Japta 36
Strong Bilif Blong Wan Kapten Blong Ol Soldia
TAEM Jisas i toktok antap long hil, hem i finisim stret haf blong minista wok blong hem long wol. Hemia i min se i gat wan yia mo naen manis i stap yet blong hem i save finisim ol wok blong hem long wol.
Nao Jisas i go insaed long velej ya Kapaneam, we hem i olsem stampa taon blong minista wok blong hem. Long ples ya, sam olfala blong ol man Isrel oli kam long hem blong askem wan samting long hem. Wan kapten blong ol soldia blong ol man Rom i sanem olgeta. Kapten ya i no wan man Isrel.
Nao kapten ya i gat wan man blong wok blong hem, mo hem i laekem man ya tumas. Be man ya i sik tumas, we kolosap hem i ded. Nao kapten i wantem se Jisas i mekem man ya blong hem i gud bakegen. Ale hem i sanem sam olfala blong ol man Isrel blong oli go askem long Jisas se: “Man ya, i stret nomo blong yu yu givhan long hem, from we hem i fren gud long yumi man Isrel. Mo hem i pem ol man we oli wokem haos blong prea blong mifala long ples ya.”
Wantaem nomo, Jisas i biaen long olgeta. Nao taem oli kam kolosap lelebet long haos blong kapten ya, hem i sanem ol fren blong hem oli go long Jisas, blong oli talem long hem se: “Masta, yu no trabol olsem. Mi mi no wan gudfala man. Mi no naf blong yu kam insaed long haos blong mi. Mo taswe mi no harem se i gud mi mi kam tok long yu.”
Tok blong man ya i rili soemaot se hem i gat tingting daon. Traem tingbaot: Hem i wan bigbigfala man. Hem i bos long plante narafala man. Be ating hem i wantem mekem i stret long Jisas. Jisas i wan man Isrel, mo long kastom blong olgeta, ol man Isrel oli no mas joen wetem ol man we oli blong ol narafala nesen. Pita tu i talem se: “Yufala evriwan i savegud we i tabu long ol man Isrel from skul blong olgeta, blong oli go insaed long haos blong ol hiten man, no blong oli go kampani wetem olgeta.”
Maet kapten ya i no wantem we Jisas i brekem kastom ya mo i kasem trabol from. Taswe hem i sanem ol fren blong hem oli go long Jisas, nao oli talem long hem se: “Sipos yu yu talem tok nomo, bambae man ya blong mi i oraet. From we mi mi aninit long ol kapten we oli hae moa long mi, mo i gat ol soldia we oli aninit long mi. Sipos mi talem long wan soldia se ‘Yu go,’ bambae hem i go. Sipos mi talem long wan narawan se ‘Yu kam,’ bambae hem i kam. Mo sipos mi talem long wan man blong mi se ‘Yu mekem samting ya,’ bambae hem i mekem.”
Taem Jisas i harem tok ya, hem i sapraes tumas. Nao hem i talem se: “Tru mi talem long yufala, mi mi no faenem wan man Isrel nating we bilif blong hem i strong olsem bilif blong man ya.” Ale, Jisas i mekem sikman ya i gud bakegen. Afta, hem i tekem jans ya blong talem se ol hiten man we oli gat strong bilif bambae oli save kasem ol blesing we ol man Isrel oli mestem from we oli no gat bilif.
Nao Jisas i talem se: “Bambae i gat plante man oli aot long saed long is mo long saed long wes, oli kam. Bambae oli save sidaon kakae wanples wetem Ebraham mo Aesak mo Jekob, long [kingdom blong heven, GNB]. Be ol man ya we God i singaot olgeta fastaem blong oli go insaed long [kingdom ya, GNB], bambae hem i sakemaot olgeta oli go long ples blong tudak afsaed, we ol man oli stap krae, oli stap kakae tut blong olgeta.”
“Ol man ya we God i singaot olgeta fastaem . . . we bambae hem i sakemaot olgeta oli go long ples blong tudak afsaed,” i minim ol man Isrel. Fastaem, God i givim jans long olgeta, blong oli save rul wetem Kraes long Kingdom blong hem. Be oli no tekem jans ya. Ebraham, Aesak mo Jekob, trifala i olsem saen blong Kingdom blong God. Ale Jisas i stap talem se God bambae i glad blong tekem sam hiten man oli kam insaed long ‘Kingdom blong Heven.’ I olsem we oli save sidaon blong kakae wanples wetem ol narafala long heven. Luk 7:1-10; Matyu 8:5-13; Ol Wok 10:28.
▪ ?From wanem wan kapten blong ol soldia blong ol man Rom i sanem sam olfala man blong Isrel oli go blong askem wan samting long Jisas?
▪ ?From wanem kapten ya i no singaot Jisas i kam insaed long haos blong hem?
▪ ?Las tok blong Jisas i minim wanem?