Bigfala Wota i Ron —?Hu i Lesin? ?Hu i No Lesin?

Bighaf blong ol man long taem blong Noa oli mekem samting we i nogud.Jenesis 6:5

Adam mo Iv tufala i gat pikinini, nao oli kam plante long wol. Biaen, sam enjel oli joen wetem Setan mo oli agens long God.

Oli kam long wol mo oli jenisim bodi blong olgeta oli kam man, blong oli save mared long ol woman. Ol woman ya oli bonem ol pikinini boe we oli kam ol bigbigfala man we oli dabolbun. Ol pikinini ya oli wael olgeta mo oli ol strong man.

Ale, wol i kam fulap long ol man we oli mekem ol nogud fasin. Baebol i talem se: “Olgeta man long wol oli stap mekem i nogud tumas, mo oltaem, tingting blong olgeta i fulap nomo long ol rabis fasin.”

Noa i lesin long God mo i wokem wan bigfala sip. Jenesis 6:13, 14, 18, 19, 22

Noa i wan gudfala man. Jehova i talem long Noa se bambae Hem i mekem bigfala wota i ron blong spolem ol rabis man.

Mo God i talem long Noa blong wokem wan bigfala sip. Biaen hem wetem famle blong hem mo ol naranarafala anamol, oli mas go insaed long bigfala sip ya.

Noa i givim woning long ol man se bigfala wota bambae i ron, be oli no lesin long hem. Samfala oli jikim Noa, mo sam narafala oli no laekem hem nating.

Taem oli wokem bigfala sip ya finis, Noa i tekem ol anamol oli go insaed long hem.