Japta 133

Jisas i Finisim Ol Wok We God i Talem Long Hem Blong Mekem

KING ya we hem i Man blong Faet tu, Jisas Kraes, bambae hem i tekemaot Setan mo nogud wol blong hem. !Long taem ya, bambae ol man oli glad tumas! !Rul blong Jisas blong Wan Taosen Yia, we bambae i mekem pis i kamaot long wol, i save stat nao!

Ol man we oli pastru long bigfala faet ya Amageden, bambae oli folem ol oda blong Jisas mo ol king we oli stap rul wetem hem. Bambae oli klinim wol ya, oli tekemaot ol doti we i stap biaen long stret faet ya, Amageden. Olgeta we oli pastru long Amageden, ating oli save gohed blong bonem pikinini gogo samtaem biaen long faet ya. Mo olgeta tu bambae oli joen long gudfala wok blong mekem wol i kam wan nambawan garen.

Biaen bakegen, Jisas bambae i givim laef bakegen long plante milyan man we oli stap long beregraon, blong oli save harem gud long naesfala Paradaes tu. Bambae hem i mekem olsem ya blong holem promes we hem i mekem finis, i se: “I gat taem i stap kam we ol dedman we oli stap long beregraon, . . . bambae oli aot long beregraon.”

Taem Jisas i ded long pos, i gat wan man blong brekem loa we hem tu i ded long pos kolosap long Jisas. Man ya i wan long olgeta we Jisas bambae i givim laef bakegen long olgeta. Tingbaot we Jisas i bin promes long man ya se: “Tru mi mi talem long yu tede, se bambae yu yu stap wetem mi long Paradaes.” Jisas bambae i no tekem man ya i go long heven blong rul wetem hem olsem wan king. No gat. Mo Jisas i no save kam wan man bakegen blong stap long Paradaes long wol wetem man ya. Be Jisas bambae i mekem man ya i laef bakegen long ded, blong hem i save stap long wan paradaes. Mo Jisas bambae i lukaot long ol nid blong man ya long saed blong bodi mo long saed blong speret, olsem pija long nekis pej i soemaot. Long fasin ya, i olsem we Jisas bambae i stap wetem man ya we fastaem i man blong brekem loa.

!Yu tingbaot! Olgeta man we bambae oli joen olsem wan famle nomo, bambae Jisas i lukaot gud long olgeta long kaen gud fasin. Ol man we oli pastru long Amageden, ol pikinini blong olgeta, wetem ol milyan milyan man we oli laef bakegen long ded mo oli stap obei long hem, sloslou olgeta evriwan oli save kam stret man. From Pikinini blong hem, Jisas Kraes, we hem i king, Jeova bambae i stap wetem ol man long saed blong speret. Samting ya i stret long voes we Jon i harem, i kamaot long heven, i se: “Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man we i harem nogud long bodi blong hem.” Bambae i no moa gat wan sikman long wol, no man we i harem nogud long bodi blong hem.

Long en blong Rul blong Jisas blong Wan Taosen Yia, bambae wol ya i stap olsem we God i wantem fastaem, taem hem i talem long tufala fas man, Adam mo Iv, se tufala i mas gat plante pikinini blong fulumap wol ya. Yes, wol ya bambae i fulap long ol man we oli stret gud long bodi blong olgeta, mo we oli stap mekem stret fasin nomo. Samting ya i save hapen from we ol gudfala blesing we oli kamaot long sakrafaes blong Jisas oli save kasem olgeta man evriwan. !Ded we ol man oli kasem from sin blong Adam bambae i no moa gat!

Long taem ya nao, Jisas i finisim olgeta wok we Jeova i givim long hem blong mekem. Taswe, long en blong wan taosen yia, hem i save givimbak Kingdom wetem famle blong ol stret man oli go long Papa blong hem bakegen. Nao God bambae i lego Setan wetem ol rabis enjel blong hem oli aot long bigfala hol we oli stap olsem we oli ded nomo. ?From wanem hem i lego olgeta?

Long en blong wan taosen yia ya, bighaf blong ol man we oli laef long Paradaes oli man we oli laef bakegen long ded. Olgeta i neva kasem sam trabol we i traem bilif blong olgeta. Bifo we oli ded, oli no save ol promes blong God, taswe oli no save soemaot bilif long ol promes ya. Mo biaen, taem oli laef bakegen long ded, mo oli lanem ol trutok blong Baebol, i isi nomo blong olgeta oli wosip long God, from we oli stap long wan paradaes nomo, i no gat wan samting i agensem olgeta. ?Be olsem wanem nao sipos Setan i gat jans blong blokem olgeta blong oli no gohed long wosip blong God? ?Sipos oli kasem wan traem olsem ya, bambae oli stap tru long God? Blong ansarem kwestin ya, bambae God i letem Setan i gofri.

Revelesen we Jon i kasem i soemaot se taem Jisas i rul blong wan taosen yia finis, bambae Setan i mas winim sam man. Baebol i no talemaot stret namba blong ol man we bambae Setan i pulum olgeta oli aot long wosip blong God. Afta, taem laswan traem ya i finis, Setan wetem ol rabis enjel blong hem wetem olgeta we hem i pulum olgeta blong oli agensem God, bambae oli ded blong olwe. Be olgeta we oli stap tru long God, nating we Setan i traem olgeta fulwan, bambae oli stap laef. Mo bambae oli harem gud long ol blesing we Papa blong olgeta long heven i givim long olgeta, gogo i no save finis.

I klia se Jisas i bin mekem wan bigfala wok blong halpem ol gudfala plan blong God, oli kamtru. Mo long fyuja bambae i gohed blong mekem olsem ya. Bambae yumi save harem gud long wan nambawan fyuja, from ol samting we Jisas i mekem taem hem i rul olsem bigfala King blong God long heven. Be yumi no mas fogetem ol samting we Jisas i bin mekem taem hem i stap olsem wan man long wol.

Jisas i glad blong kam long wol ya. Mo hem i tijim yumi long saed blong Papa blong hem. Antap long samting ya, hem i soemaot ol nambawan fasin blong God. Traem tingbaot gudfala fasin blong hem we hem i no fraet nating. Hem i stanap strong olsem wan bigfala man. Waes blong hem i bitim waes blong ol narafala man. Tingbaot nambawan fasin blong hem blong tijim ol man, we hem i no fraet nating blong lidim ol narafala man. Mo tingbaot kaen fasin, mo sore we hem i soemaot mo fasin blong hem blong putum hem wan i stap long ples blong narafala man. Taem yumi tingtinggud long ol fasin ya oli rili tajem hat blong yumi. Traem tingbaot olsem wanem hem i harem nogud bitim mak long bodi blong hem blong pemaot yumi. From samting ya nomo yumi save kasem laef. !Taem yumi tingbaot ol samting ya, tru, hat blong yumi i fulap long tangkyu long hem!

!Tru ya, man ya Jisas, we yumi stadi finis long laef blong hem, i narakaen! I klia nomo se hem i hae moa long olgeta narafala man, mo fasin ya blong hem i winim tingting blong yumi. Samting ya i pusum yumi blong talem bakegen tok ya we hed gavman blong Rom Ponjes Paelet, i bin talem, se: “Yufala i luk. Hemia man ya.” !Tru ya, “Hemia man ya” we i hae moa long olgeta narafala man!

Sipos yumi bilif mo yumi gat tangkyu long sakrafaes we Jisas i mekem blong pemaot yumi, samting ya i save tekemaot bigfala baden blong sin mo ded we Adam i putum long yumi. Mo Jisas i save kam “Papa” blong yumi “blong Olwe.” Ol man we oli wantem laef we i no save finis oli mas kasem save long God. Be i no hemia nomo, oli mas kasem save long Pikinini blong hem tu, Jisas Kraes. !Mifala i hop se taem yu ridim buk ya mo yu stadi long hem, bambae hem i givhan long yu blong kasem save ya we i save givim laef long yu! 1 Jon 2:17; 1:7; Jon 5:​28, 29; 3:16; 17:3; 19:5; Luk 23:​43, NW; Jenesis 1:28; 1 Korin 15:​24-28; Revelesen 20:​1-3, 6-10; 21:​3, 4; Aesea 9:⁠6.

▪ ?Olgeta we oli pastru long Amageden wetem ol pikinini blong olgeta, oli save mekem wanem gudfala samting biaen?

▪ ?Wetem olgeta we oli pastru long Amageden mo ol pikinini blong olgeta, hu bakegen oli save harem gud long Paradaes ya? ?Olsem wanem Jisas bambae i stap wetem olgeta?

▪ ?Long en blong wan taosen yia ya, bambae wol ya i olsem wanem? ?Long taem ya bambae Jisas i mekem wanem?

▪ ?From wanem Setan bambae i fri, i aot long hol? ?Biaen, wanem bambae i hapen long hem wetem olgeta we oli folem hem?

▪ ?Olsem wanem Jisas i save kam “Papa” blong yumi “blong Olwe”?