Trutok Blong Baebol i Mekem Man i Fri
JISAS KRAES i talem long ol man we oli hivap wanples blong lesin long hem se: “Bambae yufala i save trutok, mo trutok ya bambae i mekem yufala i fri man.” (Jon 8:32) Ol stori we oli kam biaen oli soemaot se fasin ya we man i fri i minim tu se man i aot long paoa blong ol rabis enjel, we oli stap giaman mo oli stap trikim man long ol wok blong olgeta.—Jon 8:44.
Ol stori ya oli soemaot klia se trutok blong Baebol i gat paoa blong mekem man i fri. Yes, trutok ya nomo we i mekem man i fri fulwan. I gud we yu tu yu ridim wanem we Baebol i talem. Bambae yu glad tumas long save we Baebol i givim long yu.
[Bokis/Foto blong pija long pej 8]
Ol man long ol foto ya oli no ol man we stori blong olgeta i stap long ples ya
● Susanna i wan woman pris long skul blong hem long Brasil. Hem i gat sam spesel kaen paoa mo hem i wantem yusum ol paoa ya blong givhan long ol man we oli gat nid. Mama blong Susanna i ded finis. Be Susanna i talem se hem i stap toktok yet wetem mama blong hem. Ale wan dei, “mama” blong hem i krae long hem se hem i wantem tumas we Susanna i kilim hem wan i ded nao i save kam stap wetem hem long hom blong ol dedman. Samting ya i mekem we Susanna i harem nogud bigwan, mo hem i stap gat ol nogud drim long naet. Ale Susanna mo man blong hem, tufala i stat stadi Baebol wetem ol Witnes blong Jehova. Tufala i mas faet strong blong “blokem Setan,” be biaen Setan ‘i ronwe long tufala.’ (Jemes 4:7) Naoia tufala i gat pis long laef blong tufala, mo Susanna i no moa stap gat ol nogud drim. Hem i raetem se: “I gat plante samting we mi wantem talem tangkiu long Jehova from. Be mi talem tangkiu long Jehova moa from wehem i karemaot mitufala long tudak ya we mitufala i stap long hem.”
[Bokis/Foto blong pija long pej 8]
● Timothy i stap long Wes Afrika. Sora blong hem i fas mo hem i no save toktok.a Hem i go luk ol dokta long hospital, be oli no save mekem hem i kam gud bakegen. Hem i go luk ol man blong jos blong oli prea long hem, be olgeta tu oli no save mekem hem i kam gud bakegen. Timothy i raet se: “Tingting blong mi i foldaon olgeta from ol giaman tok we ol man oli talem long mi.” Ale Timothy i stat stadi Baebol wetem ol Witnes blong Jehova. Long stadi ya hem i lanem se wan dei, God bambae i mekem we ol man we oli sik mo ol man we oli handikap oli kam gud bakegen. Timothy i talem se, “Mi wantem tumas blong stap long niufala wol from we long taem ya nao bambae God i mekem we ‘olgeta we sora blong olgeta i fas, sora blong olgeta bambae i open bakegen . . . mo olgeta we oli no save toktok, bambae oli toktok, nao bambae oli glad, oli stap singsingaot from.’” (Aesea 35:1-6) Taswe naoia, taem we niufala wol i no kam yet, Timothy i glad tumas blong go prij. Hem i karem wan smol DVD pleia wetem hem mo i yusum DVD pleia ya blong soemaot ol pija mo trutok blong Baebol long ol man we olgeta tu, sora blong olgeta i fas. Hem i glad tumas blong givhan long ol man ya blong oli faenem trutok ya we i save mekem oli fri man.
[Futnot]
a Mifala i jenisim sam long ol nem ya.
[Bokis/Foto blong pija long pej 9]
● Evelyn i wan woman Estonia. Hem i joen plante long wok blong rabis spirit. Hem i wantem mekem olsem Jisas, we i stap mekem ol merikel blong hilim ol sikman. Hem i wantem tumas blong givhan long mama blong hem we i gat wan sik we ol dokta oli no save winim. Hem i traehad blong faenem sik blong mama blong hem, mo i wantem faenem wan rod tu blong winim sik ya. Ale hem i ridim sam buk blong lanem olsem wanem blong yusum wan samting we oli kolem pendulum.b Biaen, Evelyn i stadi Baebol. ?Hem i lanem wanem? Hem i talem se: “Mi kasem save se Setan i trikim mi we i trikim gud mi. Ale, mi tekem olgeta buk we oli tokbaot wok blong Setan mo mi tekem ol pendulum ya tu, mi bonem olgeta long faea.” Naoia, Evelyn i glad tumas blong go tijim ol man long ol trutok blong Baebol we oli save mekem man i fri.
[Futnot]
b Pendulum hem i wan kaen jen we wan samting i hang long hem we wan kleva i yusum blong hilim sikman.
[Bokis/Foto blong pija long pej 9]
● Mary i gruap long wan aelan long Papua Niugini. Long vilej blong hem, ol man oli fraet long man we i ded. Taem wan man i ded, Mary i go slip aninit long bed blong wan famle blong hem, from we hem i fraet long dedman. Hem i ting se dedman i gat devel blong hem we bambae i kam mekem trabol long hem sipos hem i stap hem wan nomo long haos. Biaen, Mary i stadi Baebol mo i lanem se ol man we oli ded oli stap slip nomo. Oli stap long beregraon mo oli stap wet long taem ya we bambae oli laef bakegen long Paradaes long wol ya. (Luk 23:43; Jon 11:11-14) Save ya i mekem we naoia, Mary i no moa fraet long ol dedman.
[Bokis/Foto blong pija long pej 9]
● Alicia i stap long Yunaeted Stet. Hem i gruap long wan famle we oli Witnes blong Jehova. Hem i laekem ridim ol buk mo wajem ol muvi we oli tokbaot majik mo ol narakaen paoa. Gogo wan dei hem i stat tinghevi long ol trutok blong Baebol we hem i lanem finis. Nao hem i luksave se hem i stap traem ‘kakae long tebol blong Masta, mo bakegen long tebol blong ol devel,’ mo samting ya i no stret. Ale hem i jenisim ol fasin blong hem, mo naoia hem i harem we tingting blong hem i no moa stikim hem, hem i mekem wosip long God wetem wan tingting we i stret.—1 Korin 10:21.