Wan Yangfala We i Glad Long Jos Blong Hem

TAEM Andrew i gat 13 yia blong hem, tija i talem long evriwan long klas blong mekem rere wan stori long saed blong kastom we oli kasem long ol olfala blong olgeta. Andrew i talem se: “Fastaem, mi ting se bambae mi raetem stori long saed blong bubu man blong mi. Be afta, mi tingting se: ‘!Wet! Mi mi wan Witnes blong Jeova. !Hemia wan nambawan janis blong tokbaot bilif blong mi!’

“Mi putum nem blong stori blong mi se ‘Stanap Strong.’ Mi mekem wan bigfala posta we i soemaot ol strong fasin we ol Nasi oli mekem agensem ol Witnes blong Jeova long Jemani. Long posta, mi pinim wan yunifom olsem ol Witnes oli bin werem long kalabus, wetem wan smol kaliko long hem we i pepol mo i gat tri saed blong hem. Mo mi putum sam pija mo leta blong famle Kusserow tu.a Mi givim long evriwan long klas, wan kopi blong leta we ol Witnes blong Jeova oli bin sanem i go long gavman blong Jemani. Leta ya i no tekem saed long politik, be i soemaot klia se ol samting we gavman i mekem agensem ol Witnes blong Jeova oli no stret nating, mo se oli no agri long ol samting ya. Klosap long posta ya, wan video kaset i stap toktok, hemia Jehovah’s Witnesses Stand Firm Against Nazi Assault. Mo tu, mi putum ol Baebol, buk, mo sam narafala smol pepa oli stap klosap.

“Fastaem, oli soemaot ol stori blong mifala long ples blong spot, blong olgeta studen mo tija blong skul oli save lukluk. Nekis dei long sava, oli singaot ol famle mo fren blong mifala blong oli kam luk. Plante oli askem kwestin long mi, from we oli no save nating se ol Nasi oli bin mekem nogud long ol Witnes blong Jeova.”

Andrew i talem se i tru we hem i nidim strong tingting, blong hem i no fraet blong tokbaot bilif blong hem. Hem i se: “Mi save se samfala bambae oli laf long mi. Be sipos mi mestem janis blong mekem samting ya, bambae mi harem nogud. Ol Witnes ya oli ded from bilif blong olgeta long Jeova. Taswe, mi harem se i wan smol samting nomo sipos sam man oli jikim mi.”

Biaen, Andrew i glad we hem i bin yusum janis ya blong witnes. Hem i se: “Mi mi storian wetem plante man, mi eksplenem from wanem mifala i no faet, mo mi givimaot plante Baebol, buk, mo smol pepa long olgeta we oli intres.” Hem i gohed i se: “Mi no save tingbaot wan taem we mi glad moa blong stap olsem wan Witnes blong Jeova.”

[Futnot]