Japta 88

Rijman Mo Lasros

JISAS i storeyan long ol disaepol blong hem olsem wanem oli save yusumgud olting blong olgeta, we oli kasem long ol rod olbaot. Hem i eksplenem se yumi no save mekem we yumi man blong wok blong God, nao long semtaem, yumi man blong wok blong mane. Ol Farisi oli harem tok ya, nao oli laf long Jisas, from we oli laekem mane tumas. Be Jisas i talem long olgeta, i se: “Yufala i man blong mekem ol fasin we ol man oli save luk se i stret. Be God i save tingting blong yufala. Mo ol fasin we ol man oli stap leftemap se oli gud, be long fes blong God oli nogud nating.”

Long taem ya, hemia stret taem blong sam bigfala jenis oli kamaot: Ol man we oli rij long ol samting blong wol, ol man we oli gat haenem long politik, mo ol man we oli gat bigfala paoa long ol skul, bambae oli foldaon, oli lusum ol samting blong olgeta. Be ol man we oli hanggri long saed blong speret, Jisas bambae i leftemap olgeta, oli hae moa long ol narafala. Jisas i tokbaot bigfala jenis ya taem hem i talem long ol Farisi, i se:

“I kam kasem taem blong Jon [Baptaes], i gat ol loa blong Moses mo ol tok blong ol profet oli stap. Be nao biaen, i gat Kingdom blong God, we gud nyus blong hem i go long ol man. Mo olkaen man oli stap traehad tumas blong kasem Kingdom ya. I strong blong skae mo graon tufala bambae i lus. Be i strong moa blong wan smol leta nomo blong Loa bambae i lus, we hem i no kamtru.” (NW)

Ol Farisi mo ol tija blong Loa oli tok flas, oli stap talem se oli fasgud long ol Loa blong Moses. Bifo finis, taem Jisas i mekem wan merikel long Jerusalem, we hem i mekem wan blaenman i save lukluk bakegen, ol Farisi oli tok flas, oli se: “Mifala i man blong Moses. Mifala i save gud we God i toktok long Moses.” Be long taem blong Jisas, Loa blong Moses i mekem wok blong hem finis. Hem i pulum ol man we oli gat tingting daon blong oli luksave king ya we God i makemaot hem, hemia Jisas Kraes. Ale taem Jon i statem minista wok blong hem, olkaen man oli traehad tumas blong kam aninit long rul blong Kingdom blong God. Ol puaman mo ol man we oli gat tingting daon oli traehad moa blong mekem olsem.

Loa blong Moses i kamtru finis, taswe ol man oli no moa nidim blong fasgud long hem. Loa blong Moses i talem se i oraet nomo we man mo woman tufala i divos from sam samting. Be Jisas i talem se: “Man we i mekem divos long woman blong hem, nao i mared bakegen long narafala woman, hem i mekem sin ya we i mekem i krankge long stret woman blong hem. Mo man we i mared long woman we man blong hem i mekem divos long hem, hem tu i mekem sin olsem.” !Ol stret tok olsem ya i mas stikim ol Farisi, from we oli letem ol man oli mekem divos long plante rod!

Nao Jisas i talem wan parabol long ol Farisi. Hem i storebaot tu man, we biaen, wan bigfala samting i hapen, nao laef blong tufala i jenis olgeta. ?Tufala ya i pija blong hu? ?Wanem mining blong ol samting we i kamaot long laef blong tufala? Traem luksave:

Jisas i talem se: “I gat wan rijman we i stap putum ol flas klos blong hem we oli red olsem klos blong king mo oli waet we oli gud tumas. Mo evri dei, hem i stap kakae ol gudgudfala kakae. Mo afsaed long get blong yad blong hem, i gat wan puaman i stap, nem blong hem Lasros, we bodi blong hem i fulap long ol soa. Man ya, oltaem hem i wantem tumas blong kakae ol hafkakae ya we i stap foldaon aninit long tebel blong rijman ya, be no gat. Mo oltaem ol dog oli stap kam likim ol soa blong hem.”

Jisas i tokbaot rijman ya blong soemaot fasin blong ol lida blong skul blong ol man Jyu. Hemia ol Farisi mo ol tija blong Loa, wetem ol Sadusi mo ol jif pris tu. Fasin blong olgeta i sem mak long fasin blong rijman ya. I olsem we oli rij from we oli gat wok long saed blong speret, mo oli gat jans blong kasem plante blesing from. Ol klos we oli red olsem klos blong king, oli minim se ol man ya oli gat jans blong kasem moa blesing, i winim ol man olbaot. Ol waet klos we oli gud tumas, oli pija blong ol fasin we ol lida ya oli stap mekem blong traem soemaot long ol man se oli stret man.

Ol flas man we oli olsem rijman ya, oli ting se oli moa gud, oli winim ol puaman, no ol parakot man. Oli kolem olgeta ‵am ha·ʹaʹrets, hemia ol man blong graon nomo. Taswe puaman ya, Lasros, hem i saen blong ol man we oli hanggri long saed blong speret. Oli wantem kasem ol kakae mo ol wok long saed blong speret, be oli no save kasem from we ol lida blong ol gyaman skul oli stap blokem olgeta. Ale, oli no save kakae gud long saed blong speret. Ol lida blong skul oli tingbaot olgeta olsem Lasros, we bodi blong hem i fulap long ol soa. Oli daonem ol parakot man ya, oli talem se oli sik long saed blong speret we oli naf blong stap wetem ol dog nomo. Be ol man ya we oli gat fasin olsem Lasros oli hanggri mo oli tosta long saed blong speret. Taswe oli stap stanap long get blong yad blong rijman, oli stap lukaot ol hafkakae long saed blong speret we i stap foldaon aninit long tebel blong rijman ya.

Nao Jisas i gohed, i tokbaot olsem wanem laef blong rijman ya mo Lasros i jenis. ?Wanem samting i hapen long tufala? ?Wanem mining blong ol samting we i hapen?

Laef Blong Rijman Mo Lasros i Jenis, i Kam Narakaen

Rijman ya i saen blong ol lida blong ol skul, we oli gat moa jans, i winim ol narafala man, blong kasem fulap blesing long saed blong speret. Lasros i pija blong ol parakot man we oli hanggri long saed blong speret. Jisas i gohed long store blong hem, nao hem i tokbaot olsem wanem laef blong tufala i jenis.

Hem i talem se: “Nao biaen, puaman ya i ded, mo ol enjel oli kam karem i go stap kolosap long saed blong Ebraham, long heven. Nao rijman ya tu i ded, mo ol man oli berem hem, mo hem i stap harem i nogud tumas, long ples blong ol dedman. Nao hem i lukluk i go antap, i luk Ebraham we i stap longwe, mo Lasros we i stap long saed blong hem.”

Rijman mo Lasros tufala i no rili man. Be tufala i pija blong tu kampani blong ol man. Taswe ded blong tufala tu i wan saen nomo. ?Ded blong tufala i saen blong wanem?

Jisas i talem finis long olgeta se taem blong hem i defren olgeta long taem blong Moses bifo. Hem i bin talem se “kam kasem taem blong Jon Baptaes, i gat ol loa blong Moses wetem ol tok blong ol profet oli stap.” Be long taem blong hem nao, “i gat Kingdom blong God, we gud nyus blong hem i go long ol man.” Ale, taem Jon Baptaes mo Jisas Kraes tufala i prij, long taem ya nao i olsem we rijman mo Lasros tufala i ded. Nao i olsem we laef blong tufala i jenis, i kam narakaen. ?Olsem wanem?

Ol man we oli gat fasin olsem Lasros, oli gat tingting daon, nao oli tanem tingting blong olgeta from sin blong olgeta. I olsem we oli ded, from we oli livim olfala laef blong olgeta, we oli hanggri long saed blong speret, nao oli kasem plante blesing long God. Bifo, oli dipen long ol lida blong skul blong olgeta blong givim hafkakae long saed blong speret we i foldaon long tebel blong olgeta. Be nao, from we Jisas i stap tijim trutok blong Baebol long olgeta, oli fulap gud long ol kakae long saed blong speret. From samting ya, i olsem we oli go stap kolosap long saed blong Bigfala Ebraham, Jeova God. Hem i glad long olgeta.

Be ol man we oli olsem rijman long pija tok blong Jisas, God i no glad nating long olgeta, from we oli no wantem harem gud nyus we Jisas i stap talemaot long saed blong Kingdom. Taswe i olsem we olgeta oli ded. Laef blong olgeta i jenis. Bifo, i luk olsem we God i glad long olgeta. Be naoia, i no olsem. Jisas i talem se oli stap olsem we oli harem nogud tumas long bodi blong olgeta. Lesin nao, rijman i stap toktok, i se:

“Papa Ebraham, plis yu sore long mi. Plis yu sanem Lasros i go pusum fingga blong hem long kolwora, i kam putum long tang blong mi, blong mekem tang blong mi i kol. From we mi mi stap harem i nogud tumas long faea ya.” Ol disaepol blong Jisas oli talemaot ol strong jajmen blong God long ol man we oli olsem rijman. From we mesej blong olgeta i strong tumas, i olsem we faea i stap kakae ol man ya, nao oli harem i nogud tumas. Oli wantem se ol disaepol blong Jisas oli no moa talemaot ol mesej ya we oli stap stikim olgeta. Olsem nao, oli save harem gud lelebet, we oli no moa harem i soa tumas.

“Be Ebraham i talem se ‘?Pikinini blong mi, olsem wanem yu yu fogetem laef blong yu bifo? Bifo yu yu stap long gudfala laef, be Lasros i stap trabol tumas long laef blong hem. Be nao, long ples ya, hem i stap harem i gud, mo yu yu stap harem i nogud. Be bakegen, long medel blong yumitufala i gat wan bigfala hol i stap, blong blokem yumi. Nao i no gat wan long mifala we sipos i wantem olsem, i save go long yu. Mo i no gat wan long saed blong yu we i save kam long mifala.’ ”

I stret nomo we laef blong tufala i jenis, nao ol man olsem Lasros oli harem i gud tumas, be ol man olsem rijman, oli harem i nogud tumas. Sam manis biaen, long Pentekos long yia 33 K.T., jenis ya i kamaot long laef blong ol man ya. Long taem ya nao, olfala kontrak we God i mekem wetem ol man Isrel bifo, i finis. Mo nyufala kontrak i tekem ples blong hem. Nao i kam klia nomo we ol Farisi mo ol lida blong ol narafala skul oli no man blong God. Be ol disaepol blong Jisas nomo oli kasem blesing blong God. Long medel blong Lasros mo rijman i gat wan “bigfala hol” i stap, blong blokem tufala. Hemia i minim stret jajmen blong God, we i no save jenis. Samting ya i seraotem ol man we oli olsem rijman long ol disaepol blong Jisas.

Nao rijman ya i askem wan samting long “Papa Ebraham,” i se: “Plis, yu sanem Lasros i go long haos blong papa blong mi, from we mi gat faef brata blong mi i stap.” Tok ya blong rijman i soemaot se hem i gat wan narafala papa, we i kolosap moa long hem. Narafala papa ya, hem i Devel Setan. “Faef brata” blong hem i minim ol man we oli wok wetem hem long saed blong skul. Rijman ya i wantem se Lasros i no strong tumas long olgeta, taem hem i talemaot ol jajmen blong God long olgeta. Hem i no wantem we oli kam “long ples ya we i ples blong harem nogud tumas.”

“Be Ebraham i talem se ‘No, be i gat tok blong Moses wetem tok blong ol profet i stap. . . . I gud ol brata ya blong yu oli harem ol tok ya blong olgeta.’ ” Yes, sipos ol “faef brata” ya oli no wantem harem nogud tumas, oli mas harem ol tok blong Moses mo ol profet long taem bifo. From ol profet tok ya, oli mas luksave se Jisas hem i Mesaea, mo oli mas folem hem. Be rijman ya i ansa long Ebraham, i se: “Ei, papa Ebraham, hemia i no naf ya. Be sipos wan man i laef bakegen long ded, i go luk olgeta, yes, bambae oli save tanem tingting blong olgeta from sin blong olgeta.”

Nao Ebraham i talem long hem, i se: “Sipos olgeta oli no save lesin long tok blong Moses mo ol profet, maet narafala man i laef bakegen long ded, be nating. Bambae oli no save bilif long tok blong hem.” Bambae God i no givim sam spesel saen mo merikel blong mekem ol man oli bilif. No gat. Blong hem i glad long olgeta, oli mas ridim Baebol mo oli mas mekem hem i wok long laef blong olgeta. Luk 16:14-31; Jon 9: 28, 29; Matyu 19:3-9; Galesia 3:24; Kolosi 2:14; Jon 8:44.

▪ ?From wanem yumi save se ded blong rijman mo Lasros i wan saen nomo? ?Ded blong tufala i saen blong wanem?

▪ ?Taem Jon i statem minista wok blong hem, olsem wanem laef blong plante man i jenis?

▪ ?Taem Jisas i ded, ol man oli no moa nidim blong fasgud long wanem samting? ?From samting ya, olsem wanem nao long saed blong divos?

▪ ?Long parabol blong Jisas, rijman i minim hu? ?Lasros i minim hu?

▪ ?From wanem rijman i stap harem nogud? ?Hem i askem Ebraham blong mekem wanem, blong hem i save harem gud smol?

▪ ?Wanem mining blong “bigfala hol”?

▪ ?Trufala papa blong rijman, hem i hu? ?Mo faef brata blong hem, oli hu?