“!Sipos Ol Narafala Oli Rili Save!”

AFTA we David i finis long haeskul, hem i no tingbaot blong ronem ol sas samting, olsem plante narafala yangfala oli mekem. Hem i gat defren tingting. Long Septemba 2003, David wetem wan fren blong hem, tufala i aot long Illinois, Yunaeted Stet, tufala i muf i go long Dominikan Ripablik.a Davey, (olsem ol fren mo famle oli singaot hem), i lanem lanwis blong Spen mo i joen wetem kongregesen blong ol Witnes blong Jeova long Navas, blong mekem wok blong tijim ol man long Baebol. Kongregesen ya i welkamem gud hem. Juan we hem wan nomo i elda long kongregesen ya, i talem se: “Davey i mekem evri samting we mifala i askem long hem blong mekem. Oltaem hem i traehad blong givhan long narafala, mo ol brata sista oli lavem hem.”

Davey i laekem tumas ples we hem i wok long hem. Hem i raetem leta i go long wan fren blong hem long Yunaeted Stet, i se: “Mi mi haremgud tumas blong stap long ples ya. !Wok blong prij i gud tumas! Mifala i storian samwe long 20 menet long ol wanwan haos, from we ol man oli wantem tumas blong kasem save long evri samting we mifala i save talem long olgeta. Mi mi gat sikis Baebol stadi finis, be i nidim plante moa man yet blong mekem ol Baebol stadi long ples ya. !Kongregesen i gat 30 pablisa blong Kingdom, be i gat 103 man oli kam long miting!”

Sore tumas, long Epril 24, 2004, Davey wetem wan narafala yangfala long kongregesen ya, tufala i ded long wan aksiden. Go kasem ded blong hem, Davey i glad we i glad long wok we hem i stap mekem, mo hem i leftemap tingting blong ol yangfala long ples blong hem blong oli joen wetem hem long wok ya. Hem i talem long wan yangfala Witnes se: “Bambae yu gat wan niufala tingting long saed blong plante samting.”

Wan tingting blong Davey we i jenis, hemia long saed blong ol sas samting. Papa blong hem i tingtingbak, i se: “Taem Davey i kambak blong luk mifala, samfala oli singaot hem blong i go spel wetem olgeta long wan ples we i gat sno. Davey i askem long olgeta hamas mane we bambae hem i nidim. !Taem oli talem long hem, hem i se hem i no save spenem bigfala mane olsem long wan pleplei, from we mane ya i naf blong hem i save laef plante manis long Dominikan Ripablik!”

Strong tingting blong Davey i gat paoa long plante narafala. Wan yangfala long ples blong Davey i talem se: “Taem Davey i talem ol samting we hem i stap mekem mo olsem wanem hem i glad, mi luksave se mi tu mi save mekem sem mak olsem hem. Ded blong Davey i mekem mi mi tingting dip se ol man bambae oli talem wanem long saed blong mi sipos bambae mi ded. Mi tingbaot sipos bambae mi gat paoa long laef blong ol narafala olsem we Davey i gat paoa long laef blong mi.”

Papa mama blong Davey mo ol brata sista blong hem, oli Witnes blong Jeova, taswe oli bilif fulwan se God bambae i mekem Davey i laef bakegen long niufala wol we stret fasin nomo bambae i stap long hem. (Jon 5:​28, 29; Revelesen 21:​1-4) Be naoia, oli haremgud se Davey i bin yusum laef blong hem long beswan rod​—hemia blong mekem wok blong God. (Prija 12:1) Wan taem, Davey i bin tokbaot disisen blong hem blong go long wan ples we i nidim moa man blong prij. Hem i se: “Mi wantem se evri yangfala i mekem disisen ya mo haremgud olsem mi. I no gat wan samting we i moagud i bitim we yumi mekem wok blong Jeova wetem olgeta hat blong yumi. !Sipos ol narafala oli rili save!”

[Futnot]