Plante man oli no moa go long jos, from we oli no kasem ansa blong ol kwestin blong olgeta. I gud yu joen long ol miting blong ol Witnes blong Jehova. ?From wanem? ?Bambae yu kasem wanem long ol miting ya?

Yu glad blong stap wetem ol man we oli lavlavem olgeta. Long taem bifo, ol Kristin we oli stap long wan eria oli joen olsem wan kongregesen, mo oli kam wanples blong mekem ol miting. Long ol miting ya, oli mekem wosip long God, mo oli stadi long Baebol, mo oli lefleftemap tingting blong olgeta. (Hibrus 10:24, 25) Ol Kristin ya oli lavlavem olgeta, taswe taem oli joen wanples oli harem se oli stap wetem ol tru fren, hemia ol Kristin brata mo sista. (2 Tesalonaeka 1:3; 3 Jon 14) Long taem blong yumi, ol Witnes oli folem fasin ya blong ol Kristin bifo, nao oli kasem bigfala glad.

Yu lanem ol tok blong Baebol mo olsem wanem blong folem. Ol man, mo ol woman, mo ol pikinini tu oli joen long ol miting, olsem long taem bifo. Ol gudfala tija oli givhan long yumi blong lanem olsem wanem blong folem ol tok blong Baebol long laef blong yumi. (Dutronome 31:12; Nehemaea 8:8) Evriwan oli save givim ansa long ol kwestin mo singsing. Hemia janis blong yumi soemaot se tingting blong yumi i stap strong long God.—Hibrus 10:23.

Bilif blong yu i kam strong moa. Aposol Pol i talem long wan kongregesen se: “Mi mi wantem tumas blong kam luk yufala, . . . blong bambae bilif blong yufala i save givhan long mi, olsem we bilif blong mi tu i save givhan long yufala.” (Rom 1:11, 12) Taem yumi joen wetem ol narafala Kristin, bilif blong yumi i kam strong moa, mo tingting blong yumi i strong moa blong folem ol Kristin fasin long laef blong yumi.

Mifala i singaot yu blong yu kam long ol miting blong mifala. Bambae yu luk se yu kasem ol samting we yumi jes tokbaot. Mifala i glad tumas sipos yu kam. Yu no pem blong kam insaed, mo i no gat kleksin.

• ?Ol Kristin long taem bifo oli mekem wanem samting we ol Witnes oli mekem yet tede?

• ?Ol miting oli givhan long yumi olsem wanem?

Ol Witnes blong Jehova oli go long ol miting blong olgeta evri wik, nating sipos oli mas wokbaot long bus no i gat bigfala ren. Samfala we oli wok fuldei oli taed, mo oli kasem ol defdefren trabol long laef blong olgeta. Be oli traehad yet blong joen wanples wetem ol Kristin brata mo sista. ?From wanem?

Yumi harem gud blong joen wanples. Taem Pol i talem se, ‘yumi mas stap tingbaot yumi,’ hem i stap soemaot se yumi mas save gud yumi. (Hibrus 10:24) Taswe hem i pulum yumi blong yumi givgivhan long yumi. Taem yumi save gud ol famle long Haos Kingdom blong yumi, yumi faenemaot se sam long olgeta oli winim ol trabol we oli klosap sem mak long trabol blong yumi. Taswe, oli save givhan long yumi.

Yumi faenem ol gudfala fren. Olgeta we oli joen wanples long miting oli fren gud. Mo samtaem oli joen wanples blong spel mo pleplei. ?From wanem i gud oli mekem olsem? Taem oli luk ol gudfala fasin blong olgeta, oli lavlavem olgeta moa. Nao sipos wan long olgeta i kasem trabol, oli glad blong givhan long hem, from we hem i gudfala fren blong olgeta. (Ol Proveb 17:17) Taem yumi fren gud wetem evriwan long kongregesen, yumi soemaot se yumi wantem givhan long olgeta evriwan. —1 Korin 12:25, 26.

I gud yu jusum ol fren we oli stap mekem samting we God i wantem. Yu save faenem ol fren ya long kongregesen blong ol Witnes blong Jehova. Plis yu kam joen wetem mifala, yu no letem wan samting i blokem yu.

• ?From wanem yumi joen wanples long ol miting?

• ?Yu yu wantem save ol Witnes blong Jehova? ?Wetaem bambae yu kam long miting?

Long ol miting we ol Kristin oli mekem long taem bifo, oli singsing, oli prea, oli ridim Baebol, mo oli tokbaot ol save blong Baebol. I no gat ol kastom blong jos. (1 Korin 14:26) Long taem blong yumi, ol Witnes oli mekem sem mak.

Ol tijing oli kamaot long Baebol mo oli givhan long laef blong yumi. Long wiken, yumi evriwan i joen wanples blong lesin long wan tok we i stanap long Baebol. Tok ya i blong 30 minit, mo i soemaot olsem wanem Baebol i stret long laef blong yumi tede. Yumi evriwan i save ridim ol vas long Baebol blong yumi. Taem tok ya i finis, yumi mekem Stadi Blong “Wajtaoa” blong wan aoa. Evriwan oli save givim ansa long ol kwestin we oli stap long magasin ya. Stadi ya i givhan long yumi blong yumi folem ol tok blong Baebol long laef blong yumi. I gat bitim 110,000 kongregesen long wol, mo olgeta evriwan oli stadi long sem save nomo.

Yumi kamgud moa blong tijim narafala. Long medel blong wik, i gat wan miting bakegen we i gat tri haf blong hem, nem blong miting ya Kristin Wok Mo Laef. Ol save we yumi tokbaot long miting ya i stap long wan smol buk we i kamaot evri manis, Kristin Wok Mo Laef—Buk Blong Miting. Fashaf blong miting, Ol Gudgudfala Samting Long Baebol, i givim save long yumi long wan haf blong Baebol we evriwan long kongregesen oli ridim finis. Long nekis haf, Kamgud Moa Long Wok Blong Prij, i gat ol pleplei we oli soemaot olsem wanem blong storian wetem ol man long Baebol. Afta, wan brata i givim advaes we i save givhan long yumi, blong yumi kam gud moa long fasin blong rid mo toktok. (1 Timoti 4:13) Lashaf, Laef Blong Ol Kristin, i soemaot olsem wanem blong folem ol rul blong Baebol long laef blong yumi. Insaed long haf ya, i gat wan stadi wetem ol kwestin mo ansa, we i givim dip save long yumi long saed blong Baebol.

Taem yu yu kam long miting, bambae yu sapraes long nambawan tijing we yu kasem long Baebol.—Aesea 54:13.

• ?Bambae yu harem wanem long ol miting?

• ?Weswan long ol miting ya we yu yu wantem kam long hem?

Yu traem lukluk ol pija ya. Ating yu luk se ol Witnes blong Jehova oli jenis gud taem oli kam long miting blong olgeta. ?From wanem?

Yumi ona gud long God. I tru se God i lukluk hat blong man, hem i no lukluk bodi. (1 Samuel 16:7) Be taem yumi joen wanples blong mekem wosip, yumi wantem soemaot se yumi ona gud long God mo yumi gat respek long ol brata mo sista blong yumi. Sipos yu mas go luk presiden blong kantri no king long ofis blong hem, ating bambae yu jenis gud. Long sem fasin, yumi mas jenis gud taem yumi kam long miting, from we samting ya i soemaot se yumi ona gud long Jehova we hem i “King blong ol man long olgeta kantri.” Mo yumi soemaot tu se yumi gat respek long ples we yumi go long hem blong mekem wosip.—Jenesis 18:25.

Yumi stap folem ol rul blong Baebol. Baebol i talem se ol man we “oli stap talem se oli lavem God” oli mas putum klos “we i stret nomo, i no blong pulum ae blong man.” (1 Timoti 2:9, 10) “Klos we i stret” i minim klos we i gud nomo, i no flas tumas, i no pulum ae, i no soemaot bodi, mo i no olbaot. Taem yumi folem ol rul ya, yumi save jusum yet plante defren stael we oli gud. Klos blong yumi i save “leftemap tok blong God ya we i sevem yumi,” mo i save ‘leftemap nem blong hem’ tu. I no nid blong yumi talem wan samting. (Taetas 2:10; 1 Pita 2:12) Sipos yumi jenis gud blong go long miting, yumi mekem se ol narafala man oli gat gudfala tingting long wosip blong yumi.

Yu no mas ting se yu no save kam long ol miting from we klos blong yu i no naes. Yu save werem klos we i klin, mo i stret, mo i soemaot respek. I no nid blong werem klos we i sas mo i flas.

• ?From wanem i impoten blong jenis gud taem yumi mekem wosip long God?

• ?Wanem ol rul blong Baebol we yumi mas folem?

Sipos ol Witnes blong Jehova oli stadi Baebol wetem yu, ating yu stap traehad blong rerem stadi blong yu. I gud yu rerem ol miting tu. Be yu mas gat wan gudfala program.

Yu jusum wan stret taem mo ples blong stadi. ?Wetaem tingting blong yu i moa klia? Maet long eli moning bifo we yu statem wok blong yu. Maet long naet afta we ol pikinini oli slip. Nating se yu no save stadi longtaem, be yu mas makemaot wan stret taem blong stadi, mo yu no mas letem wan samting i blokem yu. I gud yu faenem wan ples we i kwaet, mo yu ofem radio, mo TV, mo mobaelfon. Bifo we yu stadi yu mas prea. Hemia i save mekem se yu no moa wari long ol samting we i kamaot long dei, be yu putum olgeta tingting blong yu i stap long Tok blong God.—Filipae 4:6, 7.

Yu makem ol ansa mo yu rere blong ansa. Fastaem, yu traem kasem bigfala tingting long samting we yu ridim. Yu lukluk nem blong japta no haf ya we yu stadi long hem, mo yu tingbaot olsem wanem ol bigfala poen oli joen wetem nem ya. Yu lukluk ol pija mo ol kwestin blong tingting bak we oli mekem ol bigfala poen oli kamaot klia. Nao yu ridim evri haf mo yu lukaot ansa blong kwestin blong ol haf ya. Yu ridim olgeta vas, mo yu tingbaot ol vas ya se oli joen olsem wanem wetem ol save we yu stap rerem. (Ol Wok 17:11) Taem yu faenem ansa, yu putum laen aninit long ol wod we oli save givim bigfala tingting long yu. Nao taem yu stap long miting, yu save leftemap han blong yu, mo yu givim wan sot ansa long prapa toktok blong yu.

I gud yu rerem ol save we bambae yumi tokbaot long miting evri wik. Sipos yu mekem olsem, bambae yu lanem plante niufala samting. Bambae yu yu olsem wan man we i stap hivimap plante gudgudfala samting long haos blong hem.—Matiu 13:51, 52.

• ?Wanem program we yu save folem blong rerem ol miting?

• ?Olsem wanem blong rerem wan ansa blong yu?

Stat long taem bifo, Jehova i wantem we olgeta long famle oli joen wanples blong mekem ol samting. Olsemia, oli fren gud wetem Hem, mo oli fren gud insaed long famle. (Dutronome 6:6, 7) From samting ya, ol Witnes blong Jehova oli makemaot wan stret taem evri wik blong mekem Famle Wosip. Oli tokbaot ol save blong God we oli nidim long laef blong olgeta, mo oli mekem long wan fasin we evriwan oli glad blong storian. Nating se yu stap yu wan, yu save yusum taem blong Famle Wosip blong stadi long wan samting long Baebol, we bambae i pulum yu yu kam klosap moa long God.

Wan taem blong fren moa wetem Jehova. “Yufala i mas stap klosap long God, nao hem bambae i kam stap klosap long yufala.” (Jemes 4:8) Taem yumi ridim Baebol yumi save Jehova moa, from we yumi ridim stori blong ol fasin mo ol wok blong hem. I gud ol famle oli ridim Baebol long bigfala voes blong statem Famle Wosip evri wik. Maet oli folem program blong ridim Baebol, long buk blong miting ya Kristin Wok Mo Laef. Evriwan long famle oli save ridim wan smol haf. Biaen, oli tokbaot samting we oli lanem.

Wan taem blong olgeta long famle oli fren gud. Taem famle i joen wanples blong stadi Baebol, man mo woman tufala i fren moa, mo papa mama i fren moa wetem ol pikinini tu. Famle Wosip i mas wan taem we i spesel long evriwan long famle, mo i mas wan taem blong glad mo pis. Taem papa mo mama i jusum ol samting blong tokbaot wetem pikinini, tufala i mas tingbaot se ol pikinini oli smol no oli bigwan. Maet tufala i jusum sam save long Wajtaoa no Wekap! no long Websaet blong yumi jw.org. Oli save tokbaot wan trabol we ol pikinini oli fesem long skul, mo rod blong winim trabol ya. Maet oli wajem wan program long JW Brodkasting (tv.jw.org.) mo tokbaot. Maet oli sing long ol singsing blong miting. Afta we oli mekem Famle Wosip, oli save dring ti mo kakae smol.

Taem ya we famle i joen wanples evri wik blong mekem wosip, hem i spesel, from we bambae i givhan long famle blong i laekem tumas Tok blong God. Sipos yufala i traehad, bambae Jehova i blesem yufala.—Ol Sam 1:1-3.

• ?From wanem yumi mas makemaot wan stret taem evri wik blong mekem Famle Wosip?

• ?Papa mo mama i save mekem wanem blong evriwan oli harem gud long Famle Wosip?

Ol man long ol pija ya oli glad tumas. ?Oli glad from wanem? From we oli stap long wan asembli blong ol Witnes blong Jehova. God i talem long ol man blong hem bifo se oli mas mekem asembli tri taem long wan yia. Olsem olgeta ya, yumi tu yumi glad blong joen wanples long ol bigfala grup. (Dutronome 16:16) Evri yia, yumi mekem tri asembli: tu eria asembli, we tufala wanwan i blong wan dei, mo wan asembli blong tri dei. ?Ol asembli ya oli givhan long yumi olsem wanem?

Oli givim janis long yumi blong fren gud wetem ol Kristin brata mo sista. Ol man Isrel bifo oli glad tumas blong presem Jehova ‘long fes blong olgeta man blong hem.’ Yumi tu yumi glad tumas blong mekem wosip long hem long ol asembli. (Ol Sam 26:12; 111:1) Long ol asembli ya, yumi gat janis blong joen wetem ol Witnes blong ol narafala ples. Yumi evriwan i karem smol kakae i kam, nao long medel dei, taem yumi kakae wanples yumi fren gud. (Ol Wok 2:42) Yumi luk wetem prapa ae blong yumi se ol brata mo sista ya oli lavlavem olgeta, mo from samting ya oli joen gud olsem wan famle nomo long fulwol.—1 Pita 2:17.

Oli givhan long yumi blong yumi gohed gud long wok blong God. Ol man Isrel oli “haremsave ol tok” blong Baebol we ol pris oli eksplenem, nao oli glad tumas. (Nehemaea 8:8, 12) Yumi tu yumi glad long ol save blong Baebol we yumi kasem long ol asembli. Oltaem ol tok blong asembli oli stanap long wan bigfala tingting long Baebol. Samtaem wan brata i mekem tok, no maet plante brata oli mekem defdefren haf blong wan tok. Samfala oli aktem sam samting we i bin hapen long wok blong prij no long laef blong olgeta. Taem yumi harem ol stori blong olgeta we oli winim plante trabol long laef blong olgeta, samting ya i leftemap tingting blong yumi. I gat wan haf blong asembli blong tri dei, we samfala oli aktem wan stori blong Baebol. Hemia i mekem se ol samting ya we i hapen long taem bifo i kam klia moa long tingting blong yumi, mo yumi lanem samting we yumi save folem long laef blong yumi. Long evri asembli, olgeta we oli givim laef blong olgeta long Jehova, oli baptaes.

• ?From wanem ol asembli oli mekem yumi glad?

• ?Ol asembli oli givhan long yumi olsem wanem?

Smoltaem bifo we Jisas i ded, hem i talem se: ‘Gud nius ya blong Kingdom, bambae oli mas talemaot long olgeta ples long wol, blong oli witnes long olgeta man long wol. Nao biaen, bambae en blong wol i save kam.’ (Matiu 24:14) ?Bambae oli mekem wok ya olsem wanem? Oli mas mekem olsem Jisas taem hem i stap long wol.—Luk 8:1.

Yumi prij long haos blong ol man. Jisas i trenem ol disaepol blong hem blong oli talemaot gud nius long ol man long haos blong olgeta. (Matiu 10:11-13; Ol Wok 5:42; 20:20) Ol disaepol ya oli no wok olbaot, oli prij long stret ples we oli mas prij long hem. (Matiu 10:5, 6) Sem mak long taem blong yumi, ol Witnes oli no wok olbaot. Ol kongregesen wanwan oli gat stret ples we oli mas prij long hem. Olsem nao, oli save finisim gud wok we Jisas i givim long ol disaepol, blong ‘talemaot gud nius long ol man.’—Ol Wok 10:42.

Yumi prij long evri ples we i gat man. Jisas i prij long ol man long ol ples klosap long solwota, mo long wel we ol man oli kam long hem blong pulum wota. (Mak 4:1; Jon 4:5-15) Ol Witnes tu oli tokbaot Baebol long ol man long rod, long stoa, long ofis, mo long ples blong spel, mo oli toktok long samfala long telefon. Taem oli gat janis, oli prij long ol man long ol haos klosap long olgeta, ol man long wok, ol yangfala long skul, mo ol famle. Bigfala wok ya we oli mekem i givhan long plante milian man long olgeta ples long wol, blong oli harem ‘gud nius ya we i save sevem olgeta.’—Ol Sam 96:2.

?Yu yu wantem talemaot gud nius long narafala, mo tokbaot ol blesing we bambae oli kamaot? ?Yu wantem talemaot long hu? !Ale, yu no mas wet!

• ?Wanem “gud nius” ya we ol man oli mas harem?

• ?Olsem wanem ol Witnes blong Jehova oli folem fasin blong Jisas blong prij?

Plante taem, tok ya “paenia” i minim man blong brekem bus, mo i openem rod blong ol narafala oli save go. Jisas i olsem wan paenia. Hem i kamdaon long wol ya blong prij mo blong openem rod blong ol man oli save kasem laef. (Matiu 20:28) Ol man blong Jisas long taem blong yumi oli mekem olsem hem. Oli spenem plante taem ‘blong pulum ol man oli kam man blong hem.’ (Matiu 28:19, 20) Sam long olgeta oli naf blong mekem wok blong paenia.

Paenia i prij klosap evri dei. Olgeta Witnes blong Jehova oli man blong talemaot gud nius. Sam long olgeta oli jenisim sam samting long laef blong olgeta blong oli save kam fultaem paenia. Olgeta ya oli katem taem we oli spenem blong wok from mane, nao oli prij 70 aoa evri manis. Sam narafala oli kam spesel paenia. Olgeta ya oli go long ol ples we oli nidim moa man blong talemaot gud nius. Oli spenem 130 aoa evri manis blong mekem wok ya. Ol paenia oli no gat plante sas samting, be oli glad nomo. Oli trastem Jehova se bambae hem i givim ol samting we oli nidim blong laef. (Matiu 6:31-33; 1 Timoti 6:6-8) Olgeta we oli no naf blong mekem wok blong fultaem paenia, oli save kam haftaem paenia. Hemia i min se oli prij 30 no 50 aoa long wan manis.

Paenia i mas lavem God mo ol man. Jisas i luksave se ol man oli nidim save blong God mo ol plan blong hem. Tede tu ol man oli nidim samting ya. (Mak 6:34) Yumi gat ol save ya blong givhan long olgeta. Olsem nao, oli save putum tingting blong olgeta i stap strong long God mo long ol promes blong hem. Ol paenia oli lavem ol man raonabaot long olgeta, taswe oli glad blong yusum taem mo paoa blong olgeta blong givhan long ol man ya blong oli save God. (Matiu 22:39; 1 Tesalonaeka 2:8) Taem ol paenia oli mekem wok ya, bilif blong olgeta i kam strong, mo oli kam klosap moa long Jehova, mo oli glad tumas.—Ol Wok 20:35.

• ?Wan paenia i mekem wanem?

• ?Wanem i pulum sam brata mo sista blong oli mekem wok blong paenia?

Longtaem finis i kam, ol Witnes blong Jehova oli mekem ol Baebol Skul. Olgeta we oli wok fultaem blong talemaot gud nius blong Kingdom, oli save go long ol skul ya. Ol skul ya oli givhan long olgeta blong oli “finisim olgeta wok ya we God i givim.”—2 Timoti 4:5.

Skul Blong Paenia. Wan brata no sista we i mekem wok blong fultaem paenia wan yia finis, i save go long skul ya we oli mekem long wan Haos Kingdom klosap long ples blong hem. Skul ya i blong 6 dei, mo i givhan long ol paenia blong oli kam klosap moa long Jehova, oli kam gud moa long wok blong prij, mo oli gohed strong long wok ya.

Skul Blong Ol Man Blong Talemaot Gud Nius. Skul ya we i blong tu manis, i trenem olgeta we oli paenia sam yia finis. Olgeta ya oli rere blong lego ples blong olgeta blong go long eniples we i nidim moa man blong prij. I olsem we oli talem se: “!Mi ya, mi save go! !Yu sanem mi!” Oli folem fasin blong Nambawan Man blong talemaot gud nius, Jisas Kraes. (Aesea 6:8; Jon 7:29) Afta long skul, maet oli sanem olgeta oli go long wan ples we i defren long ples blong olgeta. Fasin blong laef blong ol man i defren, weta i defren, mo maet kakae i defren. Maet oli mas lanem wan narafala lanwis tu. Skul ya i givhan long ol brata mo sista we oli no mared mo olgeta we oli mared, we oli gat 23 yia kasem 65 yia, blong oli wokem ol gudfala fasin we bambae oli nidim long ples we oli go long hem. Mo oli lanem plante samting we bambae i mekem se Jehova mo ogenaesesen blong hem oli save yusum olgeta moa.

Baebol Skul Blong Gilead. Long Hibru lanwis, tok ya “Gilead” i minim “Givim Bigfala Witnes.” Skul blong Gilead i stat long 1943, mo kam kasem naoia, bitim 8,000 brata mo sista oli tren long skul ya, blong oli go mekem wok blong misinari “long olgeta ples long wol.” Wok blong olgeta i karem gudfala frut. (Ol Wok 13:47) Taem ol misinari oli kam long Peru, i no gat wan kongregesen long kantri ya. Naoia i gat bitim 1,000. Sem mak long Japan. Taem ol misinari oli kam, i no gat 10 Witnes yet long kantri ya. Be naoia i gat bitim 200,000. Long skul ya, ol studen oli stadi dip long Tok blong God blong faef manis. Sam long ol studen we oli singaot olgeta, oli mekem wok blong spesel paenia no misinari, sam oli wok long ol branj ofis, mo sam oli eria elda. Trening we oli kasem long skul ya i givhan long wok we i gohed long fulwol, blong i kam bigwan moa.

• ?Skul Blong Paenia i givhan long olgeta olsem wanem?

• ?Hu i save go long Skul Blong Ol Man Blong Talemaot Gud Nius?