Mifala i Faenem Samting We Mifala i Lukaotem

Bert Tallman i talem stori ya

Mi laekem blong tingtingbak long taem we mi wan smol boe mo mi stap long Blood Reserve, hemia ples blong ol Indian man we oli blong laen blong ol man Blackfoot long Alberta, Kanada. Mifala i stap klosap long Canadian Rockies mo naesfala lek ya, Lek Louise.

LONG famle blong mi i gat seven boe mo tu gel. Plante taem, mi wetem ol brata mo sista blong mi, mifala i go long haos blong bubu woman blong mifala. Hem i wokhad mo hem i tijim mifala long laef blong ol bubu blong ol man Blackfoot bifo. Mifala i lanem olsem wanem blong pikimap ol smol frut ya berry we oli gru olbaot long bus. Mo mifala i lanem olsem wanem blong rerem ol kakae blong ol manples blong mifala, mo blong planem garen. Mi mi go huk wetem bubu man mo papa blong mi mo mitrifala i go lukaotem anamol blong kakae. Mitrifala i lukaot ol defren kaen dia blong kakae mo blong yusum skin blong olgeta. Papa mama blong mifala i wokhad mo tufala i traem bes blong tufala blong givim ol samting we mifala ol pikinini i nidim. Mi haremgud long laef blong mi long vilej.

Be long 1963, bubu woman blong mi i ded mo samting ya i jenisim laef blong mi bigwan. Mi mi no kasem save long wanem we i hapen. Long taem ya, mi gat faef yia nomo. Ol samting we ol narafala i talem long saed blong ded i no mekem se mi harem gud. Nating se mi smol nomo, be mi askem long mi wan se, ‘?Sipos i gat wan God we i Wokem Olgeta Samting, hem i stap mekem wanem? ?From wanem ol man oli stap ded?’ Samtaem tingting blong mi i trabol tumas ale mi stat blong krae smosmol. Taem papa mama blong mi i askem long mi from wanem mi harem nogud, mi talem nomo se bodi blong mi i soa samples.

Ol Waetman

Bifo we bubu woman blong mi i ded, mifala i no joen tumas wetem ol waetman. Taem mifala i luk olgeta samples, mi harem ol toktok olsem: “Hemia wan rabis waetman bakegen we i griri mo i no gat filing. Olgeta oli no gudfala man nating.” Ol narafala oli wonem mi se bighaf blong ol waetman oli gat fasin tu fes mo yu no save trastem olgeta. Nating se mi wantem save long olgeta, mi mi fraet yet long olgeta from we plante taem ol waetman long ples blong mifala oli jikim mifala mo talem ol toktok blong daonem mifala.

Smoltaem afta we bubu woman blong mi i ded, papa mama blong mi i stat blong dring alkol bitim mak. Long ol yia ya, mi mi harem nogud tumas. Taem mi gat eit yia, tu man blong Momon skul tufala i stat blong kam storian long mifala long haos. I luk olsem se tufala i gudfala man. Ale papa mama i agri long tingting blong tufala se i gud mi joen long wan program we ol pikinini oli go stap wetem wan narafala famle. Mi mi kasem save long program ya olsem se, ol pikinini blong ol Indian man blong Amerika oli go stap wetem ol waetman, blong ol waetman oli jenisim fasin blong ol pikinini ya. Papa mama i ting se i moa gud mi go stap wetem wan narafala famle from we laef blong tufala i kam nogud. Be mi mi sapraes tumas mo mi harem nogud from we mi mi harem tufala i talem se mifala i no save trastem ol waetman. Mi mi no wantem go nating mo mi traehad blong jenisim tingting blong tufala. Ale, biaen mi mi agri from we papa mama i promes se bambae bigfala brata blong mi tu i kam wetem mi.

!Be taem mitufala i kasem Vancouver long British Columbia, oli seraotem mi mo brata blong mi, mo oli karem mi mi go 100 kilometa longwe long hem! Tingting blong mi i foldaon bigwan. Nating se mi go stap wetem wan gudfala famle, hemia wan hadtaem we mi pastru long hem, mo mi mi fraet tumas. Ten manis i pas, afta mi gobak long ples blong mi.

Wetem Papa Mama Long Hom Blong Mifala

Laef blong papa mama i no jenis tumas, be mi mi glad blong stap wetem tufala bakegen. Taem mi gat 12 yia, papa mama i lego alkol. Samting ya i mekem mi mi haremgud, be laef blong mi i stap go nogud finis. Mi mi stat blong tekem ol drag mo dring alkol. Papa mama i traem pulum mi blong intres long defren samting, olsem spot ya we oli kolem rodeo.a Mi laekem tumas blong mekem samting ya. Hemia i no wan spot blong man we i fraet. Mi mi lanem blong ron long ol wael bul we oli kik strong. Long wan han nomo mi holem wan rop we i goraon long bel blong bul, mo mi save stap long bul we mi no foldaon nating blong bitim eit seken.

Taem mi mi yangfala yet, ol olfala long vilej blong mi oli tijim mi long skul blong ol manples blong mifala. Mi mi intres tumas long hem from we mi no gat respek nating long skul blong ol waetman. Tingting blong mi se ol kastom blong ol man Blackfoot oli leftemap kaen fasin mo stret fasin, be ol skul we oli talem se oli Kristin oli no mekem samting ya. Mi mi haremgud long kampani blong ol Indian man blong Amerika. Mi laekem fasin blong olgeta blong mekem fani mo blong joengud wetem ol famle mo fren.

Long taem ya, mi mi faenemaot we blong plante handred yia ol waetman oli stap mekem i nogud long ol Indian man blong Amerika. Ol manples blong mi oli talem long mi se ol waetman oli givim ol sik long mifala mo oli kilim ol buffalo i ded, hemia stamba anamol we mifala i stap kakae. Tru ya, wan buk i talem se wan haeman long Ami blong Yunaeted Stet, R. I. Dodge, i talem toktok ya se: “Yufala i mas kilim olgeta buffalo we yufala i luk. Evri buffalo we bambae yufala i kilim i ded, hemia i olsem we wan Indian blong Amerika i lus.” Mi mi faenemaot se fasin blong ol waetman i mekem tingting blong ol man Blackfoot i foldaon mo oli harem se i no gat rod blong winim olgeta.

Antap long ol samting ya, ol lida blong gavman mo ol haeman blong jos we oli sapotem olgeta, oli traehad blong jenisim ol Indian man blong Amerika, blong mifala i tekem fasin blong ol waetman. Oli ting se mifala ol wael man stret. Tingting blong olgeta se mifala i mas jenisim evri samting, kalja, ol bilif, ol fasin, mo lanwis blong mifala. Olsem nao bambae mifala i tekem fasin blong ol waetman. Long sam skul we jos i stanemap long Kanada, ol waetman oli mekem i nogud long sam pikinini blong ol Indian man blong Amerika. Sam narafala pikinini oli tekem drag, dring bitim mak, oli mekem raf fasin, no oli kilim olgeta wan i ded. Ol problem ya oli stap gohed yet long ol vilej tede.

Blong kam fri long ol problem ya, sam man Blackfoot oli tekem desisen blong lego kalja blong olgeta. Oli toktok Inglis long ol pikinini blong olgeta i bitim we oli toktok lanwis blong ol man Blackfoot, mo oli traehad blong tekem fasin blong ol waetman. Be samting ya i no mekem we ol waetman oli laekem olgeta. Plante taem oli jikim olgeta. Be i no ol waetman nomo we i jikim olgeta, ol man Blackfoot tu oli singaot olgeta se oli ol Indian we oli olsem apol, skin blong olgeta i red be insaed oli waet.

Mi mi sore blong luk we ol Indian man blong Amerika oli harem nogud from ol samting ya. Mi mi wantem tumas we ol man long vilej blong mi mo long ful kantri blong Kanada mo Yunaeted Stet, oli save gat wan laef we i moa gud.

Mi Wantem Tumas Blong Faenem Ansa Long Ol Kwestin Blong Mi

Mi mi tingting se neva bambae ol waetman oli laekem mi mo from samting ya mi harem se mi daon moa long narafala. Be taem mi bitim fiftin yia, filing blong mi i jenis nao mi mi stap kros. Mi mi no laekem nating ol waetman. Be papa mama mo sista blong papa, oli tok long mi se i nogud mi stap gat ol filing ya blong no laekem ol narafala mo wantem givimbak long olgeta. Oli pulum mi blong fogivim ol narafala, soem lav mo blong no tingting tumas long man we i no laekem ol narafala from kala blong skin blong olgeta. Biaen mi lanem we advaes ya i laenap wetem ol rul long Baebol. Antap long ol filing ya, mi wantem yet blong faenem ansa blong ol kwestin we mi gat taem mi wan smol boe. Mi stat blong tingbaot tu from wanem yumi stap long wol mo from wanem ol fasin we i no stret oli kam antap. Mi no kasem save from wanem ol man oli laef smoltaem nomo biaen oli ded. Tingting blong mi i fasfas.

Taem ol Witnes blong Jeova oli kam long haos blong mifala, oltaem papa mama i sanem mi blong go toktok wetem olgeta. Mi mi respektem olgeta from we mi luk se oli no jajem narafala from kala blong skin blong olgeta. Nating se i had long mi blong askem ol kwestin long fasin we i klia, be oltaem mifala i storian gud. Mi tingbaot wan taem we tu Witnes i kam luk mifala, nem blong tufala John Brewster mo Harry Callihoo we hem i man Blackfoot. Mifala i wokbaot tugeta long wan open ples we i gat ol longlongfala gras long hem mo mifala i storian longtaem. Tufala i givim wan buk long mi mo mi ridim klosap haf blong hem, be afta buk ya i lus samples.

Mi Man Blong Mekem Rodeo

Taem mi nidim advaes, mi stap toktok wetem ol olfala long vilej blong mi. Mi mi gat tangkiu long olgeta from we oli givim advaes we oli tingtinggud long hem fastaem, be ol ansa we oli givim long ol kwestin blong mi long saed blong laef oli no mekem se tingting blong mi i kwaet. Taem mi mi gat 16 yia, mi lego ples blong mi mo mi yusum taem mo paoa blong mi blong mekem rodeo. Afta long ol rodeo mi go long ol lafet, we plante taem ol lafet ya oli blong dring bitim mak mo tekem drag nomo. Tingting blong mi i stikim mi from we mi mi save se fasin olsem i no stret mo mi harem save se God i no glad long ol samting we mi stap mekem long laef blong mi. Plante taem mi prea long God ya we i Wokem Olgeta Samting, blong hem i halpem mi blong mekem samting we i stret mo blong mi kasem ol ansa blong ol kwestin blong mi we oli mekem tingting blong mi i trabol tumas.

Long 1978, taem mi stap long taon ya Calgary, mi mitim wan yangfala woman, nem blong hem Rose. Hem tu i wan Indian blong Amerika. Hem i blong laen blong ol man Blackfoot mo ol man Cree. Mitufala i intres long ol semfala samting, mo mi save talemaot tingting blong mi long hem mo toktok isi nomo wetem hem. Mitufala i laeklaekem mitufala tumas, ale long 1979 mitufala i mared. Biaen mitufala i gat wan pikinini gel, Carma, mo wan pikinini boe, Jared. Rose i wan waef we i stap tru long mi, i givhan long mi mo hem i wan gudfala mama. Wantaem, mi wetem famle blong mi, mifala i go visitim bigfala brata blong mi, mo mi luk buk ya, Yu Save Laef Foreva Long Paradaes Long Wol, long haos blong brata blong mi.b Samting we mi ridim long buk ya i pulum mi blong tingting mo mi luk se samting we hem i talem i stret. Be jes taem mi harem olsem se mi stap kasem save long ol tok we i stap long Baebol, mi kasem wan haf blong buk ya we wan man i teremaot ol pej blong hem. Mi wetem Rose, mitufala i traehad blong faenem ol pej we oli lus, be nogat. Nating se i olsem, mi gohed blong prea long God blong i halpem mi.

Mitufala i Go Luk Pris

Long yia 1984, long taem we ol tri oli karem flaoa, Rose i bonem namba tri pikinini blong mitufala. Hem i wan naesfala gel, nem blong hem Kayla. Be tu manis biaen, Kayla i ded from wan sik blong hat we hem i bon wetem. Mitufala i harem nogud tumas, mo mi no save wanem tok blong talem long Rose blong hem i save haremgud bakegen. Hem i pulum mi blong go wetem hem blong luk pris blong Katolik jos long vilej, blong mitufala i save haremgud long toktok blong hem mo kasem ansa blong ol kwestin blong mitufala.

Mitufala i askem long pris ya from wanem smol gel blong mitufala i ded mo weples hem i go long hem. Pris i talem long mitufala se Kayla i ded from we God i nidim wan narafala enjel long heven. Mi mi tingting se, ‘?Sipos God i gat Olgeta Paoa mo hem i Man ya we i Wokem Olgeta Samting, from wanem hem i karemaot gel blong mitufala blong i kam wan enjel blong hem? ?Wanem wok we wan smol bebi i save mekem?’ Pris ya i no openem Baebol nating. Ale mitufala i aot long pris ya we mitufala i harem olsem se i no gat rod blong faenem ansa blong ol kwestin blong mitufala.

Prea i Stamba Samting We i Givhan Long Mitufala

Klosap long en blong Novemba long yia 1984, long Mande long moning, mi mi prea longtaem. Mi plis long God blong i halpem mi blong kam wan gudfala man, blong kasem save long wanem i stap hapen, mo from wanem yumi ol man yumi laef. Long moning ya nomo, tu Witnes blong Jeova, Diana Bellemy mo Karen Scott, tufala i kam long haos blong mifala. Tufala i gat trufala lav, tufala i kaengud mo tufala i wantem tumas blong talemaot mesej we tufala i karem. Mi mi lesin, mo mi karem wan Baebol mo buk ya Survival Into a New Earth,c mo mi agri se Diana i mas kambak wetem man blong hem, Darryl, long en blong wik.

Mi luksave afta nomo we tufala i aot se hemia nao ansa long prea blong mi. Mi mi glad tumas, mi stap wokbaot gokam nomo insaed long haos, mi stap wet blong Rose i kambak long wok blong mi save talem long hem wanem we i hapen. Mi mi sapraes tumas we Rose i talem se hem tu i prea long naet ya we i pas, mo hem i askem long God blong halpem hem blong faenem trufala skul. Long Fraede blong wik ya, mifala i mekem faswan stadi blong mifala long Baebol. Biaen, mifala i faenemaot se long dei ya we Karen mo Diana tufala i kam luk mifala, tufala i no save faenem ol stret haos we tufala i mas prij long olgeta. Be nating se i olsem, taem tufala i luk haos blong mifala, tufala i harem se tufala i mas kam prij long mifala.

!Mi Kasem Ansa Blong Ol Kwestin Blong Mi!

Taem mifala i stat blong stadi Baebol, ol famle mo fren oli konfius mo oli no glad. Oli talem ol toktok blong traem pulum mifala blong lego stadi blong mifala. Oli talem se mifala i stap westem laef blong mifala mo mifala i no stap yusumgud ol save mo gudhan we mifala i gat. Be mifala i gat strong tingting blong no tanem baksaed blong mifala long niufala Fren we mifala i faenem, hemia Man ya we i Wokem yumi, Jeova God. Yes, ol nambawan trutok mo ol tokhaed we mifala i faenem long Tok blong God, Baebol, oli sas tumas. (Matiu 13:52) Long manis Disemba blong yia 1985, mi wetem Rose, mitufala i tekem baptaes mo kam Witnes blong Jeova. Naoia ol famle oli gat bigfala respek long ol Witnes blong Jeova from we afta we mitufala i baptaes, oli luk ol gudfala jenis we mitufala i mekem long laef blong mitufala.

!Yes mi faenem samting we mi stap lukaotem! Ansa we Baebol i givim long ol impoten kwestin oli isi nomo blong kasem save long olgeta mo oli klia gud. Mi mi haremgud blong save from wanem yumi ol man yumi laef, from wanem yumi ded, mo promes blong God se bambae Kayla i laef bakegen mo mifala i save luk hem i gruap long wan wol we evri samting i stret gud olgeta. (Jon 5:28, 29; Revelesen 21:4) Mi mi lanem tu se i nogud yumi spolem bodi blong yumi, yumi no gat respek long laef, mo i nogud we yumi traem agensem narafala blong winim olgeta. (Galesia 5:26, NW) Nating se i no isi, mi mi jusum blong no moa ron long ol bul mo blong lego rodeo, from we mi wantem mekem God i glad.

Ol Indian man blong Amerika oli bilif strong long gudlak mo badlak, olsem bilif ya se sipos wan hok naet i kam klosap long haos blong wan famle no sipos wan dog i krae bigwan, hemia badlak we i min se wan memba blong famle bambae i ded. Be stret save we mifala i kasem long Baebol i givhan long mifala blong kam fri long ol bilif ya. Mifala i no moa fraet se ol samting we oli laef mo we oli no laef, oli gat wan spirit we i save spolem mifala. (Ol Sam 56:4; Jon 8:32) Naoia mifala i tinghae long ol nambawan samting we Jeova i wokem. Mi mi fren wetem ol man blong plante defren kantri mo mi singaot olgeta se oli ol brata mo sista blong mi. Mo olgeta oli luk mifala olsem we mifala i sem mak long olgeta mo mifala i Kristin we mifala i wok tugeta blong mekem wok blong God. (Ol Wok 10:34, 35) Plante long olgeta oli stap wokhad blong kasem save long kalja mo ol bilif blong ol Indian man blong Amerika mo oli lanem lanwis blong ol man Blackfoot. Olsem nao oli save talemaot ol tok we i stap long Baebol long wan rod we i pulum ol man Blackfoot blong oli intres.

Naoia mi wetem famle blong mi, mifala i stap long wan smol fam blong ol buluk long Blood Reserve, long saot blong Alberta. Mifala i laekem yet kalja blong mifala ol Indian man blong Amerika, olsem ol kakae, miusik, mo danis blong mifala. Mifala i no joen long ol danis blong ol bubu bifo we samtaem oli kolem olgeta ol powwow, be long taem we i stret, mifala i laekem blong wajem olgeta. Mi mi traehad blong tijim ol pikinini blong mi long histri blong ol man Blackfoot mo blong oli save lanwis blong mifala smol. Ol man oli save se plante Indian man blong Amerika oli gat ol nambawan fasin olsem kaen fasin, tingting daon, mo lav we i pusum olgeta blong tingbaot ol famle mo fren blong olgeta. Mo ol man oli save fasin blong ol Indian man we oli welkamem gud ol strenja mo respektem ol narafala man, nating se oli blong defren ples. Mi mi tinghae mo laekem yet ol fasin ya blong olgeta.

Bigfala glad we mifala i kasem hemia from we mifala i yusum taem mo mane blong mifala blong halpem narafala blong save moa long saed blong Jeova mo lavem hem. Boe blong mitufala, Jared, i wok olsem wan volontia long wan branj ofis blong ol Witnes blong Jeova we i stap klosap long Toronto. Mi mi gat bigfala blesing ya blong mekem wok blong wan elda long kongregesen we i stap klosap long mifala, nem blong hem Macleod. Mo mi wetem Rose mo Carma, mitrifala i mekem wok blong fultaem paenia, we i min se mifala i prij fultaem. Mitrifala i laekem tumas blong prij long prapa lanwis blong mifala ol man Blackfoot. Mi mi haremgud tumas blong luk ol narafala oli lanem trutok long saed blong God ya we i Wokem Olgeta Samting, mo ol promes blong hem.

Baebol i talem long saed blong Jeova se: “Sipos yu girap, yu lukaot hem, bambae hem i glad blong tekem yu.” (1 Kronikel 28:9) Mi mi gat bigfala tangkiu we hem i mekem promes blong hem i kamtru mo i halpem mi mo famle blong mi blong faenem wanem we mifala i stap lukaotem.

[Ol futnot]

[Tok blong makem poen long pej 13]

‘?Sipos i gat wan God we i Wokem Olgeta Samting, hem i stap mekem wanem? ?From wanem ol man oli stap ded?’

[Tok blong makem poen long pej 16]

‘Ol man oli save se plante Indian man blong Amerika oli gat ol nambawan fasin olsem kaen fasin mo tingting daon’

[Tok blong pija long pej 12]

Bubu woman blong mi i tijim mi long kalja mo kastom blong ol man Blackfoot

[Tok blong pija long pej 15]

Bifo, mi mi yusum taem mo paoa blong mi blong mekem rodeo

[Tok blong pija long pej 15]

Spesel traket ya “You Can Trust the Creator” i stap long lanwis blong ol man Blackfoot mo sam narafala lanwis bakegen

[Tok blong pija long pej 15]

Naoia mi mi haremgud blong serem ol save blong Baebol wetem ol narafala

[Tok blong pija long pej 15]

Mi wetem famle blong mi tede