Lesen 15

Ol Fren Blong God Oli Mekem Samting We i Gud

Taem yu gat wan fren we yu tinghae long hem mo we yu respektem hem, yu traem folem fasin blong hem. Baebol i talem se: “Fasin blong Hae God i stret, mo hem i stap mekem i gud long man.” (Ol Sam 25:8) Blong stap olsem fren blong God, yumi mas mekem fasin we i stret mo gud. Baebol i talem se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem. Yufala i mas lavem ol man.” (Efesas 5:1, 2) Hemia sam rod blong mekem olsem:

Rere blong halpem ol narafala. “Oltaem, sipos yumi gat janis, yumi mas mekem i gud long olgeta man.”—Galesia 6:10.

Wok had. “Man we i man blong stil, hem i mas lego fasin ya. Hem i mas wok had long stret fasin.”—Efesas 4:28.

Stap klin long bodi mo tingting. “Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan.”—2 Korin 7:1.

Soem lav mo respek long famle blong yu. “Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem. Ol pikinini. Yufala i mas obei long papa mo mama blong yufala.”—Efesas 5:33–6:1.

Soem lav long narafala. “Yumi mas lavlavem yumi, from we fasin ya blong lavem man, hem i kamaot long God.”—1 Jon 4:7.

Obei long ol loa blong kantri. “Yumi evriwan i mas ona long gavman. . . . Yufala i mas pem ol takis blong yufala.”—Rom 13:1, 7.