Smol Pink Buk Blong Mi

Cynthia Newell i talem stori ya

TAEM mi gat seven yia, wan gel we i stap long bas blong skul blong mi long Shreveport, Louisiana, U.S.A., i soem wan smol pink buk long mi. Nem blong buk ya hemia Listening to the Great Teacher. Hem i talem se mi save gat buk ya sipos mi givim 50 selen long hem. Mi wantem pem buk ya, ale smol gel ya i kam long haos blong mi, mo mitufala i kaontem mane blong mi kasem 50 vatu.

Mi laekem tumas smol pink buk blong mi. Smol taem afta we mi kasem buk ya, mi kam sik tumas mo mi mas slip long hospital. Blong mekem mi harem gud, famle blong mi i rid long mi long buk ya we mi laekem tumas. Buk ya oli wokem speseli blong ol smol pikinini, taswe taem mi stap kam bigwan, mi no moa stap ridim tumas smol pink buk ya. Buk ya i bin tijim mi long plante samting, be mi nidim wan save we i dip moa. Mi mekem desisen blong go long wan defren jos evri wik blong faenem ol ansa we Baebol i givim long ol kwestin blong mi. Nomata se i olsem, mi no faenem wan ansa we i stret gud.

Taem mi kasem hae skul, jos i no moa impoten tumas long mi, nating se mi wantem yet blong save Baebol, mo mi ridim Baebol blong mi evri dei. Wan dei mi luk se wan fren long skul i no joen blong talem promes blong stap tru long kantri blong mifala. Mi askem long hem from wanem, mo hem i talem se, “Mi mi promes finis long Jeova se bambae mi stap tru long hem, taswe ?olsem wanem mi save givim promes long God mo long flaeg long sem taem?” !Samting we hem i talem i tru nomo! Mi stap tingting, ‘?Be hu ya Jeova?’

Evri kwestin we mi askem long fren ya blong mi long skul, hem i givim ansa long Baebol. Mi stap tingting se: ‘?Hem i lanem ol samting ya olsem wanem? !Yia blong mitufala i sem mak, be hem i save plante samting long Baebol!’ Hem i talem se, “Mi lanem plante samting long Baebol long Haos Kingdom.” Mi glad nomo taem hem i invaetem mi blong go long wan miting long Sande. Mi go long evri jos finis long taon blong mi, be mi no save from wanem mi mestem blong go long Haos Kingdom blong ol Witnes blong Jeova. Long Sande ya nomo mi save wantaem se mi faenem stret ples we i tijim trutok long saed blong Baebol.

!Taem miting i finis, mi go long ples blong ol buk, mo long ples ya mi luk smol pink buk blong mi! Ten yia i pas finis we mi kasem buk ya long smol gel long bas, taswe mi fogetem hu ya we i givim buk long mi. !Be naoia mi rimemba, hem i semfala gel ya, Nancy, we i invaetem mi mi kam long miting!

Biaen, mi stadi Baebol wan taem evri wik mo mi gru kwiktaem long saed blong spirit. Mi lanem plante samting finis long smol pink buk blong mi, mo from samting ya, ol save we mi kasem long Baebol stadi i isi blong mi kasem save long olgeta. I no longtaem biaen, mi givim laef blong mi i go long Jeova mo mi baptaes. Hemia long 1985, taem mi gat 18 yia blong mi. Long taem ya Nancy i muv finis, i go long Florida, mo mitufala i no moa luk mitufala.

Afta we sam yia i pas, mi mared. Long 1991 mi wetem hasban blong mi we nem blong hem Drew, mitufala i stat wok fultaem long wok blong prij olsem ol paenia long wan smol taon long is blong Texas. ?Be wanem i hapen long Nancy? Mi no save. Ale wan naet taem mi stap ridim Wajtaoa blong Disemba 1, 1992, mi singaot: “!Mi faenem Nancy! !Mi faenem Nancy!” Hem i stap long foto blong olgeta we oli tren long Gilead. Nancy wetem hasban blong hem, Nick Simonelli, tufala i go long Ecuador long Saot Amerika, ples we sosaeti i sanem tufala blong go wok olsem misinari long hem.

Long 2006 mi mo hasban blong mi, mitufala i askem blong kam ol volontia blong bildim ol Haos wosip blong ol Witnes blong Jeova raonabaot long wol. !Mitufala i glad tumas taem mitufala i save se fas wok blong mitufala hemia blong bildim branj ofis long kantri ya Ecuador, i kam bigwan moa! !Long fas dei blong mi long branj ofis long Ecuador, Nancy i wokbaot i kam insaed! Hem i kam nomo blong visitim branj ofis long dei ya. Mitufala i luk mitufala mo mitufala i putum han i goraon long mitufala. !Mitufala i stap wanples bakegen, hemia i mekem 32 yia afta we mi kasem smol pink buk blong mi! !Mi talem tangkiu long Jeova from buk ya mo smol gel we i givim buk ya long mi!

[Bokis blong pija long pej 23]

OLI GIVHAN BIGWAN LONG LAEF BLONG PLANTE MILIAN MAN

Learn From the Great Teacher i kamaot long 2003 blong tekem ples blong Listening to the Great Teacher we i bin stap 32 yia. Kam kasem tede, oli prentem bitim 65 milian blong tufala buk ya we i tokbaot ol tijing blong Jisas. Oli prentem tufala buk ya long bitim 100 lanwis. Sipos yu wantem gat buk ya Learn From the Great Teacher, yu save askem long wan long ol Witnes blong Jeova we oli stap long ples blong yu.

[Tok blong pija long pej 23]

Tufala smol foto: Taem mitufala i save mitufala olsem pikinini nomo Bigfala pija biaen: Plante yia afta, long branj ofis long kantri ya Ecuador

Cynthia

Nancy