“Ol God Ya We Ol Man Oli Stap Talem Se Oli Stap”
LONG taon ya Listra, aposol Pol i mekem merikel long man we leg blong hem i nogud. Ale ol man oli singaot se: “!Ei! Ol god blong yumi oli jenis, oli kam man, mo oli kamdaon finis long ples blong yumi.” Oli putum nem blong Pol se Heremes, mo fren blong hem Banabas se Sus. (Ol Wok 14:8-14) Long Efesas, man ya Demetrius we hem i man blong wokem ol samting long silva, i talem se sipos oli letem Pol i gohed blong prij, bambae “ol man oli lukluk nogud long haos blong prea blong Atemis ya we i hae we i hae.”—Ol Wok 19:24-28.
Plante man long faswan handred yia oli mekem wosip long “ol god ya we ol man oli stap talem se oli stap olbaot long skae mo long graon.” Plante man tede oli mekem sem mak. Pol i talem se: “I gat plante god olsem, mo plante masta olsem.” Be hem i talem tu se: “Yumi gat wan God nomo blong yumi. Hem i Papa blong yumi,” mo “yumi gat wan Masta nomo blong yumi, Jisas Kraes.”—1 Korin 8:5, 6.
?Baebol i Singaot Jisas Se God?
Jisas i neva talem se hem i God. Be from we Jeova i putumap hem blong i rul, profet tok blong Aesea i singaot hem se “God we i Gat Paoa” mo “Pikinini ya blong King, we Hem i Stamba blong Pis.” Profet tok blong Aesea i gohed se: “Taem we hem i stap rul, oltaem paoa blong hem bambae i stap kam bigwan moa, mo ples we hem bambae i rul long hem, oltaem bambae i stap kwaet.” (Aesea 9:6, 7) Taswe Jisas, hem i “Pikinini ya blong King” ya we i antap olgeta, Jeova, mo bambae hem i rul long heven, long gavman blong ‘God ya we i gat olgeta paoa.’—Eksodas 6:3.
Be maet yu wantem save se, ‘?Olsem wanem Jisas i “God we i Gat Paoa”? ?Mo long saed blong tok blong aposol Jon, hem i stap talem se Jisas i God stret, no nogat?’ Long Baebol Long Bislama, Jon 1:1 i talem se: “Bifo we bifo olgeta, taem we wol ya i no stap yet, i gat wan man i stap we nem blong hem ‘Tok blong God’. Tok ya, hem i stap wetem God, mo hem tu i God.” From vas ya, samfala oli talem se, “Tok blong God” we i bon olsem bebi Jisas long wol ya, hem i God ya we i gat Olgeta Paoa. ?Tingting ya i stret?
Sipos vas ya i min se Jisas i God ya we i gat Olgeta Paoa, bambae i agensem narafala tok long semfala vas ya, se ‘Tok ya i stap wetem God.’ Sipos wan man i stap “wetem” narafala man, tufala i no semfala man. Plante Baebol oli soemaot samting ya, oli mekem i klia se Tok blong God i defren long God ya we i gat Olgeta Paoa. Olsem nao, sam Baebol oli talem olsem: “Tok ya i wan God,” “wan god hemia Tok ya,” mo “Tok ya i olsem God.”a
Ol vas long Grik Baebol we oli joenem ol wod long fasin we i klosap sem mak long Jon 1:1, oli yusum tok ya “wan god.” Olsem nao, long saed blong Herod Agripa 1, bigfala hip blong man oli singaot se: ‘Hemia wan god we i stap toktok.’ Taem posen snek i kakae Pol be Pol i no ded, ol man oli talem se: “Hemia i wan god ya.” (Ol Wok 12:22; 28:3-6) I stret long ol rul blong Grik lanwis mo i stret long ol tijing blong Baebol tu blong talem se Tok ya i no God, be “wan god.”—Jon 1:1, NW.
Ridim ol tok long faswan japta blong Gospel blong Jon, mo makem olsem wanem Jon i soemaot se “Tok ya” i hu. Hem i se: “Tok ya i kam man, nao i stap wetem yumi, . . . mifala i luk bigfala paoa blong hem. Hemia bigfala paoa ya we God we i Papa blong hem i givim long hem [God i no givim long hem wan bakegen], from we hem nomo i stret Pikinini blong God.” “Tok ya” we i kam man, hemia Jisas taem hem i stap long wol ya. Plante man oli luk hem wetem prapa ae blong olgeta. Tok ya i no God ya we i gat Olgeta Paoa, from we Jon i talem se “i no gat man we i luk God samtaem.”—Jon 1:14, 18.
Be taem Jisas i laef bakegen, Tomas i luk hem, nao i talem se: “Yu yu Masta blong mi, mo yu God blong mi.” Maet yu askem se: ‘?Sipos Jisas i no God, from wanem Tomas i talem olsem?’ Yumi luk finis se Jisas i wan god from we hem i gat paoa. Be hem i no Papa God. Bifo we Tomas i luk Jisas, Jisas i talem long Meri, woman Magdela, se: “Mi mi stap gobak long Papa blong mi we hem i Papa blong yufala tu, mo i God blong mi mo i God blong yufala tu.” Mo tu, tingbaot from wanem Jon i raetem Gospel blong hem. Jes afta long stori blong Tomas, Jon i eksplenem se hem i raetem tok ya blong ol man oli “save bilif we Jisas ya, hem i Mesaea, hem i Pikinini blong God”—i no blong oli bilif se hem i God.—Jon 20:17, 28, 31.
?Hu Ya “God Blong Wol Ya”?
I klia se i gat plante god i stap. Olsem yumi luk finis, Baebol i talem nem blong sam long ol god ya. Be long taem bifo, plante man we oli luk paoa blong Jeova oli talem se: “!Hae God ya [Jeova] nomo, hem i God! !Hae God ya [Jeova] nomo, hem i God!” (1 King 18:39) Be i gat wan narafala god i stap we hem tu i gat paoa. Baebol i talem se: “Oli no save bilif, from we . . . god blong wol ya hem i satem tingting blong olgeta finis.”—2 Korin 4:4.
Long naet bifo we Jisas i ded, hem i givim woning tri taem long ol disaepol blong hem long saed blong god ya. Hem i kolem god ya se “masta blong wol ya.” Jisas i talem se ‘God bambae i brekem paoa’ blong god ya we i rulum wol ya. (Jon 12:31; 14:30; 16:11) ?Hu ya god ya? ?Wanem nao wol ya we hem i rulum?
God ya hem i rabis enjel ya Setan. ?Olsem wanem yumi save samting ya? Baebol i talem se taem Setan i traem Jisas, hem i soemaot long Jisas “olgeta kantri long wol ya wetem ol gudgudfala samting we oli gat. Nao hem i talem long hem se, ‘Sipos yu bodaon long mi, yu mekem wosip long mi, bambae mi mi givim olgeta samting ya i go long yu.’ ” (Matiu 4:8, 9) Setan i wantem givim ol samting ya long Jisas from we oli blong hem. ?Sipos oli no blong hem, yu ting se hemia wan traem long Jisas? Nogat. Aposol Jon i talem se: “Ful wol i stap aninit long paoa blong hemia we i rabis nomo.”—1 Jon 5:19, NW.
Jisas i mekem promes se: “Bambae [God] i brekem paoa blong Setan, we i stap rulum wol ya.” (Jon 12:31) Yes, bambae God i spolem wol ya, hemia ol rabis fasin we oli stap raonabaot long yumi, wetem rula blong wol ya. Aposol Jon i stap tokbaot samting ya taem hem i talem se ‘wol ya i stap lus.’ Be Jon i gohed se: “Man we i stap mekem ol samting we God i wantem, hem bambae i no save lus samtaem.” (1 Jon 2:17) Long nekis pej, bambae yumi lukluk ol nambawan plan blong God ya we hem nomo i tru, mo olsem wanem yumi save kasem blesing from.
[Futnot]
a Lukluk The New Testament, we James L. Tomanek i wokem; The Emphatic Diaglott, we Benjamin Wilson i wokem; The Bible—An American Translation, we J. M. P. Smith mo E. J. Goodspeed i wokem.
[Tok blong pija long pej 8]
Ol man Listra oli singaot Pol mo Banabas se ol god
[Tok blong pija long pej 9]
Jisas i talem long Meri, woman Magdela, se, ‘Mi mi stap gobak long God blong mi we hem i God blong yufala tu’