Ol Man Blong Ridim Wekap! Oli Talem

Ol Yangfala We Oli Gat Bel Wekap! ya we i tokbaot “Ol Yangfala We Oli Gat Bel​—⁠Wan Bigfala Trabol Long Fulwol,” i tajem hat blong mi. (Oktoba-Disemba, 2004) Mi mi gat bel taem mi gat 16 yia. Mi mi glad we yufala i makemgud se ol narafala oli mas leftemap tingting blong yangfala mama ya, mo se Jeova i tingbaot pikinini ya we i no gat fol long bisnes ya. Tangkiu tumas long stori ya we i rili soem lav.

M. R., Yunaeted Stet

Mi mi givim Wekap! ya long hed nes long wan klinik klosap long ples ya. Nes ya i stap givhan long ol mama blong oli bonem pikinini. Hem i talem se plante gel we oli karem pikinini oli gat 14 no 15 yia nomo. Bifo, samting ya i no save hapen long ples ya. Nes ya i talem se hem i nidim 20 kopi blong magasin ya naoia nomo, blong hem i save givimaot long ol yangfala mo ol papa mama blong olgeta.

I. R., Benin

Wan manis bifo we mi gat 17 yia, mi faenemaot se mi mi gat bel. I had we i had blong talem samting ya long papa mama blong mi, i moa had i bitim olgeta narafala samting we mi mekem long laef blong mi. Hat blong mi i soa from. Mi hop se ol yangfala bambae oli ridim stori ya mo lesin long ol advaes we hem i givim. !Mi mi neva ting se samting ya i save hapen long mi!

D. C., Yunaeted Stet

Taem mi mi gat 17 yia, mi kam wan mama. Oli fosem mi blong mared, be smoltaem biaen, mared ya i finis. Mi mi no bin save ol nogud frut we mi save kasem sipos mi slip wetem wan boe. Mi mi sore tumas we mi mestem plante gudfala samting long laef blong mi long ol yia blong yangtaem blong mi. Oltaem mi talem long ol yangfala se oli no mas mekem bigfala mastik ya we mi mi bin mekem. !Bigfala tangkiu long yufala from gudfala stori ya!

N. C., Honduras

“!Jeova, Yu Yu Faenem Mi!” Mi mi gat 15 yia, mo mi laekem tumas stori ya “!Jeova, Yu Yu Faenem Mi!” (Oktoba-Disemba, 2004) Samting we i hapen long Nelly i givhan long mi blong kasem save moa long tok blong Jemes 4⁠:​8, we i talem se: “Yufala i mas stap klosap long God, nao hem bambae i kam stap klosap long yufala.” !Tangkiu long stori ya we i mekem bilif blong mi i strong!

K. P., Yunaeted Stet

Stori blong Nelly Lenz i mekem bilif blong mi i strong se Jeova i lavem yumi, mo se sipos yumi lukaot hem, hem i save mekem rod, blong yumi faenem hem.

M. K., Japan

Ol stori olsem oli mekem yumi haremgud tumas, from we oli soemaot se Jeova i tinghae long olgeta sipsip blong hem. Taswe, nomata se oli stap wea, be hem i save tingbaot olgeta mo givhan long olgeta.

J. G., Kanada

Stori ya i mekem wota i ron long ae blong mi. Papa mama blong mi tufala i no Witnes blong Jeova, mo fastaem tufala i agensem mi. Mi mi glad se Nelly i stanap strong mo i holem strong tingting blong mekem wosip long Jeova.

K. L., Jamaica

Mi mi gat 12 yia. Mi haremgud tumas blong save se nomata wanem trabol yumi kasem long famle, Jeova i stap oltaem blong givhan long yumi.

J. W., Yunaeted Stet

I gud tumas we Nelly i talemaot stori blong laef blong hem long yumi. Bambae stori ya i givhan long ol pikinini we oli gat semfala trabol ya. Mo i impoten we ol bigman oli tingbaot ol pikinini ya. Samtaem yumi save fogetem se olgeta ya oli nidim spesel kea long kongregesen.

M. K., Denmak

Mi neva ridim wan stori we i tajem hat blong mi olsem hemia. Mi tu mi kasem save long laef ya we yangfala i mas stanap strong long trutok hem wan nomo. Blong fo yia, mi nomo long famle blong mifala, mi mekem wosip long Jeova. Taem mi luk olsem wanem Jeova i lukaotgud long Nelly, samting ya i tajem hat blong mi bigwan. Tangkiu tumas from stori ya we i leftemap tingting blong mi. !Tangkiu Nelly!

G. W., Jemani