“Wan Olfala Buk” i Hilim Wan Woman

◼ Long kantri ya Brasil, long Saot Amerika, i gat wan Witnes blong Jeova we i stap prij long ol haos wanwan, mo hem i faenem wan woman we i talem long hem se wan buk i hilim mama blong man blong hem. Witnes ya i wantem save moa, ale, hem i askem long woman ya se buk ya i wanem kaen buk. Woman ya i ansa se: “Buk ya i wan olfala buk,” ale hem i go karem wan buk we ol pej blong hem oli brobrok. Buk ya hemia Buk Blong Ol Baebol Stori we i blong boe blong woman ya.

Woman ya i eksplenem se mama blong man blong hem, tingting blong hem i foldaon olgeta mo hem i fraet long ded mo blong stap long tudak. From samting ya mama blong man blong hem i stap oltaem nomo long bed. Boe blong woman ya i gat Buk Blong Ol Baebol Stori mo hem i ridim long bubu woman blong hem. Ol stori we smol boe ya i ridim long bubu woman blong hem i leftemap tingting blong bubu ya bigwan mo hem i winim problem blong hem.

Witnes ya i storian se: “Taem mi talem long woman ya se ol Witnes blong Jeova oli stap prentem buk ya mo mi save karem wan niuwan blong hem i kam, hem i askem mi blong mi karem tu buk—wan blong mama blong man blong hem mo wan blong hem. Taem mi kambak wetem tufala buk ya, hem i askem sam moa. !I no longtaem, woman ya i gat 16 buk blong givim long ol fren blong hem!”

Yu save gat Buk Blong Ol Baebol Stori, we i gat 116 stori long hem long saed blong ol man mo ol samting we i hapen long Baebol. Stat long taem we oli wokem buk ya, kam kasem tede, we hemia i mekem 30 yia finis, oli prentem bitim 72 milian kopi blong buk ya. Sipos yu yu wantem buk ya, yu save fulumap pepa ya daon mo sanem i go long wan adres long pej 5 we i stret long ples blong yu.

□ Plis sanem buk ya long mi.

□ Plis, mi mi wantem se wan man i kam luk mi blong mekem Baebol stadi wetem mi we mi no pem.