo tu, longfala tingting blong God long ol man nogud, i givim taem mo janis long olgeta blong oli jenisim ol nogud fasin blong olgeta.
God i Gat Sore, Mo i Rere Blong Wet
Faswan papa mama blong yumi, Adam mo Iv, tufala i joenem Setan blong agensem God. God i gat raet blong kilim tufala i ded wantaem nomo. Be no gat. Hem i soemaot se hem i gat sore mo hem i rere blong wet. From lav blong hem, hem i letem tufala i karem pikinini. Be ol pikinini ya mo olgeta man we oli kamaot biaen long olgeta, oli bon wetem sin.—Rom 5:12; 8:20-22.
God i holem wan tingting blong sevem ol man oli aot long rabis laef ya. (Jenesis 3:15) Be, go kasem taem we hem i mekem olsemia, hem i soem longfala tingting mo sore long yumi, from we hem i kasem save long ol samting we sin blong Adam i mekem long yumi. (Ol Sam 51:5; 103:13) Oltaem, hem i “kaen tumas,” mo hem i rere mo i “kwik blong fogivim yumi.”—Ol Sam 86:5, 15; Aesea 55:6, 7.
I Gat Mak Blong Longfala Tingting Blong God
Be, sipos God i letem rabis fasin i gohed blong olwe, bambae hem i no gat lav mo hem i no gat stret tingting. Wan papa we i gat lav i no save letem wan pikinini blong hem i gohed olwe blong mekem nogud fasin we i spolem gud ol narafala long famle. Taswe, God i mekem longfala tingting we hem i gat long ol man we oli mekem nogud, i laenap wetem ol narafala fasin blong hem, olsem lav, waes, mo stret fasin. (Eksodas 34:6, 7) Taem risen blong longfala tingting blong hem i finis, bambae hem i no moa letem rabis fasin i stap.—Rom 9:22.
Aposol Pol i talem samting ya i klia nomo. Hem i se: “Bifo, [God] i letem olgeta man long evri ples oli folem ol rod blong olgeta nomo.” (Ol Wok 14:16) Wan narafala taem bakegen, Pol i tokbaot ol man we oli no obei long ol loa mo rul blong God, i se: “Long taem ya bifo we ol man oli no save God, i olsem we hem i satem ae blong hem, i no luk long ol fasin olsem.” Hem i gohed moa i se: “Be naoia hem i stap talem long yumi evriwan long evri ples se, ‘Yufala evriwan i mas tanem tingting blong yufala from ol sin blong yufala.’ ” ?From wanem? “From we hem i putum dei finis we bambae hem i save jajem olgeta man long wol, mo bambae hem i mekem long fasin we i stret nomo.”—Ol Wok 17:30, 31.
Kasem Blesing Naoia From Longfala Tingting Blong God
From samting ya, i klia se wan man we i tanem baksaed long ol loa blong God, i no save askem long God blong i fogivim hem jes from we hem i no wantem kasem nogud frut blong ol samting we hem i mekem. (Josua 24:19) Plante man long Isrel bifo oli bin tingting se oli save mekem olsem. Oli no wantem jenisim fasin blong olgeta. Oli no luksave from wanem God i mekem tingting blong hem i longfala. God i no letem olgeta oli gohed olwe long rabis fasin blong olgeta.—Aesea 1:16-20.
Baebol i soemaot se man we i no wantem kasem jajmen blong God, i mas ‘tanem tingting blong hem’ from ol sin blong hem. Hemia i min se hem i mas kam long God wetem tingtingdaon, mo hem i mas luksave se hem i sinman we hem i no stret nating, mo hem i mas rili tanem baksaed long ol rabis fasin. (Ol Wok 3:19-21) Biaen, Jeova God bambae i yusum paoa blong ransom sakrefaes blong Kraes blong fogivim hem. (Ol Wok 2:38; Efesas 1:6, 7) Long stret taem, God bambae i tekemaot ol nogud frut blong sin blong Adam. Bambae i gat “niufala heven wetem niufala wol,” mo long ples ya, bambae God i no moa letem “ol samting . . . oli stap we i klia se hem i mas spolem.” (Revelesen 21:1-5; Rom 9:22, Phillips) !Hemia nao gudfala blesing we bambae i kamaot from nambawan fasin blong God blong soem longfala tingting, we i gat mak blong hem!
[Tok blong pija long pej 23]
God i letem Adam mo Iv i stap blong tufala i karem pikinini