Naesfala Bodi

?From wanem yumi wantem luk naes?

From we bren blong yumi i wokem tingting ya blong yumi wantem luk naes. Baebol i no eksplenem olsem wanem samting ya i hapen, be hem i tokbaot risen from wanem yumi wantem luk naes. God i wokem yumi blong tekem ol fasin blong hem. (Jenesis 1:27; Prija 3:11) Mo tu, hem i mekem se bodi blong yumi i wok long wan spesel fasin, we yumi no naf blong kasem save long hem. From samting ya, wan man blong raetem Singsing long taem bifo, i talem se: “Yu yu mekem mi long fasin we i narafala, mo i nambawan olgeta. Mi mi ona long yu, mo mi presem nem blong yu from.”—Ol Sam 139:14.

Tede, plante man oli gat rong tingting taem oli wantem mekem bodi blong olgeta i naes. Mo ol kampani we oli soem ol stael blong hea mo bodi, long Intenet no long ol buk, oli talem se i oraet nomo blong gat tingting olsem. Buk ya Body Image, i tokbaot samting we ol man oli talem, folem kalja blong ol bigfala kantri ovasi. Oli talem se: “Plante man oli no glad long prapa bodi we oli gat, nating se oli ol gudfala man. Oli glad nomo, taem oli mekem sam samting blong luk naes.” Sipos man i gat tingting olsem, bambae hem i no moa tingbaot ol gudfala fasin we hem i gat, we oli moa impoten i bitim naes bodi we hem i wantem gat.—1 Samuel 16:7.

Plante woman oli wantem mekem bodi i naes, be wetem tingting ya blong pulum narafala blong mekem seks. Wan ripot we i kamaot long 2007, long American Psychological Association (APA), i talem se: “Klosap long evri pablisiti, oli soemaot bodi blong ol woman long fasin we i pulum man blong wantem mekem rabis fasin.” Taswe, Baebol i givim wan strong woning long yumi, blong yumi no letem ol samting ya oli pulum yumi —Kolosi 3:5, 6.

“Mo i nogud yufala i stap . . . , flasem yufala. I moa gud yufala i mekem tingting blong yufala i stret long fes blong God, mo yufala i gat pis long laef blong yufala, mo yufala i kwaet woman, we fasin blong yufala i stret gud. Fasin olsem i gud tumas long fes blong God mo i no save lus.”—1 Pita 3:3, 4.

?From wanem yu mas luksave samting?

Sam man oli talem se: “Sipos yu naes, i gud yu soemaot bodi blong yu.” Wan ripot we APA i talem, i se: “Long ol kantri we plante man oli gat tingting olsem, ol yangfala gel oli ting se bodi blong olgeta i olsem wan tul, we ol narafala oli save lukluk mo skelem sipos i naes no nogat.” Be i denja blong gat tingting olsem. Blong talem stret, tingting olsem i save mekem bigfala trabol long laef blong man. Mo i save mekem man i wari . . . , i gat problem long helt, i ting nating long hem, mo i harem nogud bigwan.

“I nogud yufala i letem wan samting i mekem yufala i tingting tumas, no i mekem yufala i harem nogud long bodi blong yufala. Bambae yufala i no save stap yangfala olsem oltaem.”—Prija 11:10.

?Wanem i soemaot se yu gat stret tingting?

Baebol i soemaot se sipos man i gat stret tingting, bambae hem i no traem blong kam flas. (1 Timoti 2:9) Yu traem tingbaot: Wan man we i putum hem i stap daon, hem i no traem blong mekem se hem i naes moa long ol narafala. Mo hem i gat stret tingting long saed blong hem wan. Hem i tingbaot filing blong ol narafala, mo i respektem narafala. Be samting we i moa impoten se, hem i wantem mekem samting we i stret long fes blong God. (Maeka 6:8) Hem i save fren gud wetem narafala, mo i save faenem wan patna we tufala i save harem gud long mared blong tufala blong olwe.

Baebol i talem plante risen from wanem yumi mas “mekem tingting blong yumi i stret.” (1 Pita 3:3, 4) I tru, maet sloslo bodi blong yu i no moa luk naes, be ol gudfala fasin blong yu, oli mekem se yu luk naes olwe. !Sloslo bambae yu kamgud moa! Ol Proveb 16:31 i talem se: “Taem man i gat waet hea, hemia i olsem wan gudfala hat blong king we ol man oli putum long hed blong man blong ona long hem.” Yes, nating se yumi yangfala no yumi olfala, be sipos yumi folem gudfala advaes blong Baebol, bambae yumi faenem beswan rod blong mekem yumi luk naes blong olwe.

“Gudfala fasin blong woman i save trikim man isi nomo, mo fes we i naes i no save stap longtaem. Be woman we i stap ona long Hae God, i stret blong olgeta man evriwan oli stap leftemap nem blong hem.”—Ol Proveb 31:30.