Grasban We i Mekem Nambawan Miusik Long Solomon Aelan

Man blong Wekap! long Solomon i raetem stori ya

?YU YU bin traem blong blou long ol paep blong mekem miusik? Yu mas pulum win long wan fasin we i save mekem hed i raon. Be tingbaot sipos yu traem blong mekem miusik long ol paep we oli longfala olsem tu meta, mo hol long medel blong olgeta i faef sentimeta. Antap long hemia, yu mas mufmuvum bodi blong yu olbaot, blong mekem noes i kamaot long ol paep ya. Sipos ol man oli plei 40 paep wantaem, hemia nao grasban blong Solomon we i nambawan tumas. !Yes, evri samting we oli yusum blong mekem miusik ya, oli wokem long gras! I gat plante defdefren kaen gras long dakbus blong Solomon. Oli yusum olgeta blong wokem ol paep we voes blong olgeta i defdefren, samfala oli antap olgeta samfala oli daon olgeta.

Yumi go long wan dok long Honiara, we grup ya Narasirato Paepa oli stap mekem rere ol paep blong olgeta blong go mekem wan konset long Taiwan. Samfala oli holem tri paep wantaem, mo oli stap mekem voes blong wanwan paep i stret, blong trifala i save joen gud. Ale oli holem ol paep ya tugeta nao oli kilkilim wan flat ston wetem ol paep ya blong luk sipos trifala voes blong olgeta oli joengud. Sipos oli no joen, oli katemaot wan smol haf long en blong paep we voes blong hem i no stret. Blong mekem miusik, oli no stap blou long olgeta. Oli fasem kaojuk long en blong ol paep daon, mo oli kilkilim graon wetem olgeta. !Ale, ol naesfala miusik i kamaot!a

I hadwok blong eksplenem miusik we ol paep oli mekem taem oli “singsing.” Samtaem i gat wan smol voes nomo, mo samtaem voes i strong we klosap i spolem sora. Ol singsing we ol man ya oli plei long olgeta oli no olbaot, oli raetem mo lanem ol wanwan haf blong olgeta blong mekem oli joen stret. Ol man we oli stap plei, oli muvmuf olbaot long stret ples we oli mas go long hem. Sam miusik i narakaen, i olsem wan sing blong sore we i save mekem man i fraet lelebet, be bighaf blong miusik we oli mekem i glad mo i pulum man blong danis. Maet wan dei yu yu save kam luk mo lesin long grasban blong Solomon we i mekem nambawan miusik.

[Futnot]