Japta 4

Hem i Gat Bel, Be Hem i No Mared Yet

MERI i gat bel, tri manis finis. Traem tingbaot we fastaem hem i bin stap wetem Elisabet. Afta, hem i gobak long ples blong hem, Nasaret. I no longtaem ol man ples blong hem oli mas luksave se hem i gat bel. !Tru ya, trabol i save kamaot from!

Moa wos, oli promes finis long kapenta, Josef, se bambae hem i save mared wetem Meri. Loa we God i givim long ol man Isrel i talem se wan woman we oli promes finis se bambae hem i mared wetem wan man, i no save go slip wetem narafala man. Sipos hem i mekem olsem, oli mas stonem hem gogo hem i ded. Meri i save loa ya. ?Olsem wanem hem i save eksplenem long Josef from wanem hem i gat bel?

Tri manis finis Meri i stap longwe long Josef, taswe yumi save se Josef i wantem tumas blong luk hem bakegen. Taem Meri i luk Josef bakegen, ating hem i talem nyus ya long hem. Ating hem i traehad blong eksplenem long hem se tabu speret blong God i givim pikinini ya long hem. Be yumi save se i strong we i strong long Josef blong bilivim tok ya.

Josef i save se Meri i wan gudfala woman. Mo i klia se Josef i laekem woman ya tumas. Meri i traem eksplenem gud long Josef, be long tingting blong Josef i luk olsem we wan man nomo i givim bel long hem. Nating we i olsem ya, be Josef i no wantem se oli stonem hem gogo hem i ded. Mo hem i no wantem we oli mekem hem i sem long fes blong ol man. Taswe hem i mekemap tingting blong hem blong mekem divos long fasin we i haed. Long taem ya, taem tufala i promes finis blong mared long tufala, ol man oli tingbaot tufala olsem we tufala i mared finis. Mo blong finisim wan promes olsemia, oli mas mekem divos.

Biaen, taem Josef i stap tingting yet long bisnes ya, hem i slip. Nao enjel blong Jeova i kamtru long hem long wan drim, mo hem i talem long hem se: “Yu no fraet blong tekem woman ya Meri, blong i woman blong yu. From we Tabu Speret i givim pikinini ya long hem. Bambae Meri i bonem wan boe, mo yu mas putum nem blong hem se Jisas, we i min se Sevya, from we hem bambae i sevem ol man blong hem, i tekemaot ol sin blong olgeta.”

!Taem Josef i wekap, hem i glad tumas! Wantaem nomo hem i mekem olsem enjel i talem long hem. Hem i tekem Meri i go long haos blong hem. Samting ya we oli mekem long fes blong ol man, i olsem seremoni blong mared. Long fasin ya, Josef mo Meri tufala i soemaot long ol man se tufala i mared. Be Josef i no slip wetem Meri gogo hem i bonem pikinini boe ya, Jisas.

!Yu luk! Kolosap nao Meri bambae i bonem pikinini, be Josef i stap givhan long hem blong hem i klaem long wan dongki. ?Bambae tufala i go wea? ?From wanem tufala i wokbaot i go long wan trep kolosap long taem we Meri i mas bonem pikinini? Luk 1:39-41, 56; Matyu 1:18-25; Dutronome 22:23, 24.

▪ ?Taem Josef i harem se Meri i gat bel, hem i tingting olsem wanem? ?From wanem?

▪ ?Olsem wanem Josef mo Meri tufala i save divos taem tufala i no mared yet?

▪ ?Wanem samting we Josef mo Meri tufala i mekem long fes blong ol man, we i olsem seremoni blong mared?