Taem Wan Pikinini i Ded

◼ Olgeta we oli laef, oli harem nogud bigwan taem wan pikinini i ded, antap moa papa mama blong pikinini ya. Wan mama we boe blong hem i gat 16 yia mo i ded long faea we i kamaot long wan aksiden blong trak, i krae se: “God i no letem yumi blong yumi ded long ples blong pikinini blong yumi, mo hem i no letem tu we yumi ded wetem olgeta.”

Be, woman ya i gat hop, hem i se: “God i talemaot trutok long saed blong ded, mo samting ya i givhan long mi mo man blong mi blong no kam kros mo blong no lusum klia tingting.” Hem i luksave se “i no God we i kilim boe blong mitufala i ded, mo [God] i gat plan blong mekem ol dedman oli laef bakegen long paradaes long wol. Long tingting blong mitufala, mitufala i save luk boe blong mitufala taem we bambae hem i laef, i glad mo i haremgud wetem ol fren mo ol famle blong hem.”

Be, olgeta we oli bilif long promes blong God blong laef bakegen, oli nidim yet se narafala i leftemap tingting blong olgeta. Mama ya we yumi tokbaot antap, i glad we plante fren blong hem oli halpem hem long saed ya. Hem i se: “Plante toktok blong Baebol mo gudfala samting we mitufala i kasem i kamaot long smol buk ya Taem Wan We Yu Laekem Hem Tumas i Ded. Mitufala i leftemap tingting blong ol man raonabaot long mifala blong oli ridim smol buk ya, mekem se olgeta oli save kasem save filing blong mitufala mo soasore we bambae i stap long laef blong mitufala.”

Maet yu, no wan man we yu save, bambae i haremgud taem hem i ridim smol buk ya, Taem Wan We Yu Laekem Hem Tumas i Ded. Sipos yu wantem wan buk olsem, plis yu fulumap smol bokis long pej ya mo sanem i kam long adres we i stap aninit no long wan long ol adres we i stap long pej 5 blong magasin ya.

□ Plis sanem buklet ya long mi, Taem Wan We Yu Laekem Hem Tumas i Ded.

□ Plis, mi mi wantem we wan man i kam luk mi blong mekem Baebol stadi wetem mi we mi no pem.