?OLSEM wanem? ?Taem yu rid long bigfala voes, yu stap mesmestem from we i had blong yu talem sam wod? ?Taem yu stanap fored long plante man blong givim wan tok, i had blong yu faenem ol stret tok blong talemaot tingting blong yu? Sipos i olsem, ating problem blong yu hemia nao, toktok i no rongud. Man we toktok blong hem i rongud, hem i rid mo toktok long fasin we ol wod mo tingting oli kamaot isi nomo. Hemia i no min se hem i gohed blong toktok we i no spel, no i toktok hareap, no i toktok bifo we i tingting long samting we hem i wantem talem. Man we toktok blong hem i rongud, i toktok long fasin we ol man oli glad blong lesin long hem. Long Tiokratik Skul, poen ya “Toktok i Rongud” i wan impoten poen we yu mas wok long hem.

Maet i gat plante risen from wanem toktok blong yu i no rongud. Yu lukluk ol poen we oli kam biaen, mo yu traem luksave problem blong yu: (1) Taem yu rid long fored blong narafala, yu yu slo blong ridim sam wod from we yu no save gud olgeta. (2) Yu yu spel long plante ples, nao i olsem we yu katkatem ol tok blong yu. (3) Yu yu no rere gud fastaem. (4) Taem yu toktok long fored blong wan grup blong man, plante taem toktok i no rongud from we yu yu no putum ol save wanwan oli go long stret ples blong olgeta. (5) Sipos yu no save plante wod, hemia i save mekem se i had blong yu faenem ol stret tok blong eksplenem tingting blong yu. (6) Sipos yu talem strong plante wod, toktok blong yu bambae i no rongud. (7) Sipos yu no save stret wei blong toktok folem ol rul blong lanwis blong yu, hemia tu i save mekem we toktok blong yu i no rongud.

Taem toktok blong yu i no rongud, maet ol man long Haos Kingdom oli no girap mo go afsaed, be i olsem we tingting blong olgeta i go afsaed from we oli tingbaot narafala samting. Sipos samting ya i hapen, bambae oli mestem bighaf blong ol save we yu givimaot.

!Be yu mas lukaot! Taem yu traem toktok wetem paoa mo mekem toktok blong yu i rongud, i nogud yu bitim mak. Sipos yu mekem olsem, bambae ol man oli save ting se ol tok blong yu i strong tumas, mo maet i mekem olgeta oli sem lelebet. Sipos sam man we oli lesin long yu oli kamaot long defren kantri no fasin blong laef, nao oli harem se toktok blong yu i no soemaot respek mo i no kamaot long hat, bambae ol tok blong yu i blong nating nomo. Yu save tingbaot aposol Pol. Hem i givim plante tok mo i save toktok gud, be taem hem i toktok long ol man Korin, hem i mekem olsem we hem i ‘no gat paoa nating, i stap fraet mo i stap seksek.’ Hemia from we hem i no wantem pulum tingting blong ol man i kam long hem nomo.—1 Kor. 2:3.

Sam Fasin We Yu Mas Blokem. Plante man oli gat fasin ya blong talem “aa” bitwin ol wod. Sam narafala oli statem toktok blong olgeta oltaem wetem tok ya “mo” no “be,” mo maet oli finisim wetem “a.” Ating yu no luksave se yu stap yusum ol tok ya oltaem. I gud yu askem long narafala blong hem i lesin long yu taem yu toktok, mo blong hem i talem long yu evri taem we hem i harem wan tok olsem. Maet bambae yu sapraes blong luk hamas taem we yu yusum ol tok olsem.

Sam man, taem oli rid mo toktok, oli talem bakegen sem tok we oli jes talem. Maet oli stat blong toktok, ale oli stop nao oli talem bakegen wanem we oli jes talem.

Sam narafala man, maet toktok blong olgeta i kamaot isi nomo, be oli stat blong talemaot wan tingting, nao bifo we oli finisim tingting ya, oli jam i go long narafala tingting. I no hadwok long olgeta blong save wanem tok blong talem, be from we oli jenisim tingting blong olgeta wantaem nomo, toktok blong olgeta i no rongud.

?Yu Save Mekem Wanem Blong Kam Gud? Sipos i had blong yu faenem ol stret wod blong talem, yu mas traehad blong lanem sam moa wod. Taem yu ridim Wajtaoa, Wekap!, mo ol narafala buk, i gud yu faenem ol wod we yu no save olgeta. Sipos i no gat wan diksonari we i eksplenem ol wod ya, yu askem long wan man we i save gud lanwis blong yu, blong hem i givhan long yu. Nao yu traem yusum ol wod ya long toktok blong yu.

Wan samting we i save givhan long yu, hemia se yu rid smoltaem evri dei long bigfala voes. Yu traem luksave ol wod we oli had, nao yu talem ol wod ya bakegen mo bakegen long bigfala voes.

Blong mekem riding blong yu i rongud, i impoten we yu luksave ol wod we oli mas joen long wan grup. Plante taem, man i mas ridim wan grup blong ol wod blong givim stret tingting, i no wan wod nomo. Yu mas traem luksave ol wod we oli joen long wan grup. I gud yu putum wan mak aninit long ol wod ya. I no naf blong ridim gud ol wod nomo, be yu mas givim wan stret mo klia tingting tu long ol man. Taem yu tingting finis long wan ful toktok mo yu kasem save long hem, yu gohed long nekis ful toktok. Yu mekem olsem gogo yu kasem save gud long ful paragraf. Yu traem luksave bigfala tingting long paragraf ya. Nao yu ridim long bigfala voes. Yu ridim bakegen mo bakegen, gogo yu no moa mestem mo yu no moa stop long rong ples. Nao yu mekem sem mak long ol narafala paragraf.

Nekis samting, yu mas traem spid moa taem yu stap rid. Sipos yu luksave ol wod we oli mas joen long wan grup, ating yu yu naf blong lukluk plante wod wantaem, mo blong tingbaot wanem wod we i mas kam biaen long hemia we yu stap ridim. Samting ya i save givhan bigwan long riding blong yu.

I gud yu traem ridim wan buk we yu neva ridim bifo. Sipos yu mekem samting ya oltaem, hemia i save trenem yu. Wan samting we yu save mekem, yu save ridim vas blong dei long bigfala voes. I gud yu mekem samting ya evri dei. Yu mas lanem blong luksave ol grup blong wod we oli karem wan tingting, be yu no lukluk ol wod wanwan.

Taem yu storian wetem narafala, toktok blong yu i save rongud sipos yu tingting gud fastaem long samting we bambae yu talem. I gud yu folem fasin ya long ol storian blong yu evri dei. Yu mas tingbaot wanem we yu wantem serem wetem narafala, wanem tingting we bambae yu talem fastaem, mo wanem bambae yu talem biaen. Nao yu save toktok. Yu no mas spid tumas. I gud yu traehad blong talemaot wan ful tingting we yu no stop, mo yu no mas jenis i go long wan narafala tingting long medel blong toktok blong yu. Maet yu luk se i gud yu yusum ol sot, isi toktok nomo.

Sipos yu save wanem we yu wantem talem, i isi blong faenem ol stret wod. I no nid blong yu tingbaot evri wod we bambae yu talem. I moa gud yu meksua se bigfala poen we yu wantem tokbaot i klia long tingting blong yu, ale taem yu stap toktok, yu save faenem ol stret wod. Sipos yu no tingting tumas long ol wod we bambae yu yusum be yu tingting moa long bigfala poen we yu wantem tokbaot, bambae ol wod oli kam isi nomo, mo bambae ol tok i kamaot long hat blong yu. Be sipos yu stap tingting tumas long ol wod i bitim we yu tingbaot bigfala poen we yu wantem serem, toktok blong yu bambae i no rongud. Sipos yu trenem yu wan, samting ya i save givhan blong mekem toktok blong yu i rongud. Hemia i impoten sipos yu wantem toktok gud mo rid gud.

Taem Jehova i askem long Moses blong i karem toktok blong Hem i go long neson blong Isrel mo king blong Ijip, Moses i harem se hem i no naf. ?From wanem? From we hem i no save toktok gud. Maet hem i gat wan problem long bodi blong hem we i mekem se i no isi blong hem i toktok. (Eks. 4:10; 6:12) Ale Moses i mekem eskius, be God i no lesin long eskius ya. Jehova i sanem Eron i go wetem Moses blong i toktok long ples blong hem. Mo tu, Jehova i halpem Moses blong i toktok. Ale, Moses i toktok bakegen mo bakegen, mo i toktok gud tu, long wanwan man, long ol smol grup blong man, mo long ful neson blong Isrel. (Dut. 1:1-3; 5:1; 29:2; 31:1, 2, 30; 33:1) Sipos yu trastem Jehova mo yu traem bes blong yu blong kam gud moa long fasin blong toktok, bambae yu ona gud long Jehova.

TAEM yu toktok, i impoten blong spel smol long stret ples. Nating sipos yu stap givim wan tok long fored blong plante man no yu stap storian wetem wan man nomo, be yu mas spel smol. Sipos i no gat spel, maet toktok blong yu i olsem noes nomo, mo i no soemaot klia ol tingting blong yu. Smol spel long ol stret ples i givhan blong mekem mining blong ol tok blong yu i klia. Mo tu, ol smol spel olsem oli save mekem se ol man oli rimemba ol bigfala poen long tok blong yu.

?Wetaem i stret blong spel? ?Bambae yu save samting ya olsem wanem? ?Spel i mas longfala olsem wanem?

Yu Spel Smol Long Ol Mak. Ol mak olsem fulstop mo koma, oli impoten tumas taem ol man oli raetemdaon ol tok. Ol mak ya oli givhan long man blong i luksave wetaem wan ful toktok i finis, mo wanem tok we i olsem wan kwestin. Long sam lanwis, i gat wan spesel mak blong soemaot tok we wan man i talem no tok we i kamaot long wan buk. Sam mak oli soemaot olsem wanem haf blong wan ful toktok i joen wetem narafala haf. Taem man i rid hem wan, hem i stap luk ol mak ya nomo. Be taem hem i rid long fored blong plante man, voes blong hem i mas givim stret mining blong ol mak ya we oli stap long buk no pepa we hem i ridim. (Blong save moa long saed ya, lukluk Poen 1, “Riding We i Stret.”) Sipos yu no spel smol folem ol mak we oli stap, bambae i had blong ol narafala oli kasem save long samting we yu stap ridim, mo maet yu no givim stret mining blong ol tok we yu stap ridim.

Narafala samting we i soemaot weples i stret blong spel smol, hemia fasin blong man blong talemaot ol tingting we oli stap long wan ful toktok. Wan man blong plei miusik, we plante man oli save gud long hem, i talem se: “Mi plei ol not we oli stap long miusik sem mak olsem ol narafala man blong plei piano. Be ol spel bitwin ol not, hemia nao samting we i mekem miusik i naes.” Samting ya i sem mak taem yu toktok. Sipos yu spel long stret ples, bambae yu mekem se tok we yu hadwok blong rerem, i gat mining mo ol man oli glad blong lesin.

Taem yu stap mekemrere blong rid long fored blong plante man, i gud yu putum sam mak long buk no pepa we bambae yu ridim. Yu makem wan smol laen, i stat antap i kamdaon, long ol ples we bambae yu spel blong sot taem nomo. Yu makem tu laen olsem, long ol ples we yu wantem spel longtaem lelebet. Sipos i gat sam wod we oli had nao yu stap spel long ples we i no stret, yu putum wan mak blong joenem ol wod ya. Ale yu traem ridim ol wod ya wantaem. Plante man we oli givim ol gudfala tok, oli stap mekem olsemia.

Long ol storian blong yu evri dei, ating i no hadwok blong spel smol, from we yu save finis wanem tingting we yu wantem talem. Be sipos yu stap spel olbaot mo yu no tingbaot weples i stret blong spel blong givim stret tingting, bambae ol tok blong yu i no gat paoa, mo mining blong hem bambae i no klia. Sam gudfala advaes i stap long Poen 4, “Toktok i Rongud.”

Yu Spel Smol Blong Go Long Narafala Poen. Taem yu tokbaot wan poen finis nao yu wantem go long narafala poen, wan smol spel i save givim janis long ol man blong oli tingbaot samting we yu jes talem, mo blong oli rere from wan jenis. Oli save se bambae yu tokbaot wan narafala poen, mo oli kasem save moa long niufala poen ya we bambae yu tokbaot. Taem yu go long narafala poen, i impoten we yu spel smol, sem mak olsem we i impoten blong slodaon taem yu wantem tanem trak long kona blong go long narafala rod.

Sam man oli wantem givimaot tumas save, ale oli spid nomo long wan poen i go long nekis poen we oli no spel nating. Samfala oli mekem olsem long ol toktok blong olgeta evri dei. Maet ol man raonabaot long olgeta oli toktok long fasin ya tu. Be man we i toktok olsem i no save tij gud. Sipos yu gat wan samting blong talem we i impoten mo we ol man oli mas holem long tingting blong olgeta, yu mas tektaem blong mekem samting ya i klia. Yu mas tingbaot se, sipos yu wantem we tok blong yu i karem ol tingting i go long ol man long klia fasin, yu mas spel smol.

Sipos yu kasem wan pepa we plan blong tok i stap long hem finis, yu mas rerem tok ya long fasin we i isi blong luksave ples we yu mas spel long hem, afta we yu finisim wan bigfala poen mo yu wantem go long nekis bigfala poen. Sipos yu gat wan tok blong givim we yu mas ridim evri wod blong hem long pepa, i gud yu putum wan mak long ol ples we yu luk se wan bigfala poen i finis mo narawan i stat.

Taem yu wantem go long wan narafala poen, plante taem spel i longfala moa i bitim spel blong ol koma mo fulstop. Be i nogud yu pulum ol spel oli longfala tumas. Samting ya i save mekem se ol man oli les blong lesin. Sipos yu spel longtaem tumas, ol man oli save ting se yu no rere gud mo yu stap traem blong tingbaot ol stret tok blong talem.

Yu Spel Smol Taem Yu Talem Samting We Yu Wantem Se Narafala i Rimemba. Taem yu talem wan samting we yu wantem se ol man oli rimemba, plante taem yu spel smol jes bifo no jes afta we yu talem wan strong tok no wan kwestin we i gat paoa. Wan spel olsem i givim janis long ol man blong oli tingting long wanem we yu jes talem, no i pulum olgeta blong oli lesin gud long wanem we bambae yu talem. Tufala samting ya i no sem mak. Yu mas jusum weswan i stret blong mekem long tok blong yu. Be yu mas tingbaot se yu spel blong mekem ol man oli rimemba ol poen nomo we oli impoten. Sipos yu spel long plante ples, ol man bambae oli no save wanem i impoten long tok blong yu.

Taem Jisas i ridim Baebol long ol man long haos prea long Nasaret, hem i yusum gud fasin ya blong spel smol. Fastaem, hem i ridim profet tok blong Aesea. Nao bifo we hem i eksplenem profet tok ya, hem i satem buk, i givimbak long man we i stap lukaot long ol buk, mo i sidaon. Olgeta man long haos prea ya oli stap lukluk hem, nao hem i talem se: “Tede, . . . God i stap mekem ol samting we tok ya i talem, oli kamtru.”—Luk 4:16-21.

Yu Spel Smol Taem Wan Samting i Blokem Toktok Blong Yu. Wanwan taem maet yu mas spel smol from sam noes. Taem yu stap storian wetem wan man long wok blong prij, maet wan trak i pas no wan pikinini i krae, we i mekem se yu mas stop smoltaem. Long asembli, maet i gat wan noes we i no bigwan tumas, ale, yu mekem voes blong yu i kam antap mo yu gohed long tok blong yu. Be sipos noes i bigwan mo i gohed longtaem lelebet, yu mas spel smol. Ol man oli no save lesin taem i gat noes. Ale, yu mas yusum gud fasin ya blong spel smol, blong mekem se ol man oli kasem ol gudfala samting we yu wantem talem long tok blong yu.

Yu Spel Smol Blong Man i Ansa. Maet yu askem wan kwestin long tok blong yu we i no blong ol man oli talemaot ansa blong hem. Nating se i olsem, i impoten yet blong spel smol blong oli save ansa long kwestin ya long tingting blong olgeta. Sipos yu askem wan kwestin blong mekem ol man oli tingting be biaen yu no spel smol, bambae kwestin blong yu i no mekem wok blong hem.

I no long ol tok long Haos Kingdom nomo we yu mas spel smol. Samting ya i impoten long wok blong prij tu. Sam man oli no spel nating taem oli toktok. Sipos yu yu olsem, yu mas traem bes blong yu blong lanem blong spel smol. Bambae yu luk we ol storian blong yu wetem ol narafala man mo long wok blong prij tu, oli kam gud moa. Taem yu spel smol, yu stop blong smoltaem, yu no moa toktok. Hemia i gud, from we i mekem se yu no gohed olwe olsem we yu toktok tumas. Smol spel ya i save givhan long man blong i rimemba samting we yu talem, i save pulum man blong i lesin, mo i givim spel long sora blong hem tu blong hem i rere blong lesin bakegen.

Long ol storian blong yumi evri dei, yumi toktok mo narafala man i toktok tu. Narafala i glad moa blong lesin long yu taem yu yu lesin long hem, mo taem yu soemaot se yu glad long samting we hem i talem. Hemia i min se yu mas spel smol blong givim janis long narafala blong i talem tingting blong hem.

Long wok blong prij, man i glad moa taem yu givim janis long hem blong i talemaot tingting blong hem, i bitim we yu nomo yu toktok. Plante Witnes oli talem halo, oli talem wanem samting we oli kam blong tokbaot, mo oli askem wan kwestin. Oli luk se fasin ya i wok gud. Biaen oli spel smol blong givim janis blong man i ansa, nao oli talem sam tok blong soemaot se oli kasem save long tingting blong hem. Taem oli gohed blong storian, maet oli givim sam narafala janis bakegen blong man ya i save toktok. Oli save se blong givhan gud long wan man, oli mas save tingting blong hem long samting we oli stap tokbaot.—Prov. 20:5.

I no evri man we bambae oli givim gudfala ansa long ol kwestin blong yu. Be samting ya i no blokem Jisas. Hem i gohed blong spel smol, nating se man we i ansa i agensem hem. (Mak 3:1-5) Taem yu givim janis long narafala blong i toktok, yu pulum hem blong i tingting, mo maet hem i talemaot samting we i stap long hat blong hem. Wan risen blong prij, i blong kasem hat blong ol man mo pulum olgeta blong oli tekem aksen. Yumi mekem olsem taem yumi tokbaot sam impoten kwestin long Baebol, we ol man oli mas mekem desisen long olgeta.—Hib. 4:12.

Yes, taem yumi prij, i no isi blong save wetaem i stret blong spel smol. Be taem yumi yusum gud fasin ya blong spel smol, yumi givim ol klia tingting long ol man, mo yumi givhan long man blong i rimemba ol poen we yumi tokbaot.

TAEM yu toktok no yu rid long bigfala voes, i impoten blong talem mo ridim stret ol wod. Be i no hemia nomo. I impoten tu blong talem strong ol stamba wod mo ol tok we oli karem tingting we yu wantem givim long ol man.

Taem yu talem strong ol tok we i stret blong talem strong, hemia i no minim nomo se yu talem strong sam wod no plante wod. Yu mas jusum ol stret wod blong talem strong. Sipos yu talem strong ol wod we oli no stret, mining blong samting we yu talem bambae i no klia, nao ol man bambae oli no moa lesin, bambae oli tingbaot narafala samting. Nating se yu gat ol gudfala save blong givimaot, be sipos yu no talem strong ol tok we i stret blong talem strong, tok blong yu bambae i no gat bigfala paoa long olgeta we oli lesin.

I gat plante rod blong talem strong ol tok. Plante taem yu save yusum tu long ol rod ya wantaem, no maet bitim tu: Yu talem ol tok ya wetem voes we i strong moa, yu soemaot long voes blong yu ol fasin we oli stret long ol tok we yu stap talem, yu toktok slo mo klia, yu spel smol bifo no afta ol tok we yu wantem talem strong (no yu save spel bifo mo afta), yu muvum han, bodi, mo fes blong yu. Long sam lanwis, man i save talem strong ol tok taem hem i jenisim tiun blong voes blong hem. Yu mas tingting gud long wanem we bambae yu tokbaot, ples we yu stap long hem, mo ol man we oli lesin. Samting ya bambae i givhan long yu blong yu save weswan rod i beswan blong talem strong ol tok.

Taem yu stap jusum wanem wod we yu wantem talem strong, yu mas tingbaot ol samting ya: (1) Long wan ful toktok, yu mas luksave ol wod we i stret blong talem strong. Blong mekem olsem, yu mas luk ol narafala wod long ful toktok ya, mo tu, yu mas luk ol narafala tok long paragraf. (2) Maet yu wantem talem wan narafala tingting we i wan bigfala poen no i wan narafala wei nomo blong eksplenem sem poen. Blong soemaot se yu statem wan narafala tingting, yu save talem strong sam tok. Mo tu, taem yu eksplenem wan poen finis, yu save talem strong sam tok blong soemaot en blong hem. (3) Yu save talem strong sam tok blong soemaot se yu harem olsem wanem long tok we yu stap talem. (4) Taem yu talem strong sam tok, hemia i save givhan tu blong mekem ol bigfala tingting oli kamaot klia.

Sipos man we i givim tok no i rid long fored blong ol narafala i wantem yusum ol rod ya, hem i mas kasem save fastaem long samting we bambae hem i tokbaot. Mo tu, hem i mas wantem tumas we ol man oli kasem gud ol save ya. Nehemaea 8:8 (NW) i tokbaot ol tija long taem blong Esra, se: “Olgeta oli gohed blong ridim buk blong loa blong tru God long bigfala voes, oli eksplenem mo talemaot mining blong hem. Mo oli rid long fasin we i halpem ol man blong kasem save long ol tok ya.” I klia se ol man ya we oli ridim mo eksplenem Loa blong God, oli luk se i impoten blong givhan long ol man blong oli kasem mining blong samting we oli ridim. Mo tu, oli mas givhan long ol man blong oli holem ol tok ya i stap long tingting blong olgeta, mo blong oli mekem i wok long laef blong olgeta.

?Wanem i Save Mekem Problem i Kamaot? Taem ol man oli storian, oli naf blong mekem mining blong tok blong olgeta i klia. Be taem oli ridim wan samting we narafala man i raetem, maet i had blong oli luksave wanem wod no toktok we oli mas talem strong. Bigfala samting i blong kasem save gud long wanem we yu ridim. Hemia i min se yu mas stadi gud long hem. Taswe, sipos yu rid long wan miting blong kongregesen, yu mas meksua se yu rere gud.

Taem sam man oli rid, oli talem strong sam wod, be ol wod ya oli no ol stret wod blong givim mining. Sam narafala oli talem strong ol tok olsem long, mo, be, taem, mo from. Be taem yu talem strong ol tok we oli no givhan long man blong i kasem klia save, kwiktaem nomo bambae hem i no moa lesin long tok blong yu, be bambae hem i stap tingbaot nomo fasin blong yu blong toktok.

Samtaem, man we i talem strong sam tok i mekem voes blong hem i strong tumas, ale ol man oli harem se hem i stap stretem olgeta. Fasin olsem i no karem gudfala frut. Ol man bambae oli luksave se hemia i no prapa fasin blong hem blong toktok, mo maet oli harem se hem i stap daonem olgeta. !I moa gud yu toktok long kaen fasin, mo yu givhan long ol man blong oli kasem se samting we yu talem i stanap long Baebol mo i no strong tumas blong mekem!

?Yu Mekem Wanem Blong Kam Gud Moa? Maet wan man i no talem strong ol tok we i stret blong talem strong. Plante taem, man olsem i no save se i gat problem ya. Narafala i mas talem long hem. Sipos yu yu mas wok long poen ya, elda we i lukaot long Tiokratik Skul bambae i givhan long yu. Mo tu, yu no mas fraet blong askem long narafala we i stap givim ol gudfala tok, blong hem i givhan long yu. Yu save askem long hem blong i lesin gud taem yu rid mo toktok, nao hem i save givim sam advaes long yu.

Fastaem, maet brata we i givim advaes i talem long yu blong ridim wan haf blong Wajtaoa blong trenem yu. Hem i talem long yu blong tingting gud long evri ful toktok long haf we yu ridim. Nao yu traem luksave weswan wod mo toktok we yu mas talem strong, blong mekem i isi blong ol man oli kasem mining blong riding ya. Maet hem i talem tu se yu no mas fogetem ol wod we oli raetem long fasin we i lei smol. Yu mas tingbaot se olgeta wod long wan ful toktok oli joen blong givim wan tingting. Plante taem, i no wan wod nomo we yu mas talem strong, be plante wod wantaem. Long sam lanwis, ol man oli mas lukluk gud long ol wod we oli gat mak long olgeta, from we sam long ol mak ya oli givhan long olgeta blong oli save rod blong talem strong ol tok.

Biaen, maet brata i givim advaes long yu se yu mas lukluk long paragraf we ful toktok ya i stap long hem. ?Wanem bigfala tingting long paragraf ya? ?Bigfala tingting ya i givhan olsem wanem, blong yu save ol tok we yu mas talem strong long evri ful toktok? Nao yu lukluk stamba tok blong ful stori, mo yu lukluk smol stamba tok we paragraf ya i stap aninit long hem. Stamba tok ya mo smol stamba tok ya, tufala i save givhan long yu blong yu luksave ol tok we i stret blong talem strong. Yu mas tingbaot olgeta samting ya. Be yu mas lukaot se ol tok we yu talem strong oli no plante tumas.

Nomata sipos yu givim wan tok no yu rid long fored blong ol man, maet brata we i givim advaes i talem se i gud yu luksave bigfala tingting long tok no riding ya, nao samting ya i save givhan long yu blong yu talem strong ol tok we i stret blong talem strong. Yu mas luksave weples ol tok blong eksplenem wan poen i finis, no weples yu finisim wan tingting nao yu go long narafala tingting. Ol man we oli stap lesin, bambae oli glad moa long tok blong yu sipos oli luksave wetaem ol jenis ya oli kamaot. Yu save soemaot ol jenis ya taem yu talem strong sam tok, olsem tok ya fastaem, narafala samting, laswan, mo taswe.

Brata we i givim advaes bambae i givhan long yu blong yu save weples voes blong yu i mas jenis, blong soemaot se yu harem olsem wanem long ol save we yu stap tokbaot. Maet yu talem strong sam tok, olsem tok ya tumas, yes, nogat, neva, impoten, mo oltaem. Taem yu mekem olsem, tok blong yu i save tajem hat blong ol man. Bambae yumi tokbaot samting ya moa long Poen 11, “Toktok Kaen Mo Soemaot Ol Defren Fasin Long Voes Blong Yu.”

Ating brata ya i talem se ol bigfala tingting we yu wantem se ol man oli no fogetem, oli mas stap klia fastaem long tingting blong yu. Bambae yumi luk samting ya moa long Poen 7, “Talem Strong Ol Bigfala Tingting,” taem yumi tokbaot riding, mo long Poen 37, “Mekem Ol Bigfala Poen Oli Kamaot Klia,” taem yumi tokbaot ol tok blong yumi.

Sipos yu wantem kam gud moa long wok blong prij, yu mas tingting gud long fasin blong yu blong ridim ol vas. Yu mas tingbaot se: ‘?From wanem mi stap ridim vas ya?’ Taem yu tijim narafala, i no naf blong ridim stret ol wod olsem oli stap. Maet yu soemaot ol defren fasin long voes blong yu we oli stret long ol save long vas ya, be hemia tu i no naf. Sipos yu stap givim ansa long kwestin we wan man i askem, no yu stap tijim man long wan stamba tijing blong Baebol, i gud yu talem strong ol wod no toktok long vas ya we oli sapotem poen we yu stap tokbaot. Sipos yu no mekem olsem, man i save mestem poen we yu wantem se hem i kasem long vas ya.

Taem yu talem strong ol tok, yu yusum wan voes we i strong moa blong talem wan wod no sam wod. Be wan man we i no mekem plante tok yet, maet hem i talem ol wod ya oli strong bitim mak. Sipos hem i mekem olsem, tok blong hem bambae i sem mak long miusik blong wan man we i jes stat blong plei gita. Man olsem i mas plei bakegen mo bakegen, nao ol man bambae oli no moa harem ol not wanwan we hem i plei, be bambae oli harem nomo wan naes miusik we i tajem hat blong olgeta.

Afta we yu lanem sam stamba rod blong talem strong sam tok, yu save lanem plante moa samting yet, sipos yu lesin gud long ol brata we oli givim ol gudfala tok. I no longtaem, bambae yu luk se taem yu talem sam tok long fasin we i strong smol, mo sam narafala tok long fasin we i strong gud, samting ya i givhan bigwan. Mo bambae yu luk se i impoten blong yusum ol defdefren rod blong talem strong ol tok. Sipos yu lanem blong talem strong ol tok we i stret blong talem strong, hemia bambae i givhan gud long riding blong yu mo long fasin blong yu blong toktok.

Yu mas lanem gud blong talem strong ol tok we i stret blong talem strong, i no naf blong lanem smol nomo. Blong mekem we toktok blong yu i gat paoa long laef blong man, yu mas wok long poen ya gogo yu save gud ol rod blong talem strong ol tok. Nao ol man bambae oli luk se hemia prapa fasin blong yu blong toktok.

WAN man we i ridgud, hem i no tingbaot nomo ful toktok we hem i stap ridim, mo ful paragraf tu. Taem hem i rid, hem i tingbaot ol bigfala tingting long ful stori we hem i ridim. Nao hem i save weples hem i mas talem strong wan tingting.

Sipos yu no folem fasin ya, bambae i olsem we i no gat wan impoten poen long tok blong yu. Bambae i no gat wan tingting we i kamaot klia. Taem tok blong yu i finis, bambae i hadwok long ol man we oli lesin blong oli rimemba wan bigfala poen.

Taem yu ridim wan stori long Baebol, yu mekem se stori ya i laef sipos yu talem strong ol bigfala tingting. Taem yu rid long wan Baebol stadi no wan miting blong kongregesen, riding blong yu i gat moa mining sipos yu talem strong ol bigfala tingting. Fasin ya i impoten tumas taem yu givim wan tok we yu mas ridim fulwan long pepa, olsem sam tok long ol bigfala asembli blong yumi.

Rod Blong Mekem. Long Tiokratik Skul, maet yu mas ridim wan haf blong Baebol. ?Wanem ol bigfala tingting we yu mas talem strong? Sipos i gat wan bigfala tingting no impoten samting we i hapen long stori ya, i stret blong mekem samting ya i kamaot klia.

Nomata sipos yu ridim ol naesfala vas no ol save nomo, yu ridim ol waes tok no wan stori nomo, be save ya bambae i givhan moa long ol man sipos yu ridgud. (2 Tim. 3:16, 17) Blong mekem olsem, yu mas tingting gud long tu samting, hemia riding blong yu, mo ol man we oli lesin.

Sipos yu rid long wan Baebol stadi no long wan miting blong kongregesen, i gud yu tingbaot se: ‘?Wanem ol bigfala tingting we mi mas talem strong?’ I gud yu tingbaot ansa blong ol kwestin long ol paragraf se hemia nao ol bigfala tingting. Mo tu, i gud yu talem strong ol tingting we oli laenap wetem smol stamba tok blong haf we yu stap ridim.

Taem yu givim wan tok long kongregesen, i no nid blong raetemdaon evri wod we yu wantem talem. Be long distrik asembli, i gat wanwan tok we brata i mas ridim evri wod we i stap finis long wan pepa. Oli mekem olsem blong meksua se ol tingting oli kamaot long sem fasin long evri distrik asembli raon long wol. Brata we i mekem tok olsem, i mas ridim gud mo tingting gud fastaem long ol save long tok ya, nao bambae hem i faenem ol bigfala tingting we hem i mas talem strong. ?Wanem ol bigfala poen long tok ya? Brata i mas luksave olgeta. Wan bigfala poen i no wan tingting we brata ya nomo i ting se i gud. Nogat. Ol bigfala poen oli ol stamba tingting we ful tok i stanap long olgeta. Long sam tok we brata i mas ridim fulwan, oli raetem sot tok fastaem blong talem wan bigfala tingting, nao biaen i gat wan stori no pruf we i sapotem tingting ya. Be long bighaf blong ol tok olsem, fastaem oli givim ol pruf blong sapotem wan bigfala tingting, ale biaen oli talem sot tok we i gat paoa. Taem brata we i givim tok i luksave ol bigfala tingting ya, hem i mas putum wan mak aninit long olgeta. Klosap oltaem i no gat plante bigfala tingting, ating i gat fo no faef nomo. Nekis samting we brata i mekem, hem i mas trenem hem blong ridim tok ya long fasin we bambae ol man oli kasem ol bigfala tingting ya. Hemia nao ol impoten poen long tok long hem. Sipos brata i talem strong ol bigfala tingting ya, bambae i isi blong ol man oli rimemba olgeta. Hemia nao samting we brata we i givim tok ya i wantem.

I gat plante rod blong talem strong ol bigfala tingting, blong ol man oli luksave ol impoten poen. Maet brata i toktok wetem glad, i tok slo, i soemaot long voes blong hem se i harem olsem wanem long ol save we hem i stap tokbaot, i muvum han, bodi, no fes blong hem, no i yusum wan narafala rod bakegen.