Japta 64

Wan Lesen Long Fasin Fogif

JISAS wetem ol disaepol blong hem oli stap yet long haos ya long Kapaneam. Hem i storebaot olsem wanem oli save stretem trabol, taem wan brata i mekem i no stret long wan narafala brata. Nao Pita i askem long Jisas, i se: “?Masta, sipos brata blong mi i stap mekem i no stret, mi mi mas fogivim hem hamas taem?” Ol lida blong skul blong ol man Jyu oli talem se i gud we man i fogivim narafala man go kasem tri taem. Taswe ating Pita i ting se i gud tumas blong fogivim man “go kasem seven taem.”

Be Jisas i talem se i no stret blong kaontem hamas taem oli fogivim brata blong olgeta. Hem i tok blong stretem tingting blong Pita, i se: “Mi mi no save talem se seven taem nomo. Yu save fogivim hem go kasem sevente seven taem.” (NW) Ale, Jisas i soemaot long Pita se hem i no save putum wan mak no wan stret namba long ol taem we hem i fogivim brata blong hem.

Blong makem long tingting blong ol disaepol blong hem se oli mas fogivim brata blong olgeta, Jisas i talem wan pija tok long olgeta. Hem i storeyan long wan king we i wantem luk ol kaon blong ol man blong wok blong hem. Nao oli tekem wan man blong wok blong hem i kam long hem, we hem i kaon long 60 milyan denarias. Hemia i bigfala mane ya. Man ya i no gat rod blong pem kaon ya. Ale masta blong hem i talem se oli mas salem man ya i kam slef long narafala masta, hem wetem woman blong hem mo ol pikinini blong hem, blong pem kaon ya.

Nao man ya i foldaon long fes blong masta blong hem, i krae long hem se: “Masta, plis yu letem mi blong smol taem nomo, nao bambae mi save pemaot olgeta kaon ya long yu.”

Nao masta ya i sore long man ya, i fogivim hem long bigfala kaon ya, i letem hem i goaot. Be taem man ya i goaot, hem i luk wan narafala man blong wok we narafala man ya i gat kaon long hem long 100 denarias nomo. Hemia i smol kaon nomo. Nao hem i go holem narafala man ya, i stap jokem nek blong hem, i talem long hem se: “Yu mas pem kaon ya blong yu long mi.”

Be narafala man ya i no gat mane blong pem kaon ya. Nao hem i foldaon long fes blong hem, i krae long hem se: “Plis yu letem mi blong smol taem nomo, nao bambae mi save pem kaon ya long yu.” Be man ya i no sore long narafala man, olsem we masta blong hem i sore long hem fastaem. Nao man ya i go sakem narafala man ya long kalabus, blong i stap gogo i pem kaon ya.

Ol narafala man blong masta oli luk fasin ya, oli harem nogud tumas from. Nao oli go long masta blong olgeta, oli talemaot olgeta bisnes ya long hem. Masta ya i kros tumas, nao hem i singaot man ya blong hem, blong i kambak long hem bakegen. Nao i talem long hem se: “!Yu yu wan rabis man! Mi mi fogivim yu olgeta long bigfala kaon ya blong yu, from we yu krae long mi olsem. ?Weswe yu no save sore long narafala man ya, stret olsem we mi mi sore long yu fastaem?” From we masta ya i kros tumas long man ya, i jajem hem se hem i mas go stap long kalabus mo oli mas givim panis long hem, gogo hem i pemaot olgeta kaon ya blong hem.

Nao Jisas i finisim pija tok ya olsem: “Sipos yufala i no fogivim ol brata blong yufala olwe, bambae Papa blong mi long heven i save mekem olsem long yufala evriwan.”

!Wan nambawan lesen long fasin fogif ya! Enikaen sin we brata blong yumi i mekem long yumi i nating nomo taem yumi tingbaot bigfala kaon we yumi gat long God from ol sin blong yumi. Be God i rere blong fogivim yumi oltaem. Mo tu, Jeova God i fogivim yumi plante taosen taem finis. Plante taem yumi no luksave se yumi stap mekem wan samting we i no stret long fes blong hem. Oraet nao, ?weswe yumi no save fogivim brata blong yumi samtaem, nating we hem i mekem wan samting we i no stret long yumi? Yumi no mas fogetem rul we Jisas i talem long ol man, taem hem i stap prij antap long hil: God bambae i ‘fogivim yumi from ol sin blong yumi, olsem we yumi stap fogivim ol man we oli mekem i no gud long yumi.’ Matyu 18:21-35; 6:12; Kolosi 3:13.

▪ ?From wanem Pita i askem long Jisas se: ‘?Mi mi mas fogivim brata blong mi hamas taem?’ ?From wanem hem i ting se i gud tumas blong fogivim brata blong hem seven taem?

▪ ?King i mekem wanem long slef we i askem hem blong givim smol taem long hem blong pem kaon blong hem? ?Be slef ya i mekem wanem long narafala slef we i askem sem samting long hem?

▪ ?Yumi lanem wanem long pija tok ya blong Jisas?