Hem Tu i Stap Lanem Samting Olsem Olgeta
● Wan mama we i gat bitim 30 yia blong hem, i stap long Kentucky long Yunaeted stet, wetem man blong hem mo trifala pikinini blong hem. Mama ya i raetem se: “Olgeta buk we mifala i gat we ol Witnes blong Jeova oli wokem, oli givhan bigwan long mi mo famle blong mi.” Hem i eksplenem se: “Buk we mi laekem tumas blong ridim long ol pikinini blong mi hemia Buk Blong Ol Baebol Stori.” Mo hem i talem tu se: “Taem mi ridim buk ya long ol pikinini blong mi, mi tu mi stap lanem samting olsem olgeta.”
Buk ya i gat ol naesfala pija, mo ol stori blong Baebol oli stap long stret oda, folem taem we ol samting ya i hapen. Long haf 2 i gat ol stori ya: “Wan Nogud King i Rul Long Ijip,” “?Olsem Wanem Bebi Moses i Stap Sef?,” “?From Wanem Moses i Ronwe?,” “Moses Mo Eron i Go Luk Fero,” “Ol 10 Panis,” mo “Oli Krosem Red Si.”
Long haf 6, we stamba tok blong hem se, “Taem We Jisas i Bon, Go kasem Taem We Hem i Ded,” i gat plante stori we i tokbaot laef blong Jisas, stat taem hem i bon go kasem taem we hem i ded. Tu long ol stori ya hemia, “Jisas i Bon Long Haos Blong Ol Anamol” mo “Wan Sta i Lidim Ol Man Ya.” Laswan stori ya i soemaot se “ol waes man” we oli ol man blong lukluk ol sta, oli no go long ples blong ol anamol, ples ya we Jisas i bon long hem, be oli “go insaed long haos” blong luk Jisas. Long haos ya, oli “luk pikinini ya wetem mama blong hem Meri.” God i toktok long olgeta, i blokem olgeta blong oli no gobak long Herod, we i wantem kilim Jisas i ded. Ale, ?yumi lanem wanem from stori ya, long saed blong man we i mekem sta ya i saen?—Matiu 2:1, 11, 12.
Yu tu yu save lanem samting wetem ol pikinini blong yu taem yu ridim Buk Blong Ol Baebol Stori. I gat 116 stori evriwan we i tokbaot ol man blong Baebol mo ol samting we oli mekem. Sipos yu yu wantem buk ya, yu save fulumap pepa ya daon mo sanem i go long wan adres long pej 5 we i stret long ples blong yu.
□ Plis sanem buk ya long mi.
□ Plis, mi mi wantem se wan man i kam luk mi blong mekem Baebol stadi wetem mi we mi no pem.