“Oli No Wantem Lesin”

MAN we i no wantem lesin long woning i save kasem bigfala trabol.

Long 1974, ol man long taon ya Darwin long Ostrelia oli mekem rere from wan lafet we oli stap mekem evri yia, nao oli harem wan bigfala wesil i singaot blong givim woning se hariken i stap kam. Be i no gat wan hariken long Darwin blong 30 yia. ?Olsem wanem? ?Woning ya i tru? Plante man oli no ting se i gat denja. Be i no longtaem, bigfala win i kam we i karkaremaot ol ruf mo smasem wol blong ol haos we ol man oli stap haed long olgeta. Long nekis moning, taon ya i flat.

Long Kolombia, long Novemba 1985, wan volkeno i bosta. Hot blong hem i mekem se ol sno mo aes i ron, nao i karem sofmad i godaon long saed blong hil mo i kavremap taon blong Armero long stamba blong hil ya. Sofmad ya i berem bitim 20,000 man. ?Olsem wanem? ?Ol man ya oli bin kasem woning? Yes. Hil ya i bin seksek blong plante manis bifo we disasta ya i hapen. Be bighaf blong ol man Armero oli no wari from we oli laef klosap long volkeno ya longtaem finis i kam. Ol haeman blong taon oli kasem woning se wan disasta bambae i kamaot, be oli no talemaot woning long ol man. Ol man long radio oli talem plante toktok blong traem kwaetem tingting blong ol man. Samfala oli yusum laodspika blong jos blong talem long ol man blong stap kwaet. Long sapa, volkeno i bosta tu taem. ?Sipos yu yu stap long ples ya, bambae yu lego olting blong yu blong ronwe long trabol ya? Smol man nomo oli mekem olsem, ale biaen, i let tumas blong ol narafala oli ronwe.

Plante taem ol man we oli stadi long ol etkwek oli save talemaot stret ples we bambae graon i seksek. Be sam samtaem nomo oli save talemaot stret taem we bambae graon i seksek. Long 1999, 20,000 man raon long wol oli ded long ol etkwek. Plante long olgeta oli no bin ting se samting ya i save hapen long olgeta.

?Yu Yu Mekem Wanem Taem Yu Kasem Woning We i Kamaot Long God?

Longtaem finis, Baebol i talem klia ol saen blong makem ol las dei. Baebol i talem long yumi blong tingbaot “taem blong Noa.” ‘Long taem ya we wota i no ron bigwan yet,’ ol man oli bisi long ol samting we oli stap mekem evri dei long laef blong olgeta. Ating oli wari tu long ol raf fasin we oli fulap raonabaot long olgeta. Be taem Noa i talemaot woning we God i givim, “oli no wantem lesin, ale bigfala wota i ron i tekemaot olgeta.” (Matiu 24:37-39, NW) ?Sipos yu yu stap long taem ya, bambae yu obei long woning ya? ?Yu yu stap obei long woning naoia?

Tingbaot taon ya Sodom klosap long Ded Si, we Lot, nefiu blong Ebraham i bin stap long hem. ?Olsem wanem sipos yu yu bin laef long taon ya? Ples ya i olsem paradaes nomo. Taon ya i rij. Laef blong ol man i isi mo i no gat plante trabol long hem. Long taem blong Lot, “ol man oli stap kakae, mo oli stap dring, mo oli stap pem ol samting, mo oli stap salem ol samting, mo oli stap wokem garen, mo oli stap wokem haos.” Mo tu, ples i fulap long ol rabis fasin long saed blong seks. ?Sipos yu yu stap long taem ya, bambae yu tinghevi long woning we Lot i givim agensem ol rabis fasin ya? ?Bambae yu lesin taem hem i talem long yu se God bambae i spolem Sodom? ?No bambae yu olsem tufala man we tufala i blokem finis tufala gel blong Lot, we tufala i ting se Lot i stap mekem trik nomo long tufala? ?Bambae yu olsem woman blong Lot, we i stat blong ronwe be afta hem i tanemraon? Nating se plante man oli no bilivim woning ya, be long dei ya we Lot i aot long Sodom, “faea mo salfa i kamaot long skae, i foldaon long ol man ya, i bonem olgeta evriwan i lus.”—Luk 17:28, 29.

Bighaf blong ol man tede oli no wantem lesin. !Be God i mekem se oli raetemdaon ol stori ya long Tok blong Hem blong givim woning long yumi, mo blong pulum yumi blong stap LUKAOT GUD!

[Bokis/Foto blong pija long pej 22]

?I Tru Se Wota i Bin Kavremap Wol Ya?

Plante man we oli no bilif long Baebol, oli talem se ‘no.’ Be Baebol i talem se ‘si, bigfala wota i bin kavremap wol.’

Jisas Kraes i tokbaot bigfala wota ya we i kavremap wol. Mo hem i luk samting ya, from we hem i stap laef long heven long taem ya.

[Bokis/Foto blong pija long pej 23]

?I Tru Se God i Bin Spolem Sodom Mo Gomora?

Ol man we oli digim graon blong faenem ol samting blong bifo oli pruvum se samting ya i hapen.

Ol buk blong histri tu oli tokbaot.

Jisas Kraes i talem se God i spolem tufala taon ya, mo 14 buk blong Baebol oli tokbaot samting we i hapen long taem ya.