Wan Stori Blong Longtaem i Tajem Hat

LONG notis blong Polan, long wan skul long Suwalki, tija i askem long ol studen blong oli mekrere blong storian long saed blong ol mama we oli kilim pikinini long bel blong olgeta. Justyna we i gat 16 yia, i faenem sam save long ol buk blong ol Witnes blong Jeova. Long dei we oli storian, tija i givim janis long ol studen blong talemaot tingting blong olgeta.

Justyna i talem se: “Mi mi go luk tija mo mi soem long hem wan stori long Wekap! blong Mei 22, 1980 (Inglis), nem blong hem ‘Diary of an Unborn Child’ (‘Stori Blong Pikinini We i No Bon Yet’).” Hem i talem long tija se: “Plis makem we oli raetem stori ya olsem we pikinini we i stap long bel blong mama, hem nao i raetem. Be hemia wan pikinini we mama i wantem spolem. Mi mi ting se stori ya i gud tumas.” Tija i stat blong ridimaot stori ya long klas. Wantaem nomo, ol studen oli stap kwaet mo lesingud.

Tija i ridim haf, nao hem i no moa save gohed from we stori ya i tajem filing blong hem, ale hem i givim long wan studen, blong hem i ridim. Tija i sidaon mo i krae. Afta we studen i finisim stori ya, ol studen long klas oli storian tugeta long saed ya, mo samfala oli askem Justyna blong givim magasin ya long olgeta. Justyna i talem se: “Afta long taem ya, ol studen long klas oli jenisim tingting blong olgeta long saed blong ol buk blong ol Witnes blong Jeova. Fastaem oli no tinghae long ol buk ya, be naoia oli laekem olgeta tumas. Wan boe i stap ridim evri Wekap! taem oli kamaot.”

Justyna i yusumgud stori ya we hem i faenem long wan Wekap! we i kamaot 20 yia finis. Long sem fasin, yu tu yu save faenem plante “waestok” long ol olfala magasin. (Job 28⁠:18) Taem yu go long ol miting blong ol Witnes blong Jeova long Haos Kingdom, yu save luk ol baon volium blong Wekap! long Franis mo Inglis, we oli stap long laebri. Bambae yu glad blong ridim ol gudfala stori blong plante yia bifo, we oli impoten yet. Mo tu, yu save askem ol Witnes blong Jeova long ples blong yu, blong oli givim ol niufala Wekap! we oli kamaot.

[Tok blong pija long pej 31]

Justyna, taem hem i stap skul