Stori Blong Hem i Mekem Plante Man Oli Sapraes
Long laswan yia long haeskul, gel ya Ginny we hem i wan Witnes blong Jeova long Yunaeted Stet, i gat janis blong tokbaot jos blong hem long skul. Hem i talem se: “Tija i talem long klas se blong pasem eksam, mifala evriwan i mas raetem wan stori. Mi mi talem long hem se mi wantem raetem stori blong ol Witnes blong Jeova we oli bin stap long ol rabis kalabus blong ol Nasi.”
Tija i talem long Ginny se hem i save raetem stori ya. Ginny i se: “Taem mi givim stori ya long tija mo mi ridimaot long fored blong klas, mi fraet mo mi seksek. Mi wari long tingting blong ol fren blong mi long klas, mo mi ting se maet oli jikim mi.”
Ginny i statem toktok blong hem olsem: “?Wan long yufala i save hu olgeta long ol rabis kalabus blong ol Nasi we oli pinim Sta blong Deved long klos blong olgeta?” Klosap evriwan oli talem se, “Ol man Jiu.” Nao Ginny i askem sipos oli save hu olgeta we oli pinim wan smol pepol kaliko we i gat tri kona, long klos blong olgeta. I no gat wan long klas we i save. Ginny i se: “Mi talem long olgeta se ol Witnes blong Jeova nao oli mekem olsemia.”
Tija mo ol yangfala long klas oli sapraes long save we Ginny i givimaot. Ginny i se: “Oli sapraes tumas blong harem se ol Witnes blong Jeova oli save kam fri sipos oli saenem nomo wan pepa we i talem se oli lego bilif blong olgeta. Biaen, samfala long klas oli talem long mi se bifo oli no bin tinghae long ol Witnes blong Jeova, oli bin jikim olgeta. Be naoia, oli gat defren tingting, mo nekis taem ol Witnes oli kam long haos blong olgeta, bambae oli lesin.”
Ginny i kasem top mak from stori ya blong hem. Hem i se: “!Mi no jes kasem wan gudfala mak, be mi gat wan nambawan janis tu blong tokbaot bilif blong mi!”
[Tok blong pija long pej 21]
Plante Witnes blong Jeova oli gat janis blong kamfri long kalabus sipos oli saenem pepa ya blong lego bilif blong olgeta
[Foto Credit Line]
Courtesy of United States Holocaust Memorial Museum