Lesen 8

?Hu Ya Ol Enemi Blong God?

Bigfala enemi blong God hemia Devel Setan. Hem i wan spirit man we i rebel agensem Jeova. Setan i gohed blong faet agensem God mo i mekem bigfala trabol long ol man. Setan hem i rabis. Hem i wan man blong giaman mo wan man blong kilim man i ded.—Jon 8:44.

Ol narafala spirit man oli joen wetem Setan blong rebel agensem God. Baebol i singaot olgeta ya se ol devel. Olsem Setan, ol devel ya tu oli enemi blong man. Oli laekem blong mekem trabol long man. (Matiu 9:32, 33; 12:22) Jeova bambae i spolem Setan mo ol devel ya blong olwe. Oli gat smoltaem nomo i stap blong mekem trabol long ol man.—Revelesen 12:12.

Sipos yu wantem kam wan fren blong God, yu no mas mekem wanem we Setan i wantem. Setan mo ol devel oli no laekem Jeova. Oli ol enemi blong God, mo oli wantem mekem se yu tu yu kam wan enemi blong God. Yu mas jusum se yu yu wantem mekem hu i glad—?Setan no Jeova? Sipos yu wantem kasem laef we i no save finis, yu mas jusum blong mekem wil blong God. Setan i yusum plante trik mo rod blong pulum ol man oli gorong. Bighaf blong ol man oli foldaon long ol trap blong hem.—Revelesen 12:9.