?Yu Yu Save Mekem Mared Blong Yu i Kam Moagud?

Ol man blong haos ya oli luksave se haos blong olgeta i kam nogud. Nating se i olsem, oli wantem mekem haos ya i kam gud bakegen.

?OLSEM wanem? ?Yu yu wantem mekem i sem mak long saed blong mared blong yu? Sipos yes, ?bambae yu stat olsem wanem? Traem folem ol advaes ya.

1 Mekem wan desisen.

Toktok wetem hasban no waef blong yu, blong yutufala i agri se bambae yutufala tugeta i wok blong mekem we i gat pis bakegen long mared blong yutufala. Traem blong raetemdaon ol samting we yutufala i tingting blong mekem. Taem yutufala i agri blong mekem ol samting ya, yutufala tugeta i save wok olsem wan tim, blong mekem mared blong yutufala i kam moagud.—Prija 4:9, 10.

2 Luksave problem.

?Wanem samting i stap spolem mared blong yutufala? Long sot tok nomo, raetemdaon samting we yu yu ting se i no gat long mared blong yutufala, no samting we yu yu wantem jenisim. (Efesas 4:22-24) Yu mas kasem save se problem we yu yu luksave, maet i defren long hemia we hasban no waef blong yu i luksave.

3 Putum wan mak we yu wantem kasem.

?Afta we sikis manis i pas, wanem gudfala samting we yu yu wantem luk long mared blong yutufala? Raetemdaon mak we yu yu wantem kasem. Taem yu kasem save se wanem samting i mas kam gud moa long mared blong yutufala, ale i moa isi blong yutufala i kasem mak blong yutufala.—1 Korin 9:26.

4 Mekem advaes blong Baebol i wok.

Taem yu luksave problem blong yutufala finis mo yu kasem save long samting we yu mas mekem, ale i gud we yu lukluk i go long Baebol blong kasem advaes. Ol advaes ya oli rili wokgud, oli wok long olgeta yia we oli pas finis, mo bambae oli gohed blong wok long olgeta yia we oli kam. (Aesea 48:17; 2 Timoti 3:17) Tingbaot, Baebol i talem se yutufala i mas fofogivim yutufala. Yes, Baebol i talem se: “Sipos wan man i mekem i rong long yu, nao yu no tingbaot, hemia i wan gudfala fasin.”—Ol Proveb 19:11; Efesas 4:32.

!Sipos long stat, i luk olsem se traehad blong yu i blong nating nomo, yu no mas lego! Buk ya The Case for Marriage, i talemaot gudfala frut we i kamaot long wan stadi we sam man oli mekem. Buk ya i talem se: “Samting we mifala i faenemaot long stadi ya i mekem ol man oli sapraes tumas. Eiti sikis pesen blong ol man mo woman we oli no hapi long mared blong olgeta be oli gohed nomo blong traehad, oli luk se faef yia biaen, mared blong olgeta i kam gud moa mo oli glad moa.” Ol hasban mo waef we oli talem se oli no hapi nating, olgeta tu oli faenemaot se samting ya i jenis.

Ating samting ya i tru tu long saed blong yu. Ol Witnes blong Jeova we oli wokem Wekap! ya, oli faenemaot se Baebol i talemaot ol gudfala rul we oli rili wok long laef blong ol mared man mo woman. Olsem nao, plante mared oli kamgud moa taem hasban mo waef tufala i kaen long tufala, tufala i gat sore, mo tufala i rere blong fofogivim tufala. Ol waef oli lanem se i impoten tumas we oli ‘kwaet woman mo fasin blong olgeta i stret gud.’ Mo ol hasban oli faenemaot se taem oli no kros long waef blong olgeta, samting ya i givhan bigwan long mared blong olgeta.—1 Pita 3:4; Kolosi 3:19.

Ol rul ya blong Baebol oli wokgud from we Jeova God, we Baebol i kamaot long hem, hem nao i stanemap mared. Taswe, i gud we yu toktok wetem ol Witnes blong Jeova, mo yu askem long olgeta olsem wanem Baebol i save givhan long mared blong yu.a

[Futnot]