?Yu Yu Stap Folem Wanem Rod Long Laef Blong Yu?
• Plante man oli bisi tumas long ol samting we oli stap mekem evri dei, ale, oli no tingting plante long wanem rod we oli stap folem long laef blong olgeta.
• Baebol i givim save long yumi long saed blong ol nambawan samting we bambae oli kamaot long fiuja. Hem i givim woning tu long wan bigfala trabol we bambae i jenisim fasin blong laef blong ol man long evri ples blong wol. Sipos yumi no wantem lus long bigfala trabol ya, mo sipos yumi wantem we Baebol i givhan long yumi, yumi mas tekem aksen naoia.
• Samfala oli save wanem we Baebol i talem mo oli traem blong folem, be ol wari blong laef oli pulum tingting blong olgeta tumas.
• ?Olsem wanem? ?Yu yu glad long rod we yu stap folem long laef blong yu? ?Taem yu tingting blong mekem wan samting, yu tingbaot olsem wanem samting ya bambae i gat paoa long ol mak we yu yu wantem kasem long laef?
[Bokis/Foto blong pija long pej 9]
?Long Tingting Blong Yu, Wanem i Moa Impoten?
?Wanem ol samting long lis ya we oli moa impoten long yu? Raetem wan namba, stat long 1 go kasem 10, klosap long olgeta, blong soemaot ol samting we oli moa impoten.
Plante long olgeta oli gud nomo. ?Be sipos yu mas jusumaot wanem we i moa impoten, bambae yu jusum weswan fastaem? ?weswan namba tu? mo gohed olsem.
― Pleplei/spel
― Wok blong mi
― Helt blong mi
― Prapa glad blong mi
― Hasban no waef blong mi
― Papa mama blong mi
― Ol pikinini blong mi
― Naes haos mo gudfala klos
― Kam nambawan long ol samting we mi mekem
― Wosip blong God
[Bokis blong pija long pej 10, 11]
?Ol Jus We Yu Mekem Oli Stap Lidim Yu Long Rod We Yu Wantem Go Long Hem?
TINGBAOT OL KWESTIN YA
PLEPLEI/SPEL: ?Pleplei we mi jusum, i givim niufala paoa long mi? ?Hem i wan pleplei we i denja long helt blong mi, no i save givim kil long mi we i mekem se mi handikap long ful laef blong mi? ?Pleplei ya i mekem mi mi haremgud blong smoltaem nomo, be biaen tingting blong mi i trabol blong longtaem? Nating sipos pleplei we mi jusum i gud, ?be mi mi stap spenem tumas taem long pleplei ya, mekem se mi no moa gat taem blong mekem ol samting we oli moa impoten?
WOK BLONG MI: ?Mi mi wok nomo blong kasem ol samting we mi nidim, no mi mi yusum olgeta taem mo paoa blong mi long wok ya? ?Wok blong mi i givim tumas wari long mi we i save spolem helt blong mi? ?Mi mi laekem moa blong wok ovataem i bitim we mi spenem taem ya wetem famle blong mi? ?Sipos masta i talem long mi blong mekem samting we Kristin tingting blong mi bambae i trabol from, no i givim wan wok we i blokem mi plante long wok blong God, bambae mi mekem wok ya from we mi mi fraet se bambae hem i sakemaot mi?
HELT BLONG MI: ?Mi mi traehad oltaem blong lukaotgud long bodi blong mi, mo blong no mekem samting we i save spolem bodi? ?Ol storian blong mi oli long saed blong helt nomo? ?Fasin blong mi blong lukaot long helt blong mi i soemaot se mi no wantem givim wari mo trabol long famle blong mi?
PRAPA GLAD BLONG MI: ?Hemia i moa impoten i bitim ol narafala samting? ?Mi mi tingbaot blong mekem mi nomo mi glad i bitim we mi mekem famle blong mi i glad? ?Mi, we mi wan man blong trufala God, mi stap traem blong faenem glad long ol rod we oli no stret?
HASBAN NO WAEF BLONG MI: ?Mi mi wantem we woman blong mi (no, man blong mi) i prapa fren blong mi taem we mi mi nidim hem nomo? ?Mi mi soem ona mo respek long man blong mi (no, woman blong mi) olsem we hem i gat raet blong kasem? ?Bilif blong mi long God i gat paoa long fasin we mi mi mekem long woman blong mi (no, man blong mi)?
PAPA MAMA BLONG MI: ?From we mi mi yangfala we mi stap aninit long han blong papa mama blong mi yet, mi mi stap obei long tufala? ?Mi mi toktok long tufala wetem respek? ?Mi mekem ol wok we tufala i givim long mi? ?Mi kambak long haos long stret taem we tufala i talem, mo mi stap longwe long ol rabis fren mo rabis fasin we tufala i givim woning long mi from? ?Nating se mi bigman finis, mi mi stap lesin yet wetem respek long papa mama blong mi? ?Mi stap givhan long tufala taem tufala i nidim? ?Mi mi mekem i gud long tufala taem we i stret long tingting blong mi nomo, no mi folem ol advaes blong Baebol?
OL PIKININI BLONG MI: ?Mi mi harem se i prapa wok blong mi blong tijim ol pikinini blong mi long ol gudfala fasin, no mi ting se hemia wok blong ol tija long skul? ?Mi mi spenem taem wetem ol pikinini blong mi, no mi glad sipos oli pleplei, wajem televisin, mo pleplei ol kompiuta gem nomo? ?Mi mi stretem ol pikinini blong mi taem oli no lesin long ol woning blong God, no mi stretem olgeta taem oli mekem mi mi kros nomo?
NAES HAOS MO GUDFALA KLOS: ?Wanem tingting i pusum mi blong luk naes mo mekem haos i klin mo naes? ?Mi mi wantem pulum ae blong ol man raonabaot? ?Mi mi wantem mekem i gud long famle blong mi? ?Mi mekem olsem from we mi mi wan man blong wosipim God?
KAM NAMBAWAN LONG OL SAMTING WE MI MEKEM: ?Mi mi ting se i impoten blong mekemgud ol wok blong mi? ?Mi mi traehad blong kam nambawan long evri samting? ?Mi mi harem nogud sipos narafala i mekem samting long fasin we i moagud long mi?
WOSIP BLONG GOD: ?Long tingting blong mi, i moa impoten we hasban no waef blong mi, ol pikinini blong mi, papa mama blong mi, no masta blong mi, i glad long mi, no i moa impoten we God i glad long mi? ?Mi mi rere blong putum wok blong God i go long seken ples long laef blong mi, blong mi save gat wan laef we i moa isi?
TINGTING DIP LONG OL ADVAES BLONG BAEBOL
?Wosip blong God i stap long fasples long laef blong yu?
Prija 12:13: “Yu mas tinghevi long God, yu mas ona long hem, mo yu mas obei long ol tok blong hem, from we hemia nao samting we hem i mekem yumi from.”
TRAEM ANSA LONG OL KWESTIN YA: ?Long laef blong mi, mi mekem olsem vas ya i talem? ?Mi mi mekem wok blong mi long haos, long wok, mo long skul, long fasin we mi obei long ol loa blong God? ?Ol narafala samting we oli pulum intres blong mi mo ol wari blong laef, oli mekem se mi gat smoltaem nomo i stap blong mekem wosip long God?
?Yu yu frengud wetem God?
Ol Proveb 3:5, 6: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”
Matiu 4:10: “Yu mas mekem wosip long Hae God [“Jeova,” NW] we i God blong yu, mo bambae yu mas mekem wok blong hem nomo.”
TRAEM ANSA LONG OL KWESTIN YA: ?Mi mi gat sem tingting we ol vas ya oli talem long saed blong God? ?Ol wok blong mi evri dei mo fasin we mi mekem taem mi fesem trabol, oli soemaot se mi trastem mo lavem God?
?Fasin blong ridim mo stadi long Baebol i impoten long yu olsem wanem?
Jon 17:3: “Laef ya [laef we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”
TRAEM ANSA LONG OL KWESTIN YA: ?Mi mi soemaot se mi bilivim ol tok long vas ya? ?Mi mi ridim tok blong God mo tingting dip long hem oltaem, olsem we samting ya i impoten tumas long laef blong mi?
?Ol miting long Kristin kongregesen oli impoten long yu olsem wanem?
Hibrus 10:24, 25: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [“kongregesen,” NW], . . . from we yumi save se Dei ya we Masta blong yumi bambae i jajem olgeta man long hem, hem i kam klosap finis.”
Ol Sam 122:1: “Taem ol man oli talem long mi se, ‘Yumi go long haos blong Hae God,’ mi mi glad tumas.”
TRAEM ANSA LONG OL KWESTIN YA: ?Fasin blong laef blong mi i soemaot se mi mi gat tangkiu from advaes ya blong Baebol? ?Long manis we i pas, mi mi mestem sam Kristin miting from we mi putum narafala samting long ples blong olgeta?
?Yu yu wok strong blong talemaot God mo plan blong hem long ol narafala?
Matiu 24:14 (NW): “Gud nius ya blong Kingdom, bambae ol man oli talemaot long olgeta ples long wol, blong oli witnes long hem . . . nao biaen bambae en i save kam.”
Matiu 28:19, 20: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.”
Ol Sam 96:2: “!Yumi sing long Hae God! !Yumi leftemap nem blong hem! Evri dei bambae yumi talemaot gud nius ya we hem i sevem yumi.”
TRAEM ANSA LONG OL KWESTIN YA: ?Mi mi tingbaot wok ya olsem wan samting we i impoten tumas? ?Mi mi joen plante long wok ya olsem we mi bilif se sot taem nomo i stap?