Long skul blong ol Witnes blong Jehova, i no gat ol pasta mo pris we oli kasem pei. Be i gat ol man we oli mekem wok blong elda, olsem long taem blong ol Kristin bifo. Olgeta oli mas gat ol fasin we Baebol i talem se oli stret long ol elda. Olsem nao, oli save mekem wok ya blong ‘lukaot long ol man blong God, olsem we man blong lukaot long sipsip i lukaot long ol sipsip blong hem.’ (Ol Wok 20:28) Ol elda ya oli fren gud wetem Jehova, taswe oli naf blong lukaot long ol man blong God mo lidim olgeta. Oli no “kasem pei” from wok ya, be oli mekem from we ‘tingting blong olgeta i glad blong mekem.’ (1 Pita 5:1-3) ?Oli mekem wanem wok blong givhan long yumi?

Oli lukaot long yumi mo oli protektem yumi. Ol elda oli lidim mo protektem kongregesen, blong i no gat wan samting i spolem. Oli save se God nao i givim bigfala wok ya long olgeta. Taswe oli no mekem bigfala masta long ol man blong God, be oli givhan long olgeta blong oli harem gud mo oli glad. (2 Korin 1:24) Olsem man we i lukaot gud long evri sipsip blong hem, ol elda oli traem save gud evri brata mo sista.—Ol Proveb 27:23.

Oli tijim yumi blong mekem samting we God i wantem. Taem ol elda oli lidim ol miting evri wik, oli givim ol tok we oli mekem bilif blong yumi i strong moa. (Ol Wok 15:32) Oli lidim ol narafala long wok blong prij tu. Oli prij wetem olgeta, mo oli trenem olgeta long ol defren fasin blong prij.

Oli leftemap tingting blong evriwan. Ol elda oli wantem givhan long evri brata mo sista blong oli fren gud wetem Jehova. Taswe maet oli kam long haos blong wan brata blong storian. Oli talem ol gudfala tok blong Baebol blong leftemap tingting blong hem, mo blong givhan long hem. Sipos oli no kam long haos, maet oli storian wetem hem long miting.—Jemes 5:14, 15.

Ol elda oli wok had. Oli lukaot long ol man blong God, mo oli wok tu blong winim mane, mo oli lukaot gud long famle blong olgeta. Ol wok ya i tekem plante taem mo paoa blong olgeta. Taswe, i stret nomo we yumi ona long olgeta.—1 Tesalonaeka 5:12, 13.

• ?Ol elda oli mekem wanem wok?

• ?Oli mekem wanem blong leftemap tingting blong evri brata mo sista?

Baebol i tokbaot tu grup blong ol Kristin man we oli lukaot long ol wok long kongregesen, hemia ol elda mo ol man blong givhan. (Filipae 1:1, lukluk Diksonari long Baebol long Bislama.) Long evri kongregesen, i gat sam elda mo sam man blong givhan. ?Ol man blong givhan oli mekem wanem wok?

Oli givhan long ol elda. I gat sam man blong givhan we oli yangfala, mo i gat sam we oli olfala. Be olgeta evriwan oli fren gud wetem Jehova, mo oli traehad blong mekem gud wok blong olgeta. Yumi save trastem olgeta. Plante taem wok blong olgeta, hemia ol smosmol wok we oli mas mekem bakegen mo bakegen, mo ol wok we oli mekem wetem han blong olgeta. Ol wok ya i impoten. Taem oli lukaot gud long ol wok ya, ol elda oli gat moa taem blong tijim ol man blong God mo blong leftemap tingting blong olgeta.

Oli mekem ol defren kaen wok. Sam man blong givhan oli soem ples blong sidaon long ol man we oli kam long miting. Sam narafala oli lukaot long ol maekrofon, mo ol buk, mo ol kaon, mo oli talem wanem ples we ol brata mo sista oli mas go prij long hem. Oli fiksimap ol samting long Haos Kingdom we i brok. Maet ol elda oli askem long olgeta blong oli givhan long sam olfala. Taem ol man blong givhan oli glad blong mekem enikaen wok, evriwan long kongregesen oli gat bigfala respek long olgeta.—1 Timoti 3:13.

Oli soemaot gudfala eksampol. Ol man blong givhan oli mas gat ol gudfala fasin we Baebol i talem. Ol tok blong olgeta long miting oli mekem bilif blong yumi i strong. Taem oli lidim yumi long wok blong prij, yumi wantem wok strong moa. Oli wok gud wetem ol elda, mo samting ya i givhan blong mekem kongregesen i glad mo i joen gud. (Efesas 4:16) Sloslo, olgeta tu oli save kam naf blong mekem wok blong elda.

• ?Ol man blong givhan oli wanem kaen man?

• ?Oli mekem wanem wok?

Plante taem, Baebol i tokbaot tufala man ya Banabas mo aposol Pol, we tufala i goraon blong visitim ol kongregesen. ?From wanem tufala i mekem wok ya? Tufala i tingbaot ol Kristin brata mo sista, mo tufala i wantem givhan long olgeta. Pol i talem se hem i wantem ‘gobak blong luk ol brata,’ mo faenemaot sipos oli stap gohed gud. Hem i wokbaot plante handred kilometa blong i go leftemap tingting blong olgeta. (Ol Wok 15:36) Long taem blong yumi, ol eria elda oli folem sem fasin.

Oli leftemap tingting blong yumi. Maet eria elda i visitim samwe long 20 kongregesen. Hem i stap wan wik long evri kongregesen, mo i mekem samting ya tu taem long wan yia. Plante long ol brata ya wetem woman blong olgeta oli stap long trutok longtaem finis. Taswe oli save givim ol gudfala advaes long yumi. Oli traehad blong save gud ol yangfala mo ol olfala tu. Oli glad blong folem ol narafala long wok blong prij mo long ol Baebol stadi blong olgeta. Ol brata ya oli joen wetem ol elda blong oli go leftemap tingting blong ol brata mo sista. Taem oli givim ol gudfala tok long ol miting mo ol asembli, oli mekem bilif blong yumi i strong moa.—Ol Wok 15:35.

Oli wantem givhan long evriwan. Ol eria elda oli wantem givhan long ol brata mo sista blong oli gohed gud long wok blong Jehova. Oli miting wetem ol elda mo ol man blong givhan blong tokbaot ol samting long kongregesen. Mo oli givim ol gudfala advaes long ol brata ya blong halpem olgeta long wok we oli mekem. Oli givhan long ol paenia blong oli kam gud moa long wok blong prij. Oli glad tu blong save ol niuwan mo blong harem nius blong olgeta we oli stap gohed gud. Ol eria elda oli glad nomo blong mekem ‘ol wok ya blong givhan long yumi.’ (2 Korin 8:23) I gud yumi folem fasin blong bilif blong olgeta, mo yumi ona gud long God olsem olgeta.—Hibrus 13:7.

• ?From wanem ol eria elda oli visitim ol kongregesen?

• ?Oli save givhan long yu olsem wanem?

Taem disasta i kasem wan ples, wantaem nomo ol Witnes blong Jehova oli mekem plan blong givhan long ol brata we oli trabol. Samting we oli mekem long taem olsem i soemaot se oli no stap giaman, taem oli talem se oli lavlavem olgeta. (Jon 13:34, 35; 1 Jon 3:17, 18) ?Yumi save givhan olsem wanem?

Yumi givim presen mane. Long taem bifo, i gat hadtaem blong kasem kakae long Judia. Ale ol Kristin long Antiok oli sanem mane blong givhan long ol Kristin brata mo sista blong olgeta. (Ol Wok 11:27-30) Long taem blong yumi tu, ol brata long sam ples long wol oli kasem hadtaem. Ale yumi saksakem presen mane, nao kongregesen i sanem i go blong givhan long olgeta we oli sot long plante samting.—2 Korin 8:13-15.

Yumi mekem samting blong givhan. Long ples we disasta i spolem, ol elda oli meksua se olgeta evriwan long kongregesen oli sef. Maet oli putumap wan komiti blong ol brata we i meksua se ol brata mo sista oli gat kakae, klin wota, ol klos, ples blong slip, mo meresin. Plante Witnes blong ol narafala ples oli pem prapa rod blong olgeta blong go fiksimap ol haos mo ol Haos Kingdom. Oli kwik nomo blong hivimap ol samting we olgeta long ples blong disasta oli nidim. Hemia from we oli joen gud olsem wan famle long fulwol, mo oli lanem finis blong wok gud wanples. Oli givhan long ‘olgeta ya we oli brata mo sista blong olgeta,’ mo sipos oli naf, oli givhan tu long ol narafala, nomata se oli blong defren skul.—Galesia 6:10.

Yumi serem ol tok blong Baebol we i leftemap tingting. Taem disasta i kasem wan ples, tingting blong ol man i foldaon. Oli nidim ol gudfala tok blong leftemap tingting. Long taem olsem, Jehova “we i stamba blong fasin blong givhan,” i save mekem yumi harem gud bakegen. (2 Korin 1:3, 4) Yumi glad blong tokbaot ol promes blong Baebol wetem olgeta we oli harem nogud. Nao oli save tingbaot se i no longtaem, Kingdom blong God bambae i finisim olgeta trabol we i mekem man i safa. —Revelesen 21:4.

• ?Wanem i mekem se ol Witnes oli kwik blong givhan long taem blong disasta?

• ?Yumi save mekem wanem blong leftemap tingting blong ol man long ples we disasta i spolem?

Smoltaem bifo we Jisas i ded, hem i storian wetem fo disaepol blong hem, Pita, Jemes, Jon, mo Andru. Jisas i stap tokbaot saen we bambae i soemaot long ol las dei se hem i stap. Nao hem i askem wan impoten kwestin, i se: “?Hu ya gudfala slef we i waes, we masta blong hem i putumap hem blong i lukaot long ol narafala man blong hem, blong i givim kakae long olgeta long stret taem blong hem?” (Matiu 24:3, 45, NW; Mak 13:3, 4) Jisas i no stap tokbaot prapa kakae. Hem i minim save blong God. Jisas we i “masta,” i stap mekem tingting blong ol disaepol blong hem i strong. Hem i stap talem se long taem blong en, bambae hem i putumap sam man, blong oli givim save blong God long ol man blong hem. ?Hu ya slef ya?

Wan smol grup blong ol man blong Jisas we tabu spirit i makemaot olgeta. “Slef ya,” hemia Hed Kampani blong ol Witnes blong Jehova. Hem i givimaot save blong Jehova, olsem kakae, long ol man blong Jehova. Yumi dipen long slef we i gudfala, blong i givim ‘kakae long yumi long stret taem blong hem.’—Luk 12:42.

Hem i lukaot long ol man blong God. (1 Timoti 3:15) Jisas i givim bigfala wok long slef ya, blong i lukaot long wok blong ol man blong Jehova long wol. Slef ya i lukaot long ol samting we ogenaesesen blong Jehova i gat, i lidim wok blong prij, mo i yusum ol kongregesen blong tijim yumi. “Gudfala slef we i waes” i wokem ol buk we yumi givimaot long wok blong prij, mo i mekem program blong ol miting mo asembli tu. Long rod ya, hem i givim kakae we yumi nidim long stret taem blong hem.

Slef ya i gudfala, from we i holemstrong long ol tok blong Baebol mo long wok blong talemaot gud nius. Mo taem hem i lukaot long samting blong Kraes long wol, hem i mekem long fasin we i waes. (Ol Wok 10:42) Jehova i stap blesem wok blong slef ya mo i stap mekem ol man blong hem oli kam plante moa. Hem i stap givim plante save tu blong mekem ol man blong hem oli strong.—Aesea 60:22; 65:13.

• ?Jisas i putumap hu blong i givim save we i olsem kakae, long ol disaepol blong hem?

• ?Wanem i soemaot se gudfala slef ya i waes?

Long taem bifo, wan smol grup blong “ol aposol mo ol elda” oli wok olsem hed kampani. Oli mekem ol bigfala desisen long nem blong ful kongregesen blong ol Kristin we tabu spirit i makemaot olgeta. (Ol Wok 15:2) Taem oli mekem ol desisen, oli tokbaot ol vas blong Baebol mo oli letem tabu spirit i lidim olgeta. (Ol Wok 15:25) Long taem blong yumi, Hed Kampani i folem sem fasin ya.

Hem i mekem samting we God i wantem. Ol tabu brata long Hed Kampani oli stadi gud long Tok blong God. Plante yia finis, oli mekem ol desisen long fasin blong yumi blong wok, mo oli ansarem ol kwestin blong ol man blong God. Oli miting evri wik blong tokbaot ol samting we ol brata long olgeta ples blong wol oli nidim. Olsem long taem bifo, Hed Kampani i raetem leta, mo i yusum ol eria elda wetem sam narafala brata, blong oli talemaot ol tok mo advaes we i kamaot long Baebol. Hemia i mekem se ol man blong God oli gat wan tingting nomo mo oli joen gud blong wok. (Ol Wok 16:4, 5) Hed Kampani i lukaot long wok blong mekemrere ol save we i olsem kakae blong yumi. Hem i pulum yumi evriwan blong tinghevi long wok blong talemaot Kingdom. Mo hem i lukaot long wok ya blong putumap ol brata blong mekem wok insaed long ogenaesesen.

Hem i folem rod we tabu spirit i soemaot. Hed Kampani i lukluk i go long Jehova, we i King blong heven mo wol, mo long Jisas we i Hed blong kongregesen, blong tufala i lidim hem. (1 Korin 11:3; Efesas 5:23) Ol brata long grup ya oli no ting se oli lida blong ol man blong God. Olgeta ya wetem ol narafala Kristin we tabu spirit i makemaot olgeta, “oli stap biaen long Smol Sipsip ya long evri ples we hem i pas long hem.” (Revelesen 14:4) Hed Kampani i glad taem yumi prea from hem.

• ?Long taem bifo, hu ya hed kampani?

• ?Long taem blong yumi, Hed Kampani i mekem wanem blong faenemaot samting we God i wantem?

Betel i wan tok long lanwis Hibru, we i min se “Haos blong God.” (Jenesis 28:17, 19) Nem ya i stret nomo long ol haos we ol Witnes oli yusum long olgeta ples blong wol olsem ol branj ofis blong olgeta. Long ol haos ya, oli mekem evri samting blong lidim wok blong prij long ol kantri, mo blong mekem wok ya i gohed gud. Hed Kampani i stap long hedkwota long New York, Amerika, mo i lukaot long wok blong ol branj ofis long plante kantri. Olgeta we oli wok long haos Betel, oli olsem wan famle, from we oli stap wanples, oli wok mo kakae wanples, mo oli joen wanples blong stadi Baebol.—Ol Sam 133:1.

Spesel ples we wan bigfala famle i wok had blong givhan long ol narafala. Long olgeta Betel, i gat ol Kristin man mo woman we oli yusum laef blong olgeta evri dei blong mekem samting we God i wantem, mo blong givhan long wok blong Kingdom. (Matiu 6:33) Oli no kasem pei, be oli gat wan ples blong slip, mo oli kasem kakae wetem smol mane blong pem ol smosmol samting we oli nidim. Evriwan long Betel oli gat wan wok blong mekem, maet long ofis, no kijin, no long ples blong kakae. Sam long olgeta oli wok long ol masin blong printim buk mo putum kava long ol buk. Samfala oli klinim haos, sam oli wasem klos, sam oli fiksimap ol samting we i brok, mo ol narafala wok olsem.

Wan ples we evriwan oli wok strong blong givhan long wok blong prij. Bigfala tingting blong olgeta long Betel i blong mekem trutok blong Baebol i goaot long plante moa man. Buk ya we yu stap ridim i soemaot samting ya. Hed Kampani i lukaot long wok blong raetem ol save ya. Nao oli yusum kompiuta blong sanem i go long plante handred ples long wol. Long ol ples ya i gat ol tim we oli tanem tok ya i go long lanwis blong olgeta. Biaen, oli sanem i go long wan long ol Betel we oli stap printim ol buk long ol masin we oli spid. Taem oli printim ol buk ya finis, oli sanem olgeta i go long bitim 110,000 kongregesen. Olgeta wok we oli mekem long Betel i givhan long wok ya we i impoten moa, hemia wok blong talemaot gud nius.—Mak 13:10.

• ?Hu olgeta we oli wok blong Betel? ?Oli kasem pei from wok ya?

• ?Ol wok long Betel i givhan long wanem wok we i impoten moa?

Olgeta long Betel oli mekem ol defdefren wok blong givhan long wok blong prij long wan kantri no long plante kantri. Samfala oli tanem tok i go long narafala lanwis. Sam narafala oli mekem wok blong printim ol buk mo putum kava long olgeta, sam oli putum gud ol katon blong buk long ol dok, samfala oli mekem ol DVD, mo ol narafala wok olsem.

Branj Komiti i lukaot long wok long kantri. Hed Kampani i putum wok blong lukaot long branj ofis blong kantri i go long han blong wan komiti. I gat tri no bitim tri elda we oli stap long komiti ya. Komiti i stap sanem ripot long Hed Kampani blong tokbaot wok we i stap gohed long kantri blong olgeta, mo i talem ol problem we oli kamaot. Ol ripot ya oli givhan long Hed Kampani blong i save wanem samting i mas tokbaot long ol buk, mo ol miting, mo ol asembli we bambae oli kam. Oltaem Hed Kampani i sanem sam brata oli go long ol kantri, blong givhan long Branj Komiti blong i mekem gud wok blong hem. (Ol Proveb 11:14) Long taem ya, i gat wan spesel miting blong olgeta we oli stap long kantri ya, mo brata we i kam long hedkwota i givim wan tok we i leftemap tingting.

Oli givhan long ol kongregesen. Ol brata long branj ofis oli agri long ol niufala kongregesen we oli stat. Oli lukaot long wok blong ol paenia, mo ol misinari, mo ol eria elda. Oli mekem plan blong ol asembli, mo oli lukaot long ol wok we i gohed blong bildim ol niufala Haos Kingdom. Oli meksua se ol buk oli goaot long ol kongregesen, stret olsem oli nidim. Olgeta wok long branj ofis i givhan long wok blong prij, mo i mekem se wok ya i no olbaot.—1 Korin 14:33, 40.

• ?Branj Komiti i mekem wanem blong givhan long Hed Kampani?

• ?Oli mekem wanem wok long branj ofis?

Ol Witnes oli wantem talemaot “gud nius” long ‘olgeta man long wol, long evri kala, mo kantri, mo laen, mo lanwis.’ Taswe oli wokem ol buk long bitim 750 lanwis. (Revelesen 14:6) ?OIsem wanem oli wokem ol buk ya? I gat samfala long ol defren ples long wol we oli raetem ol stori, mo plante brata mo sista we oli stap tanem ol tok ya i go long ol lanwis blong olgeta. Olgeta evriwan oli Witnes blong Jehova.

Oli raetem long Inglis fastaem. Hed Kampani i lukaot long Ofis Blong Raetem Ol Buk we i stap long hedkwota long Amerika. Ofis ya i givim wok long samfala blong oli raetem ol defdefren stori. Sam long olgeta oli stap long hedkwota nomo, mo sam oli stap long ol narafala branj ofis long wol. I gud tumas se olgeta we oli raetem ol stori oli stap long ol defdefren ples long wol. Hemia i mekem se, ol buk blong yumi oli tokbaot samting we i pulum tingting blong ol man long olgeta ples long wol.

Oli tanem i go long ol narafala lanwis. Taem oli raetem ol stori finis long Inglis, oli jekem olgeta mo oli agri long olgeta, nao oli yusum kompiuta blong sanem olgeta oli go long ol defren ples long wol. Long ol ples ya, i gat ol tim we oli tanem ol stori ya i go long lanwis blong olgeta. Biaen oli jekem gud, mo oli ridim bakegen mo bakegen blong meksua se i stret. Ol tim ya oli traehad blong “faenem ol toktok” we i givim stret mining blong stori ya.—Prija 12:10.

Oli yusum kompiuta blong mekem wok i hareap. Kompiuta i no save tekem ples blong ol man blong raetem ol stori mo blong tanem olgeta i go long narafala lanwis. Be kompiuta i givhan bigwan blong mekem wok ya i hareap. Oli putum ol diksonari long kompiuta, mo oli putum ol narafala samting tu we man blong tanem ol tok i nidim blong lukaot moa save. Ol Witnes blong Jehova oli wokem wan spesel program blong kompiuta we oli kolem MEPS (Multilanguage Electronic Publishing System). Fastaem ol transleta oli tanem ol tok i go long plante handred lanwis. Biaen, samfala oli yusum MEPS blong putum gud ol tok ya wetem ol pija oli go long stret ples blong olgeta. Long fasin ya, oli mekemrere ol buk blong printim olgeta.

I gat sam lanwis we sam taosen man nomo oli toktok long hem. Be ol Witnes oli mekem bigfala wok blong tanem ol tok i go long ol lanwis ya tu. ?From wanem oli wok had olsem? From we Jehova i ‘wantem sevem olgeta man, mo i wantem we olgeta man oli save trutok blong hem.’—1 Timoti 2:3, 4.

• ?Olsem wanem ol Witnes oli raetem ol buk?

• ?From wanem oli tanem ol buk i go long plante lanwis?

Evri yia, ol Witnes blong Jehova oli printim mo givimaot plante milian Baebol mo buk we ol man oli no pem. Oli bildim mo fiksimap ol Haos Kingdom blong olgeta mo ol branj ofis. Oli givim ol samting we ol misinari mo plante taosen brata mo sista long Betel oli nidim blong laef. Mo oli givhan long olgeta we oli stap long ples blong disasta. Maet yu askem se: ‘?Oli kasem mane olsem wanem blong mekem ol wok ya?’

Oli no givim taet, ol man oli no pem olgeta, mo oli no sakem kleksin. I tru, oli nidim plante mane blong mekem wok ya blong prij long fulwol. Nating se i olsem, oli no askem long ol man blong oli givim mane. Bitim wan handred yia bifo, Wajtaoa i talem se: ‘Bambae yumi neva fosem ol man no pulum olgeta blong oli givim mane long yumi.’ Mo kam kasem naoia, ol Witnes oli stap folem rul ya. Oli trastem Jehova se bambae hem i givim ol samting we oli nidim blong mekem wok blong hem.—Matiu 10:8.

Wok blong olgeta i stanap long presen mane nomo. Plante man oli givim presen mane from we oli laekem wok we ol Witnes oli mekem blong tijim ol man long Baebol. Ol Witnes tu oli glad blong givim taem, paoa, mane, mo ol narafala samting blong olgeta, blong mekem wok blong God. (1 Kronikel 29:9) I gat bokis blong presen mane long ol Haos Kingdom mo haos asembli. Sipos wan man i wantem givim presen mane, hem i save putum long bokis ya, no hem i save givim tru long Websaet ya jw.org. Bighaf blong ol presen mane i kam long olgeta we oli no rijman. Oli olsem wido ya long taem blong Jisas. From we hem i pua, hem i putum tu smol mane nomo long bokis long haos prea, be Jisas i talem se hem i mekem wan gudfala samting. (Luk 21:1-4) Taswe yumi evriwan i save “putumgud sam mane” blong givim olsem presen. Yumi mas givim samting ‘olsem yumi wanwan i jusumaot.’ —1 Korin 16:2; 2 Korin 9:7.

Ol Witnes oli bilif strong se Jehova bambae i gohed blong pulum ol man we oli wantem “ona long hem,” blong oli givim ol “nambawan samting” blong olgeta blong givhan long wok blong talemaot Kingdom. Olsem nao, samting we hem i wantem bambae i kamtru.—Ol Proveb 3:9.

• ?Wanem i mekem se ol Witnes blong Jehova oli defren long ol narafala skul?

• ?Oli yusum ol presen mane blong mekem wanem?

Long Haos Kingdom, bigfala tijing blong Baebol we ol Witnes oli tokbaot, hemia Kingdom blong God. Taem Jisas i stap long wol, hem tu i talemaot Kingdom ya.—Luk 8:1.

Ples we evriwan oli kam long hem blong mekem tru wosip. Oli yusum Haos Kingdom blong mekem ol plan blong wok blong prij. (Matiu 24:14) Sam Haos Kingdom oli bigwan, sam oli smol, be olgeta evriwan oli no flas bitim mak. Long plante ples, i gat moa long wan kongregesen we i yusum Haos Kingdom. Long ol yia we oli jes pas, oli wokem plante taosen Haos Kingdom (faef long wan dei). Hemia from we i gat fulap man oli stap joen long ol kongregesen. ?Olsem wanem oli save wokem plante Haos Kingdom olsem?—Matiu 19:26.

Oli yusum presen mane nomo. Oli sanem presen mane ya i go long branj ofis, nao branj ofis i sanem i go long ol kongregesen we oli mas bildim wan Haos Kingdom, no oli mas wokem gud bakegen Haos Kingdom blong olgeta.

Olgeta we oli mekem wok ya oli no kasem pei. Long plante kantri, i gat Ol Grup Blong Bildim Ol Haos Kingdom. Ol tim blong bildim haos wetem ol volontia, oli goraon long ol defren kongregesen long wan kantri, nating se long taon no long bus, blong givhan blong bildim Haos Kingdom blong olgeta. Long sam narafala kantri, sam Witnes oli lukaot long wok blong bildim mo wokem gud bakegen ol Haos Kingdom long ol defren eria. Samfala long ol eria ya we oli trengud from wan wok, oli volontia blong givhan, be bighaf blong ol volontia, hemia ol brata mo sista long lokol kongregesen. I gat tu samting we i mekem se wok ya i save gohed olsem: tabu spirit blong Jehova, mo ol man blong hem we oli wok wetem ful paoa blong olgeta.—Ol Sam 127:1; Kolosi 3:23.

• ?Ol Witnes oli yusum Haos Kingdom blong mekem wanem?

• ?Olsem wanem oli save wokem plante haos wosip long olgeta ples long wol?

Evri Haos Kingdom blong ol Witnes blong Jehova i karem tabu nem blong God. Taswe, taem yumi joen long wok blong klinim, mo flasem, mo fiksimap Haos Kingdom, hemia wan blesing. Wok ya i wan impoten haf blong wosip blong yumi. Yumi evriwan i save joen long wok ya.

Klinim Haos Kingdom afta long miting. Taem miting i finis, ol brata mo sista oli brum mo stretem ol samting long Haos Kingdom. Wan taem long wan wik, oli klinim gud. Wan elda no wan man blong givhan i lukaot long wok ya. Hem i gat wan lis blong ol samting we yumi mas mekem, ale yumi folem lis ya. Ol man wanwan oli mekem ol defdefren wok, olsem brum, pasem mop, waepem ol jea mo tebol, putum gud ol jea, klinim toelet, waepem ol windo, karemaot doti, mo klinim yad. Wan dei long wan yia, yumi mekem bigfala wok blong klinim ples. I gud yumi pulum ol pikinini tu blong oli joen long wok ya. Olsem nao, yumi tijim olgeta blong oli respektem Haos Kingdom.—Prija 5:1.

Givhan blong fiksimap ol samting. Evri yia sam brata oli jekem gud evri samting insaed mo afsaed long Haos Kingdom. Taem oli mekem olsem, oli luksave wanem wok we oli mas mekem blong Haos Kingdom i stap gud. Sipos oli fiksimap bifo we i kam nogud tumas, oli no nid blong spenem bigfala mane taem i kam nogud olgeta. (2 Kronikel 24:13; 34:10) Yumi yusum Haos Kingdom blong wosipim God blong yumi. Taswe yumi mas klinim mo fiksimap haos ya oltaem. Taem yumi joen long wok ya, yumi soemaot se yumi lavem Jehova mo yumi respektem haos wosip blong yumi. (Ol Sam 122:1) Ol man long ples blong yumi bambae oli luk samting ya nao bambae oli respektem yumi. —2 Korin 6:3.

• ?From wanem yumi no mas letem Haos Kingdom i kam doti mo i brobrok?

• ?Yumi folem wanem plan blong mekem Haos Kingdom i stap klin?

?Yu yu wantem lukaot moa save long Baebol? ?Yu wantem save moa long wan vas, wan man, wan ples, no long wan narafala samting we Baebol i tokbaot? Maet yu wari long wan samting long laef blong yu mo yu ting se Baebol i save givhan long yu. Sipos i olsem, i gud yu go long laebri long Haos Kingdom.

Laebri i givhan blong faenem moa save. Ating yu yu no gat ol buk we ol Witnes blong Jehova oli bin wokem long lanwis blong yu. Be ating i gat bighaf blong ol buk ya long laebri long Haos Kingdom. Maet i gat ol defdefren Baebol, mo wan diksonari, mo sam narafala buk blong givim save long yu. Yu save ridim ol buk ya bifo we miting i stat mo afta we miting i finis. Sipos i gat wan kompiuta long laebri, ating Watchtower Library i stap long hem. Hemia wan program blong kompiuta we i gat plante buk blong yumi long hem. Yu taepem wan tok no wan vas we yu stap lukaotem, nao kompiuta bambae i soemaot ol buk we yu save faenem moa save long hem.

Laebri i givhan long ol studen long Kristin Wok Mo Laef miting. Yu save yusum laebri long Haos Kingdom blong mekemrere ol tok blong yu. Brata we i lukaot long Kristin Wok Mo Laef miting, hem i lukaot long laebri tu. Hem i mas meksua se ol niufala buk blong yumi oli stap long laebri, mo se ol samting i stap long stret ples blong olgeta. Hem mo tija blong yu i save givhan long yu blong faenem save we yu nidim. Be yumi no gat raet blong karem ol buk blong laebri i go long haos. Yumi mas lukaot gud long ol buk ya mo yumi no mekem olgeta oli doti.

Baebol i talem se sipos yumi wantem ‘savegud God,’ yumi mas traehad blong faenem save blong hem, olsem we yumi ‘traehad blong faenem silva we man i bin berem.’ (Ol Proveb 2:1-5) Laebri blong Haos Kingdom i blong givhan long yu blong yu faenem ol save ya.

• ?Wanem ol samting long laebri blong Haos Kingdom we yu save yusum blong lukaot moa save?

• ?Hu olgeta we oli save givhan long yu blong yusum gud laebri?

Jisas i talem long ol man blong hem se: ‘Yufala i mas letem laet i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala, we i stap long heven.’ (Matiu 5:16) Ol Witnes blong Jehova oli yusum ol niufala masin we man i wokem, wetem Intenet tu, blong mekem laet i saenaot. I gat plante save long ol bilif mo wok blong ol Witnes blong Jehova long Websaet ya jw.org. ?Wanem sam long ol save ya?

Ansa we Baebol i givim long plante kwestin. Yu save faenem ansa blong plante bigfala kwestin we ol man oli askem. Tufala traket ya ?Wan Dei Ol Man Bambae Oli No Moa Safa? mo ?Ol Dedman Bambae Oli Laef Bakegen? i stap long Websaet ya, long bitim 600 lanwis. Niu Wol Translesen Baebol tu i stap long bitim 130 lanwis. I gat ol narafala buk bakegen we oli eksplenem Baebol, olsem buk ya ?Wanem Samting We Baebol i Rili Tijim? mo ol niufala Wajtaoa mo Wekap! Yu save ridim ol buk ya no yu save lesin long riding blong olgeta long Websaet. Sipos no, yu save daonlodem MP3, PDF, no EPUB. Sipos yu gat wan stadi no visit we i toktok narafala lanwis, yu save printim sam save long lanwis blong hem. I gat ol video tu blong ol man we sora blong olgeta i fas. Oli mekem ol video ya long saen lanwis blong plante kantri. Yu save daonlodem ol Baebol riding we man i ridim wetem mining mo paoa, mo ol stori blong Baebol we ol man oli bin aktem long ol asembli, mo ol gudfala miusik we yu save lesin long hem.

Save we i tru long saed blong ol Witnes. Long Websaet ya, i gat nius mo video blong wok blong ol Witnes long fulwol, mo ol samting we i hapen long olgeta. Mo tu, hem i givim save long ol samting we oli mekem blong givhan long ol man long ples we i gat disasta mo ol narafala trabol. I gat nius blong ol asembli we bambae oli kamaot, mo i gat adres blong ol branj ofis.

Websaet ya i givhan long ol Witnes blong oli mekem laet blong trutok i saenaot i go long olgeta ples long wol. Ol man long evri kantri go kasem kantri ya Antaktik, oli save kasem ol gudfala samting we yumi putum long Websaet. Prea blong yumi se ‘bambae tok blong Jehova i goaot kwik’ long evri ples blong wol, blong bambae ol man oli save ona long hem.—2 Tesalonaeka 3:1.

• ?Wanem ol samting long jw.org we i stap givhan long plante man blong oli save trutok blong Baebol?

• ?Yu yu wantem lukluk wanem samting long Websaet ya?