“!Wan Gudfala Woman i Faenem Samting Ya!”

Long taon ya Cuernavaca long Meksiko, wan man i fogetem basket blong hem i stap long wan ofis blong gavman. Wan woman we nem blong hem Patricia i faenem basket ya, i openem, nao hem i luk nem blong man ya we i mekem wok blong dro ol plan blong haos. Hem i luk sam kad blong bang tu, mo sam jek we man ya i saenem finis. Patricia i gobak long haos, nao hem i ring long man ya blong talem long hem se i faenem basket ya. Man ya i sapraes tumas, i talem se: “!O, tangkiu God we wan gudfala woman i faenem samting ya!”

Olfala man ya i kam blong karem basket blong hem, nao hem i talem long Patricia se hem i olsem wan enjel we God i sanem. Patricia i talem long hem se hem i wan Witnes blong Jeova. Hem i se: “Mi mi mekem wok blong trufala God Jeova, mo hem nao i tijim mi, taswe mi givimbak basket ya long yu. Ale, i gud yu presem Jeova from.” Man ya i wantem givim presen long Patricia, be Patricia i no wantem. Hem i givim sam buk long man ya we oli tokbaot Baebol, mo hem i talem se bambae hem i glad moa sipos man ya i ridim ol buk ya mo i kasem ol gudfala samting from.

Olsem plante Witnes blong Jeova, Patricia i stadi finis long buk ya Save Blong Lidim Yu Long Laef We i No Save Finis. Wan long ol 19 japta long buk ya, hemia “?From Wanem Yumi Glad Taem Yumi Folem Ol Rod Blong God?” Samting we i hapen long Patricia, i mekem hem i luksave se japta ya i tru, antap moa haf ya we i tokbaot “Fasin Blong No Giaman Mo No Stil i Mekem Man i Glad.”

Yu save kasem buk ya we i gat 192 pej blong hem sipos yu fulumap pepa ya daon, mo sanem i go long adres we i stap, no long wan adres long pej 5 we i stret long ples blong yu.

□ Plis sanem buk ya long mi Save Blong Lidim Yu Long Laef We i No Save Finis.

□ Plis, mi mi wantem se wan man i kam luk mi blong mekem Baebol stadi wetem mi we mi no pem.