Japta 40

Wan Lesen Long Fasin Sore

LONG Naen, Jisas i bin mekem pikinini blong wan wido i laef bakegen long ded. Maet hem i stap yet long taon ya, no maet hem i stap long wan taon kolosap long hem. Nao wan Farisi, nem blong hem Saemon, hem i wantem luk man ya we i stap mekem ol merikel long ol ples olbaot. Ale hem i singaot Jisas blong i kam kakae long haos blong hem.

Jisas i luksave se hemia wan jans blong prij long olgeta we oli stap long haos blong man ya. Ale hem i agri blong go, olsem we hem i bin kakae long haos blong sam man we oli tekem mane blong takis mo sam man nogud. Be taem Jisas i go insaed long haos blong Farisi ya, man ya i no mekem welkam long hem olsem ol man long taem ya oli stap mekem long man we i kam long haos blong olgeta.

Long ples ya, taem ol man oli wokbaot long rod, leg blong olgeta i kam doti mo i hot. Taswe blong mekem welkam long man we i kam long haos blong olgeta, oli folem kastom, oli wasem leg blong olgeta long kolwora. Be Farisi ya i no mekem samting ya long Jisas. Mo tu, kastom blong olgeta i blong kisim man we i kam long haos blong olgeta, mo kafsaedem oel long hed blong hem. Be man ya i no mekem ol samting ya long Jisas.

Taem Jisas i stap kakae long haos blong Farisi ya, wan woman blong taon ya i kam long ples ya. Ol man blong taon ya oli save se hem i woman nogud. Ating hem i harem sam nyus long saed blong ol tijing blong Jisas. Maet hem i harem we Jisas i singaot ol man we ‘oli stap karem ol hevi samting, blong oli kam long hem, nao hem i save givim spel long olgeta.’ Ol samting we woman i harem mo i luk, oli tajem hat blong hem, nao hem i stap lukaot Jisas from.

Nao woman ya i kam long bak blong Jisas, i bendaon long leg blong hem. Hem i stap krae, mo wora blong ae i stap folfoldaon i go long leg blong Jisas, i stap wasem leg blong hem. Nao hem i ravem leg blong Jisas long hea blong hem blong mekem i drae. Mo tu, hem i tekem wan botel senta, nao i kafsaedem senta ya i go long leg blong Jisas, mo hem i kisim leg blong hem. Nao Saemon, Farisi ya we i singaot Jisas blong i kam kakae long haos blong hem, hem i luk samting ya, be hem i no laekem samting we woman ya i stap mekem. Long tingting blong hem, hem i talem se: “Man, sipos man ya i wan profet tru, bambae hem i save gud wanem woman ya i stap tajem hem. Woman ya i wan woman nogud ya, be hem i no save.”

Jisas i save tingting blong man ya, nao hem i talem long hem se: “Saemon, mi gat wan samting mi wantem talem long yu.”

Hem i ansa, i se: “?Yes, Tija, wanem?”

Jisas i talem se: “I gat wan masta we tu man i gat kaon long hem. Wan i kaon long faef handred denarias, mo wan i kaon long fefte denarias.a Tufala ya i no save pem tufala kaon ya, nao masta ya i letem bisnes ya i lus, i talem se: ‘Bambae yutufala i no pem kaon ya. Livim.’ ?Nao weswan long tufala ya bambae i save laekem masta ya moa?” (NW)

Maet Saemon i ting se kwestin ya i no impoten, from we hem i no luksave olsem wanem pija tok ya i joen wetem bisnes long saed blong woman nogud ya. Taswe hem i talem nomo se: “Ating man ya we kaon blong hem i bigfala moa, nao masta ya i sore long hem.”

Jisas i talem long hem se: “Tok blong yu i stret.” Nao hem i tanraon, i luk long woman ya, nao i talem long Saemon, i se: “?Yu yu luk woman ya? Taem we mi mi kam long haos blong yu, yu yu no kafsaedem sam wora blong wasem leg blong mi, be woman ya, hem i wasem leg blong mi long wora blong ae blong hem, mo hem i ravem i drae long hea blong hem. Yu yu no kis long mi, be i stat long taem ya we mi kam insaed, hem i stap kis long leg blong mi, we i no spel. Yu yu no kafsaedem oel i go long hed blong mi, be hem i kafsaedem senta ya i go long leg blong mi finis.”

Ol samting ya we woman i mekem i soemaot se hem i tanem tingting blong hem from ol sin we hem i bin mekem mo hem i sore tru. Taswe Jisas i talem se: “From ol samting ya, mi mi save talem long yu se ol sin blong hem we i plante tumas, be i lus finis. Taswe hem i laekem mi tumas. Be taem we mi tekemaot sin blong man, we sin blong hem i smol nomo, bambae man ya i laekem mi smol nomo.”

Jisas i no stap mekem eskyus long rabis fasin we woman i bin mekem, mo hem i no stap talem se hem i agri long ol fasin ya, no gat. Be tok blong hem i soemaot se hem i sore long ol man we oli mekem sam bigfala mastik long laef blong olgeta, sipos oli sore tumas long ol nogud fasin ya blong olgeta. Ale, ol man olsem oli save lukaot Jisas blong faenem spel long tingting blong olgeta. Nao Jisas i mekem tingting blong woman ya i kwaet, i se: “Ol sin blong yu, mi mi tekemaot finis. . . . Bilif blong yu i mekem yu yu gud bakegen. Yu go, we tingting blong yu i stap kwaet.” Luk 7:36-50; Matyu 11:28-30.

[Futnot]

▪ ?Taem Jisas i kam long haos blong Saemon, man ya i no mekem wanem long Jisas?

▪ ?Hu ya i stap lukaot Jisas? ?From wanem?

▪ ?Jisas i talem wanem pija tok? ?Olsem wanem pija tok ya i joen long bisnes blong woman nogud ya?