Buk Ya i Givhan Long Mi Blong Rerem Wan Tok Long Skul
Long wan skul long Jemani, plante long ol studen we oli tekem kos blong lanem wan wok, oli kamaot long ol defdefren kantri. Oli blong Franis, Jojia, India, Lebanon, Polan, Rasia, Saot Afrika, Yukren, Vietnam, mo kantri ya we bifo oli kolem Yugoslavia.
Wan gel we hem i wan studen long skul ya i raetem se: “Taem oli talem long mifala blong rerem wan toktok blong talem long skul, mi talem se bae mi mekem. Mi jusum blong tokbaot Ol Gudfala Ansa Long Ol Kwestin We Ol Yangfala Oli Askem, mo mi karem ol tingting we i stap long buk ya Ol Kwestin We Ol Yangfala Oli Askem—Ol Ansa We Oli Wok Gud. Ol studen oli sapraes long ol save we oli stap insaed long buk ya mo long ol gudfala advaes we hem i givim.
“Taem mi finisim toktok blong mi, oli klapem han bigwan blong talem tangkiu. Plante long olgeta oli stap lanem ol narafala lanwis mo oli save gud Inglis, taswe mi gat janis blong lego 30 Inglis kopi blong buk ya Ol Yangfala Oli Askem wetem olgeta, mo mi givim wan kopi long lanwis Jemani long woman ya we i tija blong mifala.”
Long ol dei we i kam biaen, studen ya i gohed blong storian long ol narafala studen, mo olgeta oli intres tumas. Mo hem i givim sam narafala buk we i tokbaot Baebol long lanwis blong Arab, Bengali, Jojia, Polan, Rasia, Spen mo Vietnam.
Maet yu yu save wan yangfala we i nidim buk ya Ol Yangfala Oli Askem. Sam long ol 39 japta blong hem i tokbaot se: “?Olsem Wanem Mi Save Gat Ol Trufala Fren?” “?Olsem Wanem Long Fasin Blong Slip Tugeta Bifo Mared?” mo “?Olsem Wanem Blong Save Sipos Hemia i Trufala Lav?” Sipos yu yu wantem buk ya, yu save fulumap pepa ya daon mo sanem i go long wan adres long pej 5 we i stret long ples blong yu.
□ Plis yu sanem buk ya long mi
□ Plis, mi mi wantem se wan man i kam luk mi blong mekem Baebol stadi wetem mi we mi no pem.